ބޮޑު ދެ ޤާނޫނު އުވާލުމާ، ބޮޑު ދެ މައްސަލައެއް މާދާމާގެ މަޖިލިސް ޖަލްސާއަށް

ރައްޔިތުންގެ މަޖިލީހުގެ ޖަލްސާއެއް ނުބާއްވާތާ އެތައް ދުވަހަކަށް ފަހު މާދަމާއަށް މަޖިލީހުގެ ޖަލްސާއެއް އެޖެންޑާކޮށްފިއެެވެ.

މާދަމާގެ ޖަލްސާއަކީ ބޮޑެތި ނިންމުން ތަކެއް ނިންމުމަށް ތާވަލް ކުރެވިފައިވާ ޖަލްސާއެއްކަން ފާހަގަކޮށްލަން ޖެހެއެވެ.

އެގޮތުން އިންތިހާބީ ރައީސް އިބްރާހިމް މުހައްމަދު ސޯލިހު (އިބޫ) ހުވާ ކުރައްވާ ތާރީހް ކަނޑައެޅުމާއި ކުރީގެ ރައީސް މުހައްމަދު ނަޝީދު މިނިވަން ކުރުމަށް އިދިކޮޅު ފަރާތްތަކުން ހުށަހަޅާފައިވާ ގަރާރުގެ މަސައްކަތްވެސް މާދަމާއަށް ވަނީ ތާވަލް ކުރެވިފައެވެ.

މީގެ އިތުރުން ވިލުފުށީ ދާއިރާ މެންބަރު ރިޔާޒު ރަޝީދު ހުށަހަޅުއްވާފައިވާ އެންޓިޑިފެކަޝް ބިލާއި ހެންވޭރު އުތުރު ދާއިރާގެ މެންބަރު އަބްދުﷲ ޝާހިދު ހުށަހަޅުއްވާފައިވާ އަބުރު ރައްކާތެރި އުވާލުމަށް ހުށައެޅުއްވި ހުށަހެޅުން ހިމެނެއެވެ.

މި ދެބިލަކީ ސަރުކާރު ހިނގާ ޕާޓީ އަދި އިދިކޮޅު އިއްތިހާދުގެ މެންބަރުގެ މެދުގައި ވެސް ހިޔާލު ތަފާތުވުން އުފެދިފައިވާ ދެބިލްކަން ފާހަގަކޮށްލަން ޖެހެއެވެ. ނަމަވެސް އަބުރު ރައްކާތެރި ކުރުމުގެ ޤާނޫނަކީ އިންތިހާބީ ރައީސް އިބްރާހިމް މުހައްމަދު ސޯލިހް ގެ ރިޔާސީ ވައުދެއް ކަމުން މި ޤާނޫނު އިސްލާހުކުރުމަށް ވުރެ އުވާލުމަކީ ވަރަށް ގާތްކަމެކެވެ.

ގިނަ ފަރާތްތަކުން ބުނަމުން ގެންދާ ގޮތުގައި މި ދެ ޤާނޫނު އުވާލުމުގެ ބަދަލުގައި އިސްލާހު ގެނައުން މުހިންމެވެ.

އަދި މާދަމާއަށް އެޖެންޑާ ކުރެވިފައިވާ ރައީސް ނަޝީދުގެ މައްސަލާގައި މިއީ ދުސްތޫރީ ގޮތުން މަޖިލީހަށް ބެލޭނެ ކަމާމެދު ވެސް ބައެއް ޤާނޫނީ ބޭފުޅުން ދަނީ ސުވާލު އުފައްދަވަމުންނެވެ.