ކުރީން ފްލެޓް ލިބިފައިވާ 976 ދެމަފިރިއަކަށް މި ފަހަރުވެސް ފްލެޓް
ލިޔުންތެރިޔާ
އަހުމަދު ހަމީދު އާދަމް
ސަރުކާރުން ހިންގާފައިވާ ބޯހިޔާވަހިކަމުގެ މަޝްރޫއުއަކުން ފްލެޓް ލިބިފައިވާ 976 ދެމަފިރީންނަށް މި ފަހަރު ދޫކުރާ 4,000 ހައުސިން ޔުނިޓުން ވެސް ފްލެޓް ލިބިފައިވާ ކަމަށް ހައުސިން މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެ އެވެ.
މިއަދު ބޭއްވި ނޫސްވެރީންގެ ބައްދަލްވުމުގައި މިނިސްޓަރު ވިދާޅުވީ ސަރުކާރުން ހިންގާފައިވާ ބޯހިޔާވަހިކަމުގެ މަޝްރޫއުއަކުން ފިރިމީހާ ނުވަތަ އަނބިމީހާއަށް ކުރީން ފްލެޓް ލިބިފައިވާނަމަ އެފަދަ ބަޔަކަށް ދެން ފްލެޓް ނުލިބޭނެ ގޮތް ވޭތޯ މަސައްކަތް ކުރި ކަމަށެވެ.
ނަމަވެސް އިއުލާނުކޮށްފައިވާ އުސޫލުތަކާއި ރާއްޖޭގައި މިވަގުތު ހެދިފައިހުރި ގާނޫނުތަކާއި ގަވާއިދުތަކަށް ބަލާނަމަ ކުރީން ފްލެޓް ލިބިފައިވީނަމަވެސް އަލުން އެ ދެމީހުންގެ ތެރެއިން އެކަކަށް ފްލެޓް ދިނުން މަނާކުރާ ގާނޫނެއް ގަވާއިދެއް ނެތް ކަމަށެވެ.
އަދި ކުރީ ސަރުކާރުން ހެދި އުސޫލުގައި ދެމަފިރީންގެ ތެރެއިން އެކަކަށް އެހެން ސްކީމަކުން ލިބިފައި ވިޔަސް މި ސްކީމުން ނުލިބޭނެ ކަމަށް ނިންމެން ނެތް ކަމަށެވެ. މިނިސްޓަރު ވިދާޅުވީ ހިޔާ އިން ފެލްޓް ލިބުނު ދެމަފިރީންނަށް މި ފަހަރުވެސް ލިބިފައިވާ ކަމަށެވެ.
"އަޅުގަނޑު އަމިއްލަ ނަފްސަށް ގަބޫލެއް ނުކުރަން އެއް އާއިލާއަކަށް ދެތަން ދޭން ޖެހޭނެ ކަމަކަށެއް. އެހެންވީމަ އަޅުގަނޑުމެން މަސައްކަތް ކުރީ ގާނޫނީ ގޮތުން ނުދީވާނެ ގޮތެއް ވޭތޯ,"
އެގޮތުން ސަރުކާރުން ހިންގާފައިވާ ބޯހިޔާވަހިކަމުގެ މަޝްރޫއުއަކުން ފްލެޓް ލިބިފައިވާ 976 މީހެއް މި ފަހަރުގެ ލިސްޓްގައި ހިމެނިފައިވާ ކަމަށެވެ. އެއީ ކުރީ ސަރުކާރުން އެކުލަވާލި ލިސްޓެކެވެ.
މިނިސްޓަރު ވިދާޅުވީ އެކަމަށް ބަދަލު ނުގެނެވުނީ އެކަން ބަދަލު ކުރެވޭނެ އެއްވެސް ހަމައެއް ނެތުމުންނެވެ. އަދި ވިދާޅުވީ ކުރީ ސަރުކާރުން އެކުލަވާލި ލިސްޓްގައި ދެމަފިރީންނަށްވެސް ފްލެޓް ދީފައިވާ ކަމަށެވެ. ނަމަވެސް މި ސަރުކާރުން އެކަން ބަދަލުކޮށް ކޮންމެވެސް އެކެއްގެ ފްލެޓް ދޫކޮށްލަން ޖެހޭ ގޮތަށް ހަމަޖައްސާފައިވާ ކަމަށެވެ. އަދި ޔަގީންކަން ދެއްވީ މި ސްކީމުން މިހާރު ދެމަފިރިއަކަށް ފްލެތް ދީފައިނުވާނެ ކަމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
