މައްސަލައަކީ ސްޕޯޓްސް ކާރެއް ނޫން؛ ކުށްކުރާ މީހުންނަށް އަދަބު ނުލިބި ދޫވެފައި ތިބުން: ޑްރިފްޓް އެސޯސިއޭޝަން
ލިޔުންތެރިޔާ
ޚަދީޖާ އަރުފާ
ނުރައްކާތެރި އެކްސިޑެންޓްތައް ހިނގަންމެދުވެރިވާ ސަބަބަކީ ރޭސް ކާރު ނޫން ކަމަށާ އެހެނެއް ކަމަކު އެފަދަ އެކްސިޑެންޓް ހިނގަނީ ކުށްތައް ކުރާ މީހުންނަށް އަދަބު ނުދެވި ދޫކޮށްލާފައި ތިބޭތީ ކަމަށް ބުނެ ޑްރިފްޓް އެސޯސިއޭޝަން އޮފް މޯލްޑިވްސް އިން ކަންބޮޑުވުން ފާޅުކޮށްފިއެވެ.
ހުޅުމާލެ ސެންޓްރަލް ޕާކް ކައިރީގައި ރޭ ދަންވަރު ބާރު ސްޕީޑުގައި ދުއްވާފައިދިޔަ ރޭސް ކާރެއްގައި ސައިކަލެއް ޖެހި ހިނގި އެކްސިޑެންޓެއްގައި މޯލްޑިވްސް ކަރެކްޝަނަލް ސާވިސްގައި ވަޒީފާ އަދާކުރަމުން އައި ޕްރިޒަން ލާންސް ކޯޕްރަލް ހަސަން ސަމާހު، 23އ، ވަނީ ނިޔާވެފައެވެ.
އެއާއެކު ވަރަށް ގިނަ ބަޔަކު ނުރުހުން ފާޅުކޮށް ސްޕޯޓްސް ކާރުތައް މަނާކުރަން އަންނަނީ ގޮވާލަމުންނެވެ.
އެކަމާ ގުޅިގެން އެކްސިޑެންޓާއި ގުޅިގެން ޑްރިފްޓް އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ބާރު ސްޕީޑުގައި ރައްޔިތުންގެ ސަލާމަތާއި ރައްކާތެރިކަމަށް ނުބަލާ ކާރާއި ސައިކަލު ދުއްވުމަކީ އެ އެސޯސިއޭޝަނުން އަބަދުވެސް ކުށްވެރިކުރާ އަމަލެއް ކަމަށެވެ. އަދި މިގޮތަށް ގާނޫނާ ޚިލާފަށް ދުއްވާ ފަރާތްތަކަށް އެންމެ ހަރުކަށި ފިޔަވަޅު އެޅުމަކީ އެ ޖަމިއްޔާއިން އަބަދުވެސް ގޮވާލާ ކަމެއް ކަމަށެވެ.
ނަމަވެސް ފަހަކަށް އައިސް އެކްސިޑެންޓްތަކުގައި ސްޕޯޓްސް ކާރުތައް ބަދުނާމު ކުރަމުންދާކަން ފާހަގަކުރެވިފައިވެއެވެ. މިކަމަށް އަޅުގަނޑުމެން ދަންނަވާލަން ބޭނުންވަނީ، މައްސަލައަކީ ކުށްކުރާ ފަރާތްތައް ކަމަށެވެ. މައްސަލަ އަކީ ވެހިކަލް ނޫން ކަމަށެވެ. އަދި މިކަހަލަ ފަރާތްތަކަށް އެކަށީގެންވާ އަދަބު ނުލިިބި މުޖުތަމައުތެރޭގައި އަނެއްކާވެސް ދޫވަމުންދާ ކަމެވެ
ޑްރިފްޓް އެސޯސިއޭޝަން
މީގެ އިތުރުން މަސްތުވާތަކެތި ބޭނުންކޮށްގެން އަދި ލައިސެންސް ނެތި އުޅަނދުފަހަރު މަގުމަތީގައި ބިރެއް ނެތި އުޅެން ފެށުމަކީ މިކަހަލަ އެކްސިޑެންޓްތައް ގިނަވެގެންދާ އެންމެ ބޮޑު ސަބަބުކަން ފާހަގަކުރެވިފައިވާ ކަމަށްވެސް އެ ބަޔާނުގައި ބުނެފައިވެ އެވެ.
އެހެންކަމުން ވީހާވެސް ހަރުކަށި ފިޔަވަޅުތައް ކުށްކުރާ މީހުންނަށް އެޅި މުޖުތަމައުގެ ތެރެއަށް އަނބުރާ ދޫކޮށްލުމުގެ ކުރިން އެ މީހުންނަކީ މުޖުތަމައުގައި އުޅެން އެކަށީގެންވާ ބައެއް ކަމުގައި ޔަގީންކުރުމަށް ކަމާބެހޭ ފަރާތްތަކަށް އެ އެސޯސިއޭޝަނުން ވަނީ ގޮވާލާފައެވެ.
ރޭގެ އެކްސިޑެންޓާއި ގުޅިގެން ރައީސް ޑރ މުހައްމަދު މުޢިއްޒު މިއަދު އެކްސްގައި ކުރެއްވި ޕޯސްޓެއްގައި އެމަނިކުފާނު ވަނީ ރާއްޖޭގެ އެއްވެސް ރަށެއްގައި، އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ ފަރާތްތަކާމެދު ހަރުކަށި ފިޔަވަޅުތައް އެޅުމަށް ގާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސް، އެކަންކަން ތަންފީޒުކުރަން ފަށަން ސަރުކާރުގެ ކަމާގުޅުންހުރި އިދާރާތަކަށް މިހާރު އަންގަވައިފައިވާ ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
