ކޮތަރުތައް މަރުވަނީ ކޮރައިޒާ ޖެހިގެން، އިންސާނުންނަށް ނުރައްކަލެއް ނެތް: މިނިސްޓްރީ
ލިޔުންތެރިޔާ
އަހުމަދު ހަމީދު އާދަމް
މާލޭގެ އެކި ސަރަހައްދުތަކުގައި ގިނަ އަދަދެއްގެ ކޮތަރުތައް މަރުވަމުން ދަނީ އިންފެކްޝަންސް ކޮރައިޒާ ބަލީގައި ކަމަށް ދަނޑުވެރިކަމާއި ދިރޭތަކެއްޗާއި ބެހޭ މިނިސްޓްރީން ބުނެފި އެވެ.
ކޮތަރުތައް މަރުވާތީ އެ މިނިސްޓްރީން ފެށި ދިރާސާއާ ގުޅޭ ތަފްސީލް މިއަދު ވަނީ ހާމަކޮށްފަ އެވެ. މިނިސްޓްރީން ބުނީ ސާމްޕަލް ނަގާ ކުރި ތަހުލީލުން އެނގުނު ގޮތުގައި ކޮތަރުތައް މަރުވަމުން ދަނީ އިންފެކްޝަންސް ކޮރައިޒާ ބަލީގައެވެ. މިއީ އާންމުކޮށް ދޫނީގެ ނޭވާލާ ނިޒާމަށް ޖެހޭ ބައްޔެކެވެ.
ތަހުލީލުތަކުން އެނގުނު ގޮތުގައި މަރުވެފައިވާ ކޮތަރުތަކަށް ކޮކްސިޑިއޯސިސް އާއި ކެންޑިޑިއޭސިސްގެ އިތުުރުން އެހެނިހެން ބެކްޓީރިއަލް އިންފެކްޝަންތައް ވެސް ޖެހިފައިވާ ކަމަށް މިނިސްޓްރީން ވަނީ ފާހަގަކޮށްފަ އެވެ.
މި އިންފެކްޝަންތަކުގެ ސަބަބުން ބަލި ބޮޑުވެ ދޫނި މަރުވެ އެެވެ. ބަލި ޖެހުމުން ނޭފަތުން ފެން އައިސް, ދޫނިތައް ކެއްސާ އަދި ނޭވާލުމަށް ދަތިވެ ބޮލާއި މޫނު ދުޅަވެ ކެއިން ބުއިމަށް އުނދަގޫވާ ކަމަށް ވެސް ބުންޏެވެ. އެ މިނިސްޓްރިީން ބުނި ގޮތުގައި ބަލި ފެތުރުމަށް ފަހު ކުޑަ ދުވަސްކޮޅެއްގެ ތެރޭގައި އޭގެ ޒާތުގައި އަމިއްލައަށް ކޮންޓްރޯލްވެ އެވެ.
އަދި މިއީ އިންސާނުންނަށް ނުރައްކަލެއް އޮތް ބައްޔެއް ނޫން ކަަމަށް ވެސް ބުންޏެވެ. ނަަމަވެސް ބަލިޖެހި ނުވަތަ މަރުވެފައިވާ ކޮތަރުތަކާއި ކުޑަކުދީން ގާތް ނުވުމަށާއި ބޮޑެތި މީހުން ވެސް ރައްކާތެރި ކަމުގެ ވަސީލަތްތަކާ އެކު ނޫނީ އެތަކެތީގައި އަތްލާ ނުހެދުމަށް އިލްތިމާސް ކޮށްފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
