ރައްޔިތުންގެ މަޖިލީހުގެ ރައީސްއަށް އާޒިމާ ފާޑުވިދާޅުވެއްޖެ

ސްވެފައިވާ ރައްޔިތުންގެ މަޖިލީހުގެ ރައީސް ކަމުގެ މަގާމަށް އެހެންފަހަރުތަކުވެސް ކަންކަން ކުރާ އުސޫލުން ގާސިމް އިބްރާހީމް އައްޔަނުކުރުމުން އޭނަ ޝަރުތު ހަމަވޭތޯ ރައީސުލް ޖުމްހޫރިއްޔާގެ އޮފީހުގެ ލީގަލް އެފެއަޒް މިނިސްޓަރު އަދި ކުރީގެ އެޓާނީ ޖެނެރަލް އާޒިމާ ޝުކޫރު ސުވާލު އުފައްދަވައިފި އެވެ.

އާޒިމާ މިކަމާ ސުވާލު އުފެއްދެވީ އޭނާ ރޭ ކުރެއްވި ފޭސްބުކް ޕޯސްޓެއްގަ އެވެ.

ފޭސްބުކް ޕޯސްޓްގައި އާޒިމާ ވިދާޅުވީ، ރައީސުލް ޖުމްހޫރިއްޔާ އަށާއި ރައީސުލްޖުމްހޫރިއްޔާގެ ނައިބަށް އޭނާގެ މަގާމުގެ މަސްއޫލިއްޔަތުތައް އަދާ ނުކުރެއްވޭ ފަދަ ހާލަތެއް މެދުވެރިވެއްޖެ ނަމަ އެ މަގާމުގެ ޒިންމާތައް ވަގުތީ ގޮތުން ހަވާލުވެވަޑައިގަންނަވަން ޖެހިވަޑައިގަންނަވާ ފަރާތަކީ ރައްޔިތުންގެ މަޖިލީހުގެ ރައީސް ކަމަށެވެ.

އެހެންކަމުން ޤާނޫން އަސާސީއިން ސާފުކޮން އެނގެން އޮންނަގޮތުގައި ރައީސުލް ޖުމުހޫރިއްޔާގެ ޒިންމާތަކާ ވަގުތީ ގޮތުން ހަވާލުވެވަޑައިގަންނަވާ ބޭފުޅަކީ ވެސް ރައީސުލް ޖުމުހޫރިއްޔާގެ ޝަރުތުތައް ހަމަވާބޭފުޅާކަށް ވާންޖެހޭ ކަމަށް އާޒިމާގެ ޕޯސްޓުގައި ވިދާޅުވެއެވެ.

އަދި ގާސިމް އިބްރާހީމް އަކީ އުމުރުގެ ގޮތުން 65 އަހަރުވެފައިވާ މީހަކަށްވާތީ ގާސިމް އަށް ރައީސުލް ޖުމްހޫރިއްޔާގެ ޒިންމާ ތަކާއި މަސްއޫލިއްޔަތުތައް ވަގުތީ ގޮތުން ވެސް އަދައެއް ނުކުރެއްވޭނެ ކަމަށެވެ.

"އެހެން ކަމުން މިދިޔަ ބުރާސްފަތި ދުވަހުގެ ރޭ މަޖިލީހުގެ ރައީސް ކަމަށް އިންތިޚާބު ކުރެވުނު ބޭފުޅާގެ އުމުރުން 65 އަހަރު ފުރިފައިވާތީ، އޭނާ އަށް ރައީސުލް ޖުމްހޫރިއްޔާގެ ޒިންމާ ތަކާއި މަސްއޫލިއްޔަތުތައް ވަގުތީ ގޮތުން ވެސް އަދައެއް ނުކުރެއްވޭނެ." އާޒިމާގެ ޕޯސްޓުގައި ވިދާޅުވެފައިވެ އެވެ.

މީގެއިތުރުން ދައުލަތުގެ ތިންބާރުގެ ތެރެއިން ރައީސުލްޖުމްހޫރިއްޔާ ފިޔަވައި އިންތިޚާބީ މަގާމެއްގައި ހުންނެވި ބޭފުޅަކީ މަޖިލީހުގެ ރައީސް ކަމަށްވާތީ ރައީސުލްޖުމްހޫރިއްޔާގެ މަސްއޫލިއްޔަތު ތަކާ ވަގުތީ ގޮތުން ހަވާލުވެވަޑައިގަންނަވަން ޖެހިވަޑައިގަންނަވާ ފަރާތަކީ އެއީ ކަމަށް އާޒިމާ ސިފަކުރެއްވިއެވެ.

އެހެންކަމުން ރައީސުލްޖުމްހޫރިއްޔާ ގެ މަސްއޫލިއްޔަތު ތަކާ ހަވާލުވަޑައިގެންނެވުމުގެ ޝަރުތުތައް މަޖިލީހުގެ ރައީސްގެ ކިބައިގައި ނެތިގެން، މަޖިލީހުގެ ނައިބު ރައީސް އެ މަސްއޫލިއްޔަތު ތަކާ ހަވާލުވެވަޑައިގަންނަވާ ނަމަ މަޖިލީހުގެ ނައިބު ރައީސް މަޖިލީހުގެ ރައީސަށް ވުރެ ސީނިއަރ ވަނީތޯ ވެސް އެއީ ބަހުސް ކުރެވޭ މައްސަލައެއް ކަމަށް އާޒިމާ ވިދާޅުވިއެވެ.

އަދި މަޖިލީހުގެ ރައީސް ހުންނަވަނިކޮށް ނައިބު ރައީސަށް، ރައީސްގެ ޒިންމާތަކާ ހަވާލުވެވަޑައިގެންނެވިދާނެތޯ ވެސް އާޒިމާ ވަނީ ސުވާލު އުފައްދަވާފަ އެވެ.

މި މައްސަލައިގެ ބައެއް ސުވާލު ތަކަކީ ގާނޫނު އަސާސީން ޖަވާބު ނުލިބޭ ސުވާލުތަކެއް ކަމަށާއި މަޖިލީހުގެ ކައުންސެލް ޖެނެރަލް މި ކަމުގައި މަޖިލީހަށް ލަފައެއް ދެއްވައިގެން ނަމަވެސް ގޮތެއް ނިންމަން ޖެހޭ ކަމަށް ވިދާޅުވިއެވެ.

ގާނޫނު އަސާސީގައި ބުނާ ވަކި ހާލަތު ތަކެއް މެދުވެރިވެއްޖެ ނަމަ ރައީސުލްޖުމުހޫރިއްޔާގެ މަސްއޫލިއްޔަތު ތަކާ ވަގުތީ ގޮތުން ހަވާލުވެވަޑައިގަންނަވަން ޖެހިވަޑައިގަންނަވާ ބޭފުޅެކީ ރައްޔިތުންގެ މަޖިލީހުގެ ރައީސްއެވެ.

ހަމައެހެންމެ ގާނޫނު އަސާސީގައި ބުނާ ރައީސުލް ޖުމްހޫރިއްޔާގެ ޝަރުތުތައް، ވަގުތީ ގޮތުން ރައީސުލް ޖުމްހޫރިއްޔާގެ މަސްއޫލިއްޔަތު ތަކާ ހަވާލުވެވަޑައިގަންނަވާ ބޭފުޅެއްގެ ހުރުން ގާނޫނު އަސާސީން ލާޒިމް ކުރެއެވެ.

މަޖްލީހުގެ ރައީސްކަމަށް ފަހުން އިންތިހާބްވި ގާސިމް އިބްރާހިމް އަކީ ރައީސުލް ޖުމްހޫރިއްޔާގެ ޝަރުތުތައް ހަމަނުވާ ބޭފުޅެއްކަމުން އެބޭފުޅާ މަޖިލީހުގެ ރައީސް ކަމަށް އިންތިޚާބު ކުރެވިދާނެތޯ ބައެއް ފަރާތްތަކުން އަންނަނީ ސުވާލު އުފައްދަމުންނެވެ.