ކުރިއަށް އޮތް 16 އަހަރު، ހައްޖު މޫސުން އަންނާނީ ސަޢުދީއަށް ފިނި މޫސުމުގައި!

2025 ވަނަ އަހަރުގެ ހައްޖު މޫސުމަކީ ކުރިއަށް އޮތް 16 އަހަރު ތެރޭގައި ހޫނު މޫސުމުގައި އަންނާނެ އެންމެ ފަހު ހައްޖު މޫސުން ކަމުގައި، ސައުދީ އަރަބިއްޔާގެ ނެޝަނަލް މެޓިއޮރޮލޮޖިކަލް ސެންޓަރުން ހާމަކޮށްފިއެވެ.

2026 ވަނަ އަހަރުން ފެށިގެން، ކޮންމެ އަހަރަކު އަންނަ ހައްޖުގެ މަތިވެރި އަޅުކަމުގެ މައްސަރު އަންނާނީ ފިނި މޫސުންތަކަށެވެ. އެގޮތުން ފުރަތަމަ ބަހާރު މޫސުން (ސްޕްރިންގ) ގައި ހައްޖު މޫސުން އަންނައިރު، އެއަށްފަހު އަންނާނީ އެންމެ ފިނި މޫސުން (ވިންޓަރ)ގައެވެ.

މިއީ ހިޖުރީ ކަލަންޑަރުގެ ސަބަބުން އަންނަ ބަދަލެކެވެ. އެގޮތުން ހިޖުރީ ކަލަންޑަރަށް ކޮންމެ އަހަރަކު 10 ދުވަހުގެ ތަފާތު އާދެއެވެ.

މި ބަދަލުގެ ސަބަބުން، ފާއިތުވި އަހަރުތަކުގައި ގަދަ ހޫނުގައި ހައްޖުވެރިން ތަހައްމަލުކުރަމުން އައި ދަތިތަކަށް ލުޔެއް ލިބިގެންދާނެ ކަމެކެވެ. 2024 ވަނަ އަހަރުގެ ހައްޖު މޫސުމުގައި މައްކާގެ ފިނިހޫނުމިން 46 ޑިގްރީ ސެލްސިއަސް އާއި 51 ޑިގްރީ ސެލްސިއަސްއާ ދެމެދުގައި ހުރުމުގެ ސަބަބުން، އެންމެ ދުވަހެއްގެ ތެރޭގައި 2،760 އަށްވުރެ ގިނަ މީހުންނަށް ހޫނުގެ އަސަރުކޮށް، އެތައް ބައެއް ނިޔާވެފައިވެއެވެ.

ނެޝަނަލް މެޓިއޮރޮލޮޖިކަލް ސެންޓަރުން ބުނާ ގޮތުގައި، 2026 އިން 2033 އަށް ހައްޖު މޫސުން އަންނާނީ ބަހާރު މޫސުމުގައެވެ. އޭގެ ފަހުން 2041 އާ ހަމައަށް ދިގު މުއްދަތަކަށް ފިނި މޫސުމުގައި ހައްޖު މޫސުން އަންނާނެއެވެ. އަދި 2042 ވަނަ އަހަރާ ހަމައަށް ހައްޖު މޫސުން ހޫނު މޫސުމަކަށް ނާންނާނެއެވެ. އަދި 2042 ވަނަ އަހަރުން ފެށިގެން އަނެއްކާވެސް 9 އަހަރުގެ މުއްދަތަކަށް ހޫނު މޫސުމުގައި ހައްޖު މޫސުން އަންނާނެއެވެ.

މި ބަދަލާއެކު، ކުރިއަށް އޮތް އަހަރުތަކުގައި ހައްޖަށް ދާ މުސްލިމުންނަށް ފަސޭހަ ގޮތެއްގައި މި އަޅުކަން އަދާކުރުމުގެ ފުރުސަތު ލިބިގެންދާނެ ކަމަށް ބެލެވެއެވެ.