އިންޑިއާ ދެމިއޮންނާނީ ޔަހޫދީ ދައުލަތާއެކު: މޯދީ

އިންޑިއާއިން އޮތީ ސާބިތުކަމާއެކު ޔަހޫދީ ދައުލަތާ އެކުގައިކަމަށް އިންޑިއާގެ ބޮޑުވަޒީރު، ނަރެންދްރަ މޯދީ ވިދާޅުވެއްޖެއެވެ.

އިސްރާއީލަށް ކުރެއްވި ރަސްމީ ދަތުރުފުޅުގައި އެޤައުމުގެ ޤާނޫނު ހަދާ މަޖިލިސް، ކްނެސެޓްގައި ތަގްރީރުކުރައްވަމުން މޯދީ ވިދާޅުވީ، ހައްދުފަހަނަ އަޅާފައިވާ ފިކުރުތަކާއި ޓެރަރިޒަމާ ދެކޮޅަށް ކުރެވޭ މަސައްކަތްތަކުގައި އިސްރާއީލާއެކު އިންޑިއާ އަބަދުވެސް ވާނޭކަމަށެވެ. މޯދީ ވިދާޅުވީ 2023 ވަނަ އަހަރުގެ އޮކްޓޯބަރުމަހުގެ 7 ވަނަ ދުވަހު އިސްރާއީލަށް ދިން ހަމަލާއަކީ ޓެރަރިސްޓް ހަމަލާއެއްކަމަށް އިންޑިއާއިން ގަބޫލުކުރާ ކަމަށާއި، އެ ހާދިސާގައި މަރުވެދިޔަ އެންމެންނަށާއި ގެއްލުން ލިބުނު މީހުންނަށް އިންޑިއާއިން ތައުޒިޔާކިޔާ ކަމަށެވެ.

ޓެރަރިޒަމް ނައްތާލުމަށް ދެ ޤައުމުން ގުޅިގެން މަސައްކަތް ކުރަމުންދާކަން ފާހަގަކުރައްވައި މޯދީވަނީ ކުރިއަށް އޮތްތަނުގައި ދެ ޤައުމުން ގުޅިގެން އީޖާބީ ގޮތެއްގައި މަސައްކަތް ކުރަމުންދާނޭކަމަށެވެ.

މޯދީގެ ތަގުރީރުގައި ވަނީ ޣައްޒާ އާރާސްތުކުރުމަށް އެމެރިކާގެ ރައީސް ޑޮނާލްޑް ޓްރަމް އިސްނަންގަވައިގެން ކުރިއަށްގެންދާ ޣައްޒާ ބިނާކުރުމުގެ ޕްރޮގްރާމަށްވެސް އިންޑިއާގެ ފުރިހަމަ އެއްބާރުލުން ލިބޭނޭކަމަށް ވިދާޅުވެފައެވެ. އަދި ޓްރަމްޕްގެ އެ ނިންމުމަކީ މުޅި އެ ސަރަހައްދުގެ ސުލްހައަށް ލިބިގެންދާނޭ ވަރަށް މުހިންމު ޕްރޮގްރާމަކަށްވެސް ވެގެންދާނޭކަމަށް މޯދީ ވަނީ ފާހަގަކުރައްވާފައެވެ.

މޯދީ އިސްރާއީލަށް މި ކުރެއްވި ޒިޔާރަތަކީ ދެ ދުވަހުގެ ރަސްމީ ދަތުރުފުޅެކެވެ. މި ދަތުރުފުޅުގައި، އިސްރާއީލާ އިންޑިއާ އާ ދެމެދު އެކި ދާއިރާތަކުން ވަނީ އެއްބަސްވުމުގައި ސޮއިކުރުމަށް ނިންމާފައެވެ.