މެޒޯގެ އެންމެ ފަހު ވީޑިއޯ: ބޭނުންވީ 60ގެ އަހަރުތައް ފެށުމުގެ ކުރީން ވީޑިއޯއެއް ހަދަން

ރާއްޖޭގައި އުފެދުނު އެންމެ މޮޅު މިއުޒީޝަނުންގެ ތެރޭގައި ހިމެނޭ ގ.ކްރީމްގެ މުހައްމަދު މާޖިދު (މެޒޯ) މުހައްމަދު ކުއްލި ގޮތަކަށް ނިޔާވީ މި މަހުގެ 12 ވަނަ ދުވަހު އެވެ. މެޒޯގެ ކުއްލި ވަކިވުމަކީ އޭނާގެ އާއިލާއާ އެކުވެރީންނާއި މިއުޒިކީ ދާއިރާއާ ޖުމްލަކޮށް ދިވެހީންނަށް ހިތާމަ ގެނުވައިދިން ކަމެކެވެ.

މީހުންނާއި ވަރަށް ގުޅޭ އެކުވެރީން ގިނަ, މެޒޯގެ އެންމެ ފަހު ވަގުތައް ހޭދަކޮށްފައި ވަނީ އަހުމަދު މަރުޒޫގް (މަރޭ) އާ އެކު އެވެ. މަރޭއާ މެޒޯ އަކީ ދުވަސްވީ ދެ އެކުވެރީންނެވެ. މި ފަހުން ވަރަށް ގިނައިން އެކުގައި ކޮފީއަށް ގޮސް އުޅުނެވެ. މެޒޯ ނިޔާވި ދުވަހުގެ ހެނދުނު އޭނާ މަރޭއާ ގުޅީ ދެ ބޭނުމެއްގަ އެވެ. އެއް ބޭނުމަކީ ބޯކޮށާ ތަނަކުން އެޕޮއިންޓްމަންޓެއް ހޯދާ ދިނުމެވެ. ދެން ބޭނުންވީ ދެ ވެރީން ބައްދަލްވެ ކޮފީއެއް ބޮއިލުމެވެ.

މެޒޯ އެދުނު ގޮތަށް އެޕޮއިންޓްމަންޓް ސެޓްކޮށް ބޯކޮށާ ތަނަށް ދާންވީ ގަޑި އެއްގި އެވެ. އެއާއެކު އިތުރު ކަމަކަށް މެޒޯ, މަރޭގެ ގާތުގައި އެދުނެވެ. އެއީ ވީޑިއޯ ކުރާނެ މީހަކު ހޯދައި ދިނުމަށެވެ. މަރޭ ވިދާޅުވި ގޮތުގައި އެ ދުވަހު ވީޑިއޯއެއް ނަގަން މެޖޯ ބޭނުންވީ އޭނާގެ އުމުރުން 60 އަހަރު ފުރެން ތައްޔާރުވެފައި އޮތުމުންނެވެ.

ބޭނުންވީ 50ގެ އަހަރުތައް ނިމި 60ގެ އަހަރުތައް ފެށުމުގެ ކުރީން ވީޑިއޯއެއް ނަގާށެވެ. ނަމަވެސް ކަން ދިމާކުރި ގޮތުން އެ ވީޑިއޯ ވީ މެޒޯގެ ފަހު ވީޑިއޯ އަށެވެ. ވީޑިއޯ ނެގިތާ ދެ ގަޑިއިރު ފަހުން މެޒޯ ނިޔާވީ އެވެ.

މަރޭ މިއަދު ވަނީ އެ ދުވަހުގެ ވީޑިއޯ އާންމުންނާ ހިއްސާކޮށްފަ އެވެ. ވީޑިއޯ އިން ފެންނަނީ މެޒޯ, ސެލޫންގެ ދޮރުން ވަނުމާ އެކު އޭނާގެ ބޯކޮށަން ހާއްސަވެފައި ހުރި ބިދޭސީ މީހާ, މެޒޯއަށް މަރުހަބާ ކިޔާ ތަނެވެ. ދޮރުން ވަދެ, އިސްވެ ސަލާމް ކުރަނީ މެޒޯ އެވެ. ވަރަށް އިހްތިރާމާ އެކު ސަލާމް ކުރާ މަންޒަރު ފެނެ އެވެ. ދެން ފެންނަނީ ބޯކޮށަމުން ދިޔައިރު ނަގާފައިވާ ވީޑިއޯގެ މަންޒަރުތަކެވެ.

ބޯކޮށަމުން ދިޔަ ވަގުތުވެސް މެޒޯ ދިޔައީ ތަފާތު އެކި ވާހަކަތައް ދައްކަމުންނެވެ. އޭގެން ވާހަކަ ކޮޅެއް ވެސް މަރޭގެ މި ވީޑިއޯ ގައި ހިމަނާފައިވެ އެވެ. އެއީ އޭރު މިއުޒިކު ކުޅުން އޮންނަ ގޮތް މެޒޯ ކިޔައިދޭ ވަގުތުކޮޅުގެ ވީޑިއޯ ކޮޅެކެވެ.

ވީޑިއޯ ހިއްސާކޮށް މަރޭ ބުނީ މެޒޯއަކީ ނަމޫނާ, ފާހަގަކޮށްލެވޭ ފަދަ ޝަހުޝިއްޔަތެއް ކަމަށެވެ. އެއީ އެތެރެއާ ބޭރު ފުށުން ވެސް ރީތި އިންސާނެއް ކަމަށެވެ.