އާބަން ސެންޓަރުގެ ގޮތުގައި ރަށްތައް ތަރައްޤީކުރާނީ، ރައްޔިތުނާއި މުއައްސަސާތަކުގެ ބައިވެރިވުމާއެކު: ރައީސް

ރާއްޖޭގެ އެކި ސަރަހައްދުތަކުގައި ސަރުކާރުން އާބަން ސެންޓަރުގެ ގޮތުގައި ރަށްތައް ތަރައްޤީކުރާނީ، ރައްޔިތުނާއި މުއައްސަސާތަކުގެ ބައިވެރިވުމާއެކު ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅާއި އެއްގޮތްވާގޮތުގެ މަތިން މިއަދު ވަނީ ރާއްޖޭގައި އާބަން ސެންޓަރު ގާއިމުކުރުމަށް ހަމަޖެހިފައިވާ ރަށްތައް ކަނޑައަޅުއްވާފައެވެ. އާބަން ސެންޓަރުތައް ތަރައްޤީކުރުމަށް 7 ރަށެއްގެ ނަން މިއަދު ވަނީ އުއުލާނުކުރައްވާފައެވެ.

މިކަމާއި ގުޅިގެން ސިޔާސީ ބައެއް ފަރާތްތަކުން ވަނީ ސަރުކާރުގެ އެ ސިޔާސަތަށް ވަރަށްބޮޑަށް ފާޑުކިޔައި އެއީ ލާމަރުކަޒީ ނިޒާމުގެ ބާރު ކަނޑުވާލުމަށް ކުރާ މަސައްކަތްތަކެއްގެ ގޮތުގައި ފާހަގަކޮށްފައެވެ.

ސިޔާސީފަރާތްތަކުގެ ފާޑުކިޔުންތަކާ ގުޅިގެން ރައީސް ޑރ.މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ސެންޓަރުގެ ގޮތުގައި ސަރުކާރުން ކަނޑައެޅި ރަށްތައް ތަރައްގީކުރާނީ ރައްޔިތުންގެ ފުރިހަމަ ބައިވެރިވުމާއެކުގައި ކަމަށެވެ.

ރައީސް ވިދާޅުވީ އާބަން ސެންޓަރުތައް ތަރައްޤީކުރުމުގެ މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްޤީގެ މާސްޓަރޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ޤަސްދުކުރާ ކަންކަން ކަމަށެވެ.

ކަންކަމުގެ ހަގީގަތް ނުބައްލަވާ، ނުވަތަ ޙަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން

ރައީސް ޑރ.މުއިއްޒު އެކްސްގައި ކުރެއްވި ޕޯސްޓްގައި ވިދާޅުވިއެވެ.

ސަރުކާރުން އާބަން ސެންޓަރުތައް ތަރައްގީކުރުމަށް ހަމަޖެހިފައިވާ ރަށްތައް:

) ރ. އުނގޫފާރު

2) ބ. އޭދަފުށި

3) ޅ. ނައިފަރު

4) އދ. މަހިބަދޫ

5) ފ. ނިލަންދޫ

6) ދ. ކުޑަހުވަދޫ

7) ލ. ފޮނަދޫ

ސަރުކާރުން ޚާއްޞަ އިސްކަމެއްދީގެން ގިނަ ރައްޔިތުންނަށް ފައިދާ ހާސިލުކުރެވޭނެ ގޮތަށް ރާއްޖޭގައި 7 އާބަން ސެންޓަރު ތަރައްޤީކުރާނެ ކަން ރައީސް ޑރ.މުޢިއްޒު އިއުލާނު ކުރައްވާފައިވަނީ, މީގެ ކުރިން މިއަހަރުގެ މާޗު މަހު، ރ.އުނގޫފާރުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

އެކަމާ ގުޅޭގޮތުން ރައީސް ޑރ.މުޢިއްޒު ވިދާޅުވެފައިވަނީ، ރާއްޖޭގެ މެދު ރާސްތާ، އަދި ދުރު ރާސްތާގެ ތަރައްޤީއަށް ބަލާއިރު، އެންމެ އުތުރުގެ ހަތަރު އަތޮޅުގެ އިންޓަރގްރޭޓެޑް ޑިވެލޮޕްމަންޓް ޒޯނަކާއި، އެންމެ ދެކުނުގެ ހަތަރު އަތޮޅުގެ އިންޓަރގްރޭޓެޑް ޑިވެލޮޕްމަންޓް ޒޯނެއްގެ އިތުރުން ރާއްޖޭގައި 7 އާބަން ސެންޓަރެއް ތަރައްޤީ ކުރައްވާނެކަމަށެވެ.