އާ ސަރުކާރުގައި 22 މިނިސްޓްރީ؟

މިމަހުގެ 17 ވަނަ ދުވަހު ދިވެހިރާއްޖޭގެ ރައީސުލްޖުމްހޫރިއްޔާގެ މަގާމާއި ހަވާލުވެ ވަޑައިގަންނަވާ އިބްރާހިމް މުހައްމަދު ސޯލިހުގެ ސަރުކާރުގައި ޖުމްލަ 22 މިނިސްޓަރުން ތިއްބަވާނެކަމަށް ހަބަރުފެތުރެން ފަށައިފިއެވެ.

އިދިކޮޅު ކޯލިޝަންގެ އިސްވެެރިންނާއި ހަވާލާދީ ބައެއް މީޑިޔާތަކުން ރިޕޯޓްކޮށްފައިވާ ގޮތުގައި އާ ސަރުކާރުގައި މިނިސްޓްރީތައް އިތުރުކޮށްފައިވަނީ ސަރުކާރުގެ ހިދުމަތްތައް ލިބޭ މިންވަރު އިތުުރުކުރުމަށާއި ގިނަ ޕާޓީތަކަށް ފުރުސަތު ދިނުމުގެ ގޮތުންކަމަށެވެ. 22 މިނިސްޓަރުން ކެބިނެޓްގައި ތިބޭއިރު، މިއީ ބަންޑާރަ ނައިބާއި ނުލާކަން ފާހަގަކޮށްލެވެއެވެ.

ގުޅިފައިވާ ޕާޓީތަކަށް ކެބިނެޓުން ގޮނޑި ލިބޭ އަދަދަށް ބަލާލާއިރު ކެބިނެޓްގެ 40 ޕަސެންޓް ދޭނީ އެމްޑީޕީއަށެވެ. ކުރީގެ ރައީސް މައުމޫން އަބްދުލްގައްޔޫމަށް 20 ޕަސެންޓް ދޭއިރު ޖުމްހޫރީ ޕާޓީއަށް ދެނީ 25 ޕަސެންޓެވެ. އަދި އަދާލަތު ޕާޓީއަށް ދިނުމަށް ހަމަޖެހިފައިވަނީ 15 ޕަސެންޓްކަމަށްވެސް މައުލޫމާތު ލިބެއެވެ.

ވޮއިސްއަށް މައުލޫމާތު ލިބިފައިވާާ ގޮތުގައި އާ ސަރުކާރުގައި މުޅިން އަލަށް، ސައިންސްއާއި ޓެކްނޮލޮޖީއަށް ވަކިން މިނިސްޓްރީއެއް ގާއިމްކުރެވިގެންދާނެއެވެ. އަދި ޑިޕާރޓްމެންޓްއެއްގެ ގޮތުގައި އޮތް ހެރިޓޭޖް، ވަކި މިނިސްޓްރީއަކަށް ބަދަލުކުރެވިގެން ދާނެއެވެ.

އާ ސަރުކާރުގައި މިހާ ވުޒާރާތައް އިތުރުކުރުމަށް ނިންމާފައިވާއިރު، ރައީސް ޔާމީންގެ ސަރުކާރުގައި ތިއްބަވަނީ 15 މިނިސްޓަރުންނެވެ.