ބޯކޮށް ވާރޭވެހި މެލޭޝިއާގެ ބައެއް އަވަށްތަކަށް ބޮޑެތި ގެއްލުންތަކެއް ލިބިއްޖެ

މެލޭޝިޔާގެ ބައެއް ސަރަޙައްދުތަކަށް ހުއްޓުމެއްނެތި ބޯކޮށް ވާރޭވެހުމާ ގުޅިގެން ފެންބޮޑުވެ ބޮޑެތި ގެއްލުންތަކެއް ލިބިއްޖެއެވެ.

އެޤައުމުގެ ބައެއް މީޑިއާތަކުން ބުނެފައިވަނީ، ފެންބޮޑުވުމުގެ އަސަރު ހަތް ސްޓޭޓެއްގެ އެކި ސަރައްދުތަކަށް ކޮށް، 12،000 މީހުން ގެ ގެދޮރު ގެއްލިފައިވާކަމަށެވެ.

އެ ޤައުމަށް ކުރަމުންދާ ވިއްސާރައިގެ އަސަރު އެންމެ ބޮޑަށް ކުރަމުން ދަނީ ކެޑާ، ކެލަންތާން، ޕިނާންގް، ޕޭރާކް، ޕަރްލިސް، ތެރަންގާނޫ އަދި ސެލަންގޯ ސްޓޭޓްގެ ސަރަޙައްދުތަކަށެވެ.

މި ވިއްސާރައިގާ އެންމެ ބޮޑަށް ފެންބޮޑުވެފައި ވަނީ ތައިލެންޑްގެ ސަރަޙައްދީ ރޮނގު ކައިރީގައި އޮތް ކެލަންތާނުގެ ހިސާބުތަކުގައެވެ. އެ ސަރަޙައްދުގައި ފެންބޮޑުވުމުގެ ސަބަބުން އަސަރު ކޮށްފައިވާ މީހުންގެ އަދަދު 8,228އަށް އަރާ ކަމުގައި އެ ޤައުމުގެ ކާރިސާތަކާ ބެހޭ އިދާރާއިން ހާމަކުރިއެވެ.

ނަމަވެސް، ފެންބޮޑުވުމާ ގުޅިގެން އެއްވެސް މީހެއްގެ ފުރާނަ ގެއްލުނު ކަމުގެ ރިޕޯޓެއް ކޮށްފައެއް ނެތެވެ. މެލޭޝިޔާގެ ސަރަހައްދުތަކަށް ކުރަމުންދާ ބޯ ވިއްސާރައާ ގުޅިގެން ފެންބޮޑުވެ ބިންގަނޑު ކެނޑުމުގެ ހާދިސާތަކެއް ވެސް ހިނގާފައިވެއެވެ.

މެލޭޝިޔާގެ ވިއްސާރަ މޫސުން ޢާންމުކޮށް ދެމިގެން ދަނީ އޮކްޓޫބަރު މަހުން ފެށިގެން މާރިޗު މަހުުގެ ނިޔަލަށެވެ. އަދި، މި މޫސުމުގައި އެ ޤައުމުގެ ގިނަ ސަރަޙައްދުތަކަށް ބޯކޮށް ވާރޭވެހޭއިރު، ފެންބޮޑުވުމަކީ ކޮންމެ އަހަރަކު ވެސް ކުރިމަތިވާ ކަމެކެވެ. އޭގެ ސަބަބުން ކޮންމެ އަހަރަކު ވެސް އެތަކެއް ހާސް ބަޔަކަށް ރައްކާތެރި ހިސާބުތަކަށް ބަދަލުވާން މަޖުބޫރުވެއެވެ.