ކުރީގެ ވެރިންނަށް ނައިބް ރައީސްގެ މެސެޖެއް
ލިޔުންތެރިޔާ
ޚަދީޖާ އަރުފާ
ރާއްޖޭގައި ކުރީން ވެރިކަން ކުރެއްވި ބޭފުޅުންނަށާއި އިސް މަގާމުތައް ފުރުއްވާފައިވާ ބޭފުޅުންނަށް ހާއްސަ މެސެޖެއް، ނައިބް ރައީސް ހުސެއިން މުހައްމަދު ލަތީފު ދެއްވައިފި އެވެ.
ނައިބް ރައީސް އިއްޔެ އެކްސްގައި ކުރެއްވި ޕޯސްޓެއްގައި އެމަނިކުފާނު ވަނީ ކޮންމެ ކަމަކަށް ވެސް ވަގުތެއް އޮންނާނެ ކަމަށާ އެ ވަގުތަށް އިހުތިރާމްކޮށް، ޝުކުރުވެރިވުމުން ލިބޭ ގަދަރާއު އުފާވެރިކަން ބޮޑުކަމަށް ވިދާޅުވެފައެވެ.
"ކޮންމެ ކަމަކީވެސް ވަގުތު ކަނޑައެޅިގެންވާ ކަމެކެވެ. އެއީ ދުނިޔޭގެ އާދައެވެ. އެ ލިބުނު ވަގުތަށް އިހުތިރާމުކޮށް ޝުކުރުވެރި ވުމުން ލިބޭ ގަދަރާއި، އުފާވެރިކަން މާ ރަނގަޅެވެ. އެއްވެސް ކަމަކީ ދާއިމަށް ތިމާގެ ހައްގެއް ކަމަށް ނުދެކޭށެވެ." ނައިބް ރައީސްގެ މެސެޖުގައިވެ އެވެ.
އެއާއެކު ގިނަ ބަޔަކު ވަނީ އެއީ ކޮން ކަމަކާ ގުޅިގެން ލިޔުއްވި މެސެޖެއްތޯ ސުވާލު އުފައްދާފައެވެ.
އެކަމާ ގުޅިގެން، އެމަނިކުފާނު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އެ މެސެޖަކީ ކުރިން ވެރިކަން ކުރެއްވި ބޭފުޅުންނާއި ދައުލަތުގެ އިސް މަގާމުތައް ފުރުއްވި ބޭފުޅުންނަށް ރައްދުކޮށް ދެއްވި މެސެޖެއް ކަމަށެވެ.
އެގޮތުން ނައިބް ރައީސް ވިދާޅުވީ އެ ބޭފުޅުންނަކީ ރައްޔިތުން ނިންމާފައިވާ ވަކި މުއްދަތަކަށް މަސްއޫލިއްޔަތު އަދާކުރައްވަން ޖެހިވަޑައިގަންނަވާ ބޭފުޅުން ކަމަށެވެ.
އަދި އެ މުއްދަތު ހަމަވުމުން އެކަމަށް އިހުތިރާމް ނުކުރުމަކީ ރައްޔިތުންގެ ނިންމުމަށް އިހުތިރާމް ކުޑަކޮށް، އެނިންމުމަށް ގޮންޖެހުން ކަމުގައި ގަބޫލުކުރައްވާ ކަމަށްވެސް ވިދާޅުވިއެވެ.
“އެފަދަ ބޭފުޅުން ކުރިއަށް އޮތް ތަނުގައިވެސް ޒިންމާދާރުކަމާއެކު ސަރުކާރު ޖަވާބުދާރީކޮށް، ރައްޔިތުންގެ ލޯތްބާއި އިހުތިރާމް ލިބޭ ގޮތަށް މަސައްކަތް ކުރިއަށް ގެންދަވާނެ ކަމަށް އުންމީދު ކުރަން،" ނައިބް ރައީސް ވިދާޅުވެފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
