ރަޝިއާ ޔުކްރެއިން ހަނގުރާމައަށް ތިން އަހަރު: ލިބުނު ގެއްލުން ޓްރިލިއަނުން ގުނާލެވޭ!

ބަލަންތިއްބައި ރަޝިއާ ޔުކްރެއިން ހަނގުރާމައަށް ތިން އަހަަރުވެގެން ދިޔައީއެވެ. ސްވިޒަރލެންޑްގައި ނިމިގެންދިޔަ ވަރލްޑް އިކޮނޮމިކް ފޯރަމްގައި އެންމެބޮޑަށް ވާހަކަދެކެވިގެންދިޔައީ ރަޝިއާ ޔުކްރެއިން ހަނގުރާމައާ ގުޅޭގޮތުންނެވެ. މިހާތަނަށް ލިބުނު ގެއްލުންތަކާއި، ލިބެމުންދާ ގެއްލުންތަކާއި، ދެން ކުރިއަށް ވާންއޮތް ގޮތެވެ. ފޯރަމްގައި އެންމެބޮޑަށް ވާހަކަދެކެވުނީ ރަޝިއާ ޔުކްރެއިން ހަނގުރާމަ ހުއްޓާލުމާ ގުޅޭގޮތުންނެވެ. އެކަމަށްޓަކައި ޤައުމުތައް ގުޅިގެން ކުރަންޖެހޭ މަސައްކަތްތައް އަވަސްކުރުމުގެ މުހިއްމުކަމާ ގުޅޭގޮތުން ވަނީ މުހިއްމު ވާހަކަތަކެއް ދެކެވިފައެވެ. އަދި ދެ ޤައުމުންވެސް ގޮތްދޫކޮށް ހަނގުރާމަ ހުއްޓާލުމަށް މި ފޯރަމްގެ ތެރެއިން ވަނީ ގޮވާލާފައެވެ.

ވަރލްޑް އިކޮނޮމިކް ފޯރަމްގައި ރަޝިއާ ޔުކްރެއިން ހަނގުރާމައިގެ މުހިއްމު އަދަދުތަކެއް ހާމަވެގެންދިޔައިރު، މި ހަނގުރާމަ ވެގެންދިޔައީ ކުރިން ހީކުރިގޮތަށް ގެއްލުން ބޮޑު ހަނގުރާމައަށެވެ. ހަނގުރާމައަށް 3 އަހަރު ފުރިގެންދިޔައިރު، މި ހަނގުރާމައިގެ ސަބަބުން މުޅި ދުނިޔޭގެ އިގްތިސާދަށް ލިބުނު ގެއްލުންތައް 3 ޓްރިލިއަން ޑޮލަރަށްވުރެ ބޮޑެވެ. ހަނގުރާމައިން ލިބުނު ގެއްލުންތަކުން އަރައިގަތުމަށް އެންމެ މަދުވެގެންވެސް ދެ ޤައުމުން 500 ބިލިއަނަށްވުރެ ގިނަ ޑޮލަރު ހޭދަވާނޭކަމަށް ވަނީ ލަފާކޮށްފައެވެ.

ރަޝިއާ ޔުކްރެއިން ހަނގުރާމައިގެ ސަބަބުން ބައިނަލްއަޤްވާމީ ބާޒާރުގައި ކާބޯތަކެތީގެ އަގުތައްވަނީ އިންތިހާއަށް އުފުލެން ފަށާފައެވެ. ދެ ޤައުމުގެ ދެމެދުގައި ހަނގުރާމަ ފެށުމާއެކު އދގެ ކާބޯތަކެއްޗާބެހޭ އިދާރާއިން ވަނީ ދުނިޔެ ކާބޯތަކެއްޗަށް ޖެހިދާނެކަމުގެ އިންޒާރު ދެއްވާފައެވެ. އެގޮތުން މިކަމުގައި އެންމެބޮޑު ދަތިކަމެއް ފޯރާނީ އެފްރިކާގެ ޤައުމުތަކަށްކަމަށް އދ ގެ ކާބޯތަކެއްޗާ ބެހޭ ޖަމިއްޔާއިން ވަނީ ބުނެފައެވެ.

ޔުކްރެއިނަށް ބަލާއިރު، އެޤައުމަކީ ދުނިޔޭގެ ނިސްބަތުންވެސް އެންމެ ގިނަ އަދަދަކަށް ގޮދަންފުށް އެކްސްޕޯޓްކުރާ ޤައުމެވެ. މީގެ އިތުރުން ޔުކްރެއިނަކި އެންމެ ގިނައިން ކައްކާތެއޮ އެކްސްޕޯޓްކުރާ ޤައުމަކީވެސް ޔުކްރެއިނެވެ. ހަނގުރާމައިގެ ސަބަބުން ޔުކްރެއިންގެ ބަނދަރުތައް ބަންދުވެފައިވާއިރު، މިތަކެތީގެ އަގުތައް ވަނީ ޔޫރަޕްގެ އިތުރުން ބައިނަލްއަޤްވާމީ ބާޒާރުގައިވެސް މީގެކުރިން މައްޗަށް ނުދާހާ ވަރަށް މައްޗަށްގޮސްފައެވެ. އދ ގެ ކަމާބެހޭ ޖަމިއްޔާއިން ބުނީ ރަޝިއާ ޔުކްރެއިން ހަނގުރާމައާ ގުޅިގެން ކާބޯތަކެތީގެ އަގުތައް 12 އިންސައްތައަށް އުފުލިފައިވާއިރު، 1990 އަހަރުގެ ފަހުން މިވީހާތަނަށް މި މިންވަރަށް ކާބޯތަކެތީގެ އަގުތައް މައްޗަށްގޮސްފައެއް ނުވެއެވެ.

ރަޝިއާއަށް ބަލާއިރު އެޤައުމަކީ އެންމެގިނައިން ހަކަތައިގެ ގޮތުގައިބޭނުންކުރާ ތެލާއި، ޕެޓްރޯލިއަމްގެ ބާވަތްތައް އެކްސްޕޯޓްކުރާ އެންމެ ބޮޑު އެއް މާކެޓެވެ. ރަޝިއާއިން ޔުކްރެއިނަށް ހަމަލާދޭން ފެށުމާއި ގުޅިގެން އެމެރިކާ އާއި ޔޫރަޕުން ވަނީ ރަޝިއާ އާ ދެކޮޅަށް ދަތިކުރުމުގެ ފިޔަވަޅުތައް އަޅައި ތެއޮގަތުން މުޅިންހެން ހުއްޓާލާފައެވެ.

ރަޝިއާއިން ޔުކްރެއިނަށް ދެމުންދާ ހަމަލާތަކުގައި ޔުކްރެއިނުން އެކަނިވެސް މިހާތަނަށް 12،500 އަށްވުރެ ގިނަ މީހުންގެ ފުރާނަ ގެއްލިފައިވާއިރު، 2 މިލިއަނަށްވުރެ ގިނަ މީހުންގެ ގެދޮރުވަނީ ގެއްލިފައެވެ. ހަނގުރާމައިގައި މިހާތަށް ޔުކްރެއިނުން އެކަނިވެސް  45،000 ހާހަށްވުރެ ގިނަ ސިފައިން މަރުވެފައިވާއިރު، 390,000 ހާހަށްވުރެ ގިނަ ސިފައިން ވަނީ ޒަހަމްވެފައެވެ.

މި ހަނގުރާމައިގައި ރަޝިއާގެ 172،000 ސިފައިން މަރުވެފައިވާއިރު، 783،000 ސިފައިން ވަނީ ޒަހަމްވެފައެވެ. ރަޝިއާގެ 9,859 ޓޭންކަރު ހަލާކުވެފައިވާއިރު، 20.549 މިލިޓަރީ ވެހިކަލް ވަނީ ހަލާކުވެފައެވެ. މީގެ އިތުރުން 50 ހަށްވުރެ ގިނަ އަސްކަރީ ވައިގެ އުޅަނދުތަކާއި 28 ކަނޑުއުޅަނދު ވަނީ ހަލާކުވެފައެވެ. މީގެ ތެރޭގައި ސަބްމެރިނާއި، މަނަވަރު ހިމެނެއެވެ.

ހަނގުރާމައަށް ތިން އަހަރުވެގެންދިޔައިރު ރަޝިއާއިން ވަނީ ޔުކްރެއިންގެ 28 އިންސައްތަ އެޤައުމުގެ ބާރުގެ ދަށަށް ގެންސްފައެވެ. މީގެ ތެރެއިން ރަޝިއާގެ ބާރުގެ ދަށަށް ގެނައި ގިނަ އަވަށްތައް މިސައިލާއި ޑްރޯން ހަމަލާތަކުގެ ސަބަބުން ސުންނާފަތިވެފައިވާކަމަށް ބައިނަލްއަޤްވާމީ މީޑިއާތަކުން ރިޕޯޓްކުރެއެވެ.