ނުރައްކާތެރިކޮށް ދުއްވައިގެން ހައްޔަރުކުރި މީހާ ކޯޓުން ދޫކޮށްލައިފި
ލިޔުންތެރިޔާ
އަހުމަދު ހަމީދު އާދަމް
ހުޅުމާލޭގައި ފުލުހެއްގެ ގައިގައި ކާރުން ޖެއްސުމަށްފަހު ފިލަން މަސައްކަތް ކުރުމުގެ ތުހުމަތުގައި ހައްޔަރުކުރި މީހާ ކޯޓުން ދޫކޮށްލައިފި އެވެ.
ހުޅުމާލޭގައި ބާރު ސްޕީޑްގައި ނުރައްކާތެރިކޮށް ދުއްވައިގެން ފުލުހުންގެ ބެލުމުގެ ދަށަށް ގެނެސްފައިވަނީ ހ.ފިލިމާގޭ އުމުރުން 18 އަހަރުގެ އައިކް ހައިޝަމް ޙަސަން އެވެ. ފުލުހުން މައުލޫމާތު ދިންގޮތުގައި ހައިޝަމް ވަނީ ރޭ ހުޅުމާލޭގައި ނުރައްކާތެރިކޮށް ދުއްވައި ފުލުހުން މަޑުކުރަން އެންގުމުންވެސް ފުލުހުންގެ އަމުރަށް ކިޔަމަންނުވެ ފިލަން މަސައްކަތްކޮށްފައެވެ. ފިލަން އުޅުމުގެ ތެރޭގައި އޭނާ ދުއްވި ކާރުގައި ފުލުހުންގެ ސައިކަލްގައި ޖެހުމުގެ ސަބަބުން ފުލުހުންގެ ދެ އޮފިސަރަކު ބިންމައްޗަށް ވެއްޓި ވަނީ އަނިޔާ ވެފައެވެ.
ސައިކަލްގައި ތިބި ދެ އޮފިސަރުންގެ ތެރެއިން އެއް އޮފިސަރަށް ލިބުނު އަނިޔާތަކާ ގުޅިގެން ވަނީ ހުޅުމާލޭ ހޮސްޕިޓަލަށް ގެންގޮސް ފަރުވާދީފައެވެ. އަނިޔާވި ފުލުސް އޮފިސަރު މިހާރު ހޮސްޕިޓަލުން ދޫކޮށްލާފައިވާއިރު، ލިބުނު އަނިޔާތަކަށް އިތުރު ފަރުވާދިނުމަށް ސްޕެޝަލިސްޓް ޑޮކްޓަރަކަށް ދެއްކުމަށް ވަނީ އިރުޝާދުދީފައެވެ.
މިހާދިސާގައި ފުލުހުންގެ ބެލުމުގެ ދަށަށް ގެނައި އަންހެން ކުއްޖާ ދޫކޮށްލާފައިވާ ކަމަށް ފުލުހުން ބުނެއެވެ. އަދި ބުނީ ފިރިހެން މީހާ ކޯޓަށް ހާޒިރުކުރުމުން މިހާރު ދޫކޮށްލާަފައިވާ ކަމަށެވެ. އޭނާ ދޫކޮށްލީ ޝަރުތުތަކެއް ކުރުމަށް ފަހު އެވެ.
ފުލުހުން ބުނީ މި މައްސަލަ ތަހުގީގު ކުރަމުންދާ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
