ކަނޑުގެ ސަލާމަތީ ކަންކަމަށް، ރާއްޖޭގެ ދިފާޢީ ބާރު ވަރުގަދަކުރަން ރައީސް ޚާއްސަ އިސްކަމެއް ދެއްވާ: ވަޒީރު ޣައްސާން
ކަނޑުގެ ސަލާމަތީ ކަންކަން ބެލެހެއްޓުމަށް ރާއްޖޭގެ ދިފާޢީ ބާރާއި ކޯސްޓްގާޑް ވަރުގަދަކުރުމަށް ރައީސް ޑރ.މުއިއްޒު ޚާއްސަ އިސްކަމެއް ދެއްވާކަމަށް ދިފާޢީ ވަޒީރު މުހައްމަދު ޣައްސާން މަޢުމޫން ވިދާޅުވެއްޖެއެވެ.
ވަޒީރު ޣައްސާން މިފަދައިން ވިދާޅުވީ އިންޑިޔާ ކަނޑުގެ ސަލާމަތީ ކަންކަން ބެލެހެއްޓުމަށް އިންޑިއާއާއި ރާއްޖެއާއި ސްރިލަންކާގެ ކޯސްޓްގާޑް ގުޅިގެން ކުރިއަށްގެންދާ މިއަހަރުގެ "ދޯސްތީ އެކްސަޒައިސް" އިފްތިތާޙުކޮށްދެއްވުމަށްފަހު ދެއްކެވި ވާހަކަފުޅުގައެވެ.
"މެރިޓައިމް ޓެރަރިޒަމް، ޓްރާންސްނޭޝަނަލް ގްރާންޓްސް، އެކްސްޓްރީމް ވެދަރއަކީ އިންޑިއާ ކަނޑުގެ ސަލާމަތަށްޓަކާ އަޅުގަނޑުމެން ވިސްނަންޖެހޭ ކަންކަން. ސަލާމަތްތެރިކަން ދެމެހެއްޓުމަށް ސަރަޙައްދީ ޤައުމުތަކުގެ އެހީތެރިކަން ބޭނުންވާނެ. ކަނޑުގެ ސަލާމަތީ ކަންކަން ބެލެހެއްޓުމަށް ރާއްޖޭގެ ދިފާޢީ ބާރާއި ކޯސްޓްގާޑް ވަރުގަދަކުރުމަށް ރައީސް ޚާއްސަ އިސްކަމެއް ދެއްވާ."
ޣައްސާން ވިދާޅުވިއެވެ.
މިއަދު ފެށިގެންދިޔަ "ޓްރައިލެޓެރަލް ޖޮއިންޓް އެކްސަސައިޒް ދޯސްތީ - 16" އަކީ އެމްއެންޑީއެފް ކޯސްޓްގާޑާއި އިންޑިއާ ކޯސްޓްގާޑް އަދި ސްރީލަންކާގެ ކޯސްޓްގާޑު ގުޅިގެން ހިންގާ ހަރަކާތެކެވެ.
މިއީ ފެބުރުވަރީ 22 އިން 25 ވަނަ ދުވަހުގެ ނިޔަލަށް ކުރިއަށްގެންދިޔުމަށް ހަމަޖެހިފައިވާ އެކްސަސައިޒެކެވެ. މި އެކްސަސައިޒް ގެ ތެރެއިން ރާއްޖެއާއި އިންޑިއާ އަދި ސްރީލަންކާގެ ކޯސްޓްގާޑުގެ ދެމެދުގައި އޮންނަ ގުޅުން އިތުރަށް ހަރުދަނާ ކުރުމާއި ކަނޑުމަތީގައި ދިމާވާ ހާދިސާތަކުގައި ތިން ޤައުމުގެ ކޯސްޓްގާޑު ގުޅިގެން ހަރަކާތްތެރިވާނެ ގޮތްތައް ދެނެގަތުމަށް ވަނީ ހަމަޖެހިފައެވެ.
އެކްސަސައިޒް ދޯސްތީ އެންމެ ފުރަތަމަ 1991 ވަނަ އަހަރު ފެށީ ރާއްޖެއާއި އިންޑިއާ ގުޅިގެން ކުރިއަށް ގެންދާ އަސްކަރީ ހަރަކާތެެއްގެ ގޮތުގައެވެ. މިހަރަކާތާ ލަންކާ ގުޅުނީ 2012 ވަނަ އަހަރު އެވެ.
މި އެކްސަސައިޒްގެ މަގްސަދު ތަކުގެ ތެރޭގައި އިންޑިއާ ކަނޑުގައި ހިނގާ ހާދިސާތަކުގައި ސަލާމަތްތެރިކަން ބޭނުންވާ މީހުން ހޯދައި އެމީހުންނަށް ބޭނުންވާ އަވަސް ފަރުވާ ދިނުމާއި، ކަނޑުފޭރުމުގެ ހާދިސާތަކުގައި ރައްކާތެރިކަން ދިނުމާއި ކަނޑުމަތީގައި އިންސާނީ އެހީ ފޯރުކޮށްދިނުން ހިމެނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
