ކުދި އަދި މެދުފަންތީގެ ވިޔަފާރިތަކުން ކޯޓާ ފީ ދައްކަން ނުޖެހޭ ގޮތް ހަދަން ގާނޫނަށް އިސްލާޙެއް
ލިޔުންތެރިޔާ
ޚަދީޖާ އަރުފާ
ކުދި އަދި މެދުފަންތީގެ ވިޔަފާރިތަކަށް ލުއިތަކެއް ހޯދައިދިނުމަށާއި ވަޒީފާއާބެހޭ ކަންކަން އިތުރަށް ހަރުދަނާކުރުމަށްޓަކައި، ވަޒީފާއާބެހޭ ގާނޫނަށް ސަރުކާރުގެ ފަރާތުން އިސްލާޙުތަކެއް ހުށަހަޅައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މި އިސްލާޙު ސަރުކާރުގެ ފަރާތުން ހުށަހެޅުއްވީ މަޑަވެލި ދާއިރާގެ މެންބަރު މުޙައްމަދު ޝަމީޒެވެ. މި ބިލުގެ އިބުތިދާއީ ބަހުސް މިހާރު މަޖިލީހުގައި ދަނީ ކުރިއަށްގެންދަމުންނެވެ.
މި އިސްލާޙު ހުށަހެޅުމުގެ މައިގަނޑު ބޭނުމަކީ ވަޒީފާދޭ ފަރާތާއި ވަޒީފާ އަދާކުރާ ފަރާތާ ދެމެދު ވެވޭ އެއްބަސްވުންތައް ބާޠިލުކުރުމުގެ އުސޫލުތައް ހަރުދަނާކުރުމާއި، ބިދޭސީ މުވައްޒަފުން ގެނައުމަށް ދައްކަންޖެހޭ ކޯޓާ ފީ މުރާޖަޢާކޮށް، ބައެއް ފަރާތްތަކުން އެ ފީ ދެއްކުމުން އިސްތިސްނާކުރުމެވެ.
ކޯޓާ ފީން އިސްތިސްނާކުރުން
ހުށަހަޅާފައިވާ އިސްލާޙުގައިވާ ގޮތުން، ވަކި ބާވަތެއްގެ ވިޔަފާރިތަކަކަށް ނިސްބަތްވާ ފަރާތްތަކުން ކޯޓާ ފީ ދެއްކުމުން އިސްތިސްނާކުރުމަށް ވަޒީރުންގެ މަޖިލީހަށް ނިންމިދާނެއެވެ. މިގޮތަށް އިސްތިސްނާ ދިނުމުގައި ރިޢާޔަތްކުރަންޖެހޭ ކަންތައްތަކުގެ ތެރޭގައި ހިމެނެނީ:
- އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް ފަހި މާޙައުލެއް ގާއިމުކޮށް، އިޤްތިޞާދުގައި އެފަދަ ވިޔަފާރިތަކުގެ ދައުރު ފުޅާކުރުން.
- އެފަދަ ވިޔަފާރިތަކުގައި ދިގު މުއްދަތުގެ ވަޒީފާގެ ފުރުޞަތުތައް އިތުރުކުރުން.
- ކުދި ވިޔަފާރިތަކާއި ބޮޑެތި ވިޔަފާރިތަކާ ދެމެދު އޮތް ފަރަޤު ކުޑަކުރުން.
- ވާދަވެރިކަން އުފައްދައި، އާ އުފެއްދުންތަކާއި ޚިދުމަތްތައް ތަޢާރުފުކުރުމަށް ހިތްވަރުދީ، ވިޔަފާރިތަކުގެ ފެންވަރު މަތިކުރުން.
ވަޒީފާގެ އެއްބަސްވުން ބާޠިލުކުރުމާއި ނޯޓިސް ދިނުން
މީގެ އިތުރުން، ވަޒީފާގެ އެއްބަސްވުން ބާޠިލުކުރުމާ ގުޅޭ އުސޫލުތަކަށްވެސް ވަނީ ބަދަލުތަކެއް ހުށަހަޅާފައެވެ. އެގޮތުން:
އެއް އަހަރަށްވުރެ ދިގު ނޫން މުއްދަތަކަށް ވަޒީފާގައި ހުރި މުވައްޒަފަކު ވަޒީފާއިން ވަކިކުރާނަމަ ދޭންޖެހޭނީ ދެ ހަފުތާގެ ނޯޓިސްއެވެ.
ގާނޫނުގައި ބަޔާންކުރާ ނޯޓިސްގެ މުއްދަތަށްވުރެ އިތުރު ނުވަތަ ކުރު މުއްދަތެއް ދިނުމަށް ދެފަރާތުން އެއްބަސްވުމަކަށް އައުމަކަށް މި އިސްލާޙު ހުރަހެއް ނާޅައެވެ.
ނޯޓިސް ދިނުމުގެ ބަދަލުގައި، ނޯޓިސްގެ މުއްދަތަށްވާ މުސާރައާއި އިނާޔަތްތައް ދިނުމަށްފަހު ވަޒީފާގެ އެއްބަސްވުން ބާޠިލުކުރުމުގެ ފުރުޞަތު ވަޒީފާދޭ ފަރާތަށާއި މުވައްޒަފަށްވެސް ލިބިގެންވެއެވެ.
އަންނަ މާޗު މަހުން ފެށިގެން، ވިއްސަށްވުރެ މަދު އަދަދެއްގެ ބިދޭސީން ގެންގުޅޭ ކުންފުނިތަކުން އަހަރީ ކޯޓާ ފީ ދައްކަން ނުޖެހޭ ގޮތަށް ހަދަން ނިންމާފައިވާ ކަމަށާ، އެކަމަށްޓަކައި ގާނޫނަށް ގެންނަންޖެހޭ އިސްލާހް މަޖިލީހަށް ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާން ކުރެއްވީ މި އަހަރުގެ ރިޔާސީ ބަޔާނުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
