ސައުދީން އަހަރަކު އެތައް ފަހަރަކު އުމްރާވެވޭ ގޮތަށް މަލްޓިޕްލް އެންޓްރީ ވިސާ ދޫކުރަން ފަށައިފި

ސައުދީ އަރަބިއްޔާއިން އަހަރެއްގެ ތެރޭގައި އެތައް ފަހަރަކު އުމްރާގެ އަޅުކަން އަދާކުރުމުގެ ފުރުސަތު ފަހިކޮށްދިނުމުގެ ގޮތުން، އެއް އަހަރު ދުވަހުގެ މުއްދަތަށް ބޭނުންކުރެވޭ "މަލްޓިޕްލް އެންޓްރީ އުމްރާ ވިސާ" މިދިޔަ އާދީއްތަ ދުވަހުން ފެށިގެން ދޫކުރަން ފަށައިފިއެވެ.

މި އައު ނިޒާމުގެ ދަށުން ދޫކުރާ ވިސާގެ މުއްދަތަކީ 365 ދުވަހެވެ. މި މުއްދަތުގެ ތެރޭގައި ކޮންމެ ފަހަރަކު އައު ވިސާއަކަށް އެދުމުގެ ބަދަލުގައި، އެއް ވިސާއެއް ބޭނުންކޮށްގެން އެތައް ފަހަރަކު ސައުދީއަށް އެތެރެވުމުގެ ފުރުސަތު ލިބިގެންދާނެއެވެ.

ވިސާ ބޭނުންކުރެވޭނެ އުސޫލު

މި ވިސާގެ ދަށުން އަހަރެއްގެ ތެރޭގައި ޖުމްލަ 90 ދުވަހު ސައުދީގައި މަޑުކުރެވޭނެއެވެ. ކޮންމެ ދަތުރަކަށްފަހު ސައުދީން ފުރައިގެން ދިއުމުން، ބާކީ އޮތް ދުވަހުގެ އަދަދު އަމިއްލައަށް އަދާހަމަވެގެންދާނެއެވެ. މިސާލަކަށް، ފުރަތަމަ ދަތުރުގައި 20 ދުވަސް ހޭދަކޮށްފިނަމަ، ބާކީ ހުރި ދަތުރުތަކަށް ލިބޭނީ 70 ދުވަހެވެ.

ކޮންމެ ދަތުރަކަށް އުމްރާ ހުއްދަ ބޭނުންވާނެ

މަލްޓިޕްލް އެންޓްރީ ވިސާ އޮތް ނަމަވެސް، ކޮންމެ ދަތުރެއް ކުރުމުގެ ކުރިން އަންނަނިވި ކަންކަން ފުރިހަމަކުރަން ޖެހެއެވެ:

- ހުއްދަ ދެވިފައިވާ އުމްރާ ސާވިސް ޕެކޭޖެއް އިޚްތިޔާރުކުރުން.

- 'ނުސުކް' އެޕްލިކޭޝަން މެދުވެރިކޮށް އުމްރާ ހުއްދަ ހޯދުން.

- ދަތުރުކުރުމުގެ ކުރިން ފްލައިޓް ޓިކެޓް ބުކްކުރުން.

ކޮންމެ ފަހަރަކު ސައުދީން ފުރައިގެން ދިއުމުން ވިސާ ވަގުތީގޮތުން މެދުކެނޑޭނެއެވެ. އަދި އަލުން ވިސާ ހަރަކާތްތެރިވާނީ ދެން އަންނަ ދަތުރަކަށް އައު ސާވިސް ޕެކޭޖެއް ގަނެ، ބޭނުންވާ ހުއްދަތައް ހޯދުމުންނެވެ.

ޙައްޖު މޫސުމުގައި ބޭނުންނުކުރެވޭނެ

ސައުދީ މިނިސްޓްރީން ހާމަކޮށްފައިވާ ގޮތުގައި މި ވިސާ ޙައްޖު މޫސުމުގައި ބޭނުމެއް ނުކުރެވޭނެއެވެ. ވުމާއެކު، 1 ޛުލްޤަޢިދާ އިން ފެށިގެން 13 ޛުލްޙިއްޖާގެ ނިޔަލަށް މި ވިސާގައި ސައުދީގައި މަޑުކުރުމަކީ މަނާކަމެކެވެ.

މި އައު ލުއިތަކަކީ އުމްރާވެރިންނަށް ދަތުރުފަތުރުގެ ކަންކަން ފަސޭހަކޮށްދިނުމަށާއި، ސައުދީގެ ގަވާއިދުތަކުގެ ތެރެއިން އަހަރުގެ އެކި ދުވަސްވަރު އުމްރާގެ އަޅުކަން އަދާކުރުމުގެ ފުރުސަތު އިތުރުކުރުމަށް އެގައުމުން ކުރަމުންދާ މަސައްކަތުގެ ބައެކެވެ.