މެސީ އިންޓަރ މަޔާމީއާއެކު އެއްބަސްވުން އައުކޮށްފި

އާޖެންޓީނާގެ ފުޓްބޯޅަ ލެޖެންޑް އެމެރިކާގެ މޭޖަރ ލީގުގެ ކްލަބް އިންޓަރ މަޔާމީގައި އިތުރު 3 އަހަރު މަޑުކުރުމަށް ނިންމައިފިއެވެ.

މަޔާމީން ވަނީ މެސީ އެ ކްލަބްގައި 2028 ވަނަ އަހަރުގެ ނިޔަލަށް މަޑުކުރުމަށް ނިންމާފައިވާކަން ޔަގީންކޮށްދީ، އައު އެއްބަސްވުމުގައި ސޮއިކުރި ފޮޓޯތައް އާއްމުކޮށްފައެވެ. ކްލަބުން ބުނީ މެސީ އާއެކު އައު އެއްބަސްވުމަކަށް ދިޔައީ ދެފަރާތުންވެސް އެކަމަށް ބޭނުންވެގެންނެވެ.

އިނގިރޭސި ފުޓްބޯޅަ ލެޖެންޑް ޑޭވިޑް ބެކަމްގެ ހިއްސާ އޮންނަ މޭޖަރ ލީގްގެ ކްލަބް އިންޓަރ މަޔާމީއަށް މެސީ ބަދަލުވީ 2023 ވަނަ އަހަރެވެ. އެ ކްލަބަށް ބަދަލުވުމަށްފަހުވެސް މެސީ ދިޔައީ އޭނާގެ ހުނަރު ދައްކަމުންނެވެ. މެސީ މަޔާމީއަށް ބަދަލުވުމާ ގުޅިގެން އެމެރިކާގެ ފުޓްބޯޅައިގެ ފޯރި ގަދަވެގެން ދިޔައިރު، އެ ކްލަބްގެ މަގްބޫލުކަންވެސް ވަނީ ވަރަށްބޮޑަށް އިތުރުވެގެން ގޮސްފައެވެ.

މަޔާމީއަށް މެސީ ބަދަލުވުމުގެ އެންމެބޮޑު އެއް ސަބަބަކީ ޑޭވިޑް ބެކަމް އެވެ. އުމުރުން 38 އަހަރުވިނަމަވެސް މެސީ އަންނަނީ މޭޖާ ލީގްގައި މޮޅު ކުޅުމެއް ދައްކަމުންނެވެ. އެގޮތުން މަޔާމީއަށް ބަދަލުވުމަށްފަހު ކުޅުނު 53 މެޗްގައި މެސީ ވަނީ 50 ގޯލް ޖަހާފައެވެ.

މެސީއާއެކު މަޔާމީ ޓީމުގައި ހިމެނޭ މަޝްހޫރު ކުޅުންތެރިންގެ ތެރޭގައި ޖޯޑީ އަލްބާ، ލުއިސް ސުއަރޭޒް، ސާޖިއޯ ބުސްކެޓް ފާހަގަކޮށްލެވެއެވެ.