ދިވެހިންގެ "މަސްދަޅު ހަދިޔާ" ކޮންޓެއިނާ ހަމަވެއްޖެ
އިންޓަނޭޝަނަލް އެއިޑް ކެމްޕެއިން (އައި އޭ ސީ )ގެ ފަރާތުން ސީރިއާގައި ކުރަމުންދާ ހަނގުރާމައިގައި ހާލުގައި ޖެހިފައިވާ މުސްލިމު އަޚުންނާއި އުޚްތުންނަށް މި ފިނި މޫސުމުގައި އެހީތެރިކަން ފޯރުކޮށްދިނުމުގެ ގޮތުން "މަސްދަޅު ހަދިޔާ" ގެ ނަމުގައި ހިންގި ހަރަކާތަށް ބޭނުންވާ މިންވަރަށް މަސްދަޅު ލިބިފައިވާކަމަށް މި ހަރަކާތުގެ އޮފިޝަލުން ވިދާޅުވެއްޖެއެވެ.
28 އޮކްޓޯބަރު 2019 ގައި ފެއްޓި މި ކެމްޕެއިންގައި މަދުވެގެން 1 ކޮންޓެއިނަރުގެ މަސްދަޅު ހަމަކުރުމަށް ނިންމާފައިވެއެވެ.
25 ޑިސެމްބަރ 2019 ގެ ނިޔަލަށް، ޖުމްލަ 1800 ކޭސް މަސްދަޅު ދިވެހި އަޚުންނާއި އުޚްތުންގެ ފަރާތުން ލިބިފައިވާއިރު މިއީ 86،400 މަސްދަޅެވެ. ފައިސާގެ ގޮތުން އަގު ކުރާނަމަ 1،305،000.00 ރ ( އެއް މިލިއަން ތިން ލައްކަ ފަސްހާސް ރުފިޔާ ) އެވެ. މި ހަރަކާތުގެ ނަމުގައި ޚާއްސަ ލޭބަލް އަދި ލޯގޯ ހިމަނައިގެން ބަންދުކޮށްފައިވާ މި މަސްދަޅުތައް ފޮށީގައި ބަންދުކޮށް ހެދުމުގެ އަމަލީ މަސައްކަތުގައި އައިއޭސީ ގެ ޗެއާ ޕާސަން އަލްފާޟިލް އަޙްމަދު އިޤްބާލް އާއި ސެކެރެޓަރީ ޖެނެރަލް އަލްފާޟިލް އިބްރާހިމް ޝާޒް ވަނީ ބައިވެރިވެފައެވެ.
އައިއޭސީގެ އޮފިޝަލުން އިތުރަށް މައުލޫމާތު ދެއްވި ގޮތުގައި މި މަސްދަޅު ކޮންޓެއިނަރ ހާލުގައި ޖެހިފައިވާ ފަރާތްތަކަށް ފޯރުކޮށްދެވޭނެ ކަމަށް ލަފާކުރެވެނީ 2020 ވަނަ އަހަރުގެ ފެބްރުއަރީ މަހުގެ މެދުތެރޭގައި ނުވަތަ ފެބްރުއަރީ މަހުގެ ފަހުކޮޅުގައެވެ. މި ފުރުޞަތުގައި އައިއޭސީގެ ފަރާތުން މުސްލިމް އަޚުންނާއި އުޚްތުންނަށް އެކި ގޮތްގޮތުން އެހީތެރިވުމަށް ހިންގާ މިފަދަ ހަރަކާތްތަކަށް އެހީތެރިވެ ވަޑައިގަންނަވާ ހުރިހާ ފަރާތްތަކަށް ވަރަށް އިޚްލާސްތެރިކަމާއެކު ޝުކުރެއްދަންނަވާކަމަށް އޮފިޝަލުން ވިދާޅުވިއެވެ.
ހާލުގައި ޖެހިފައިވާ ފަރާތްތަކުގެ ތެރެއިން ސީރިއާގެ ރައްޔިތުންނަށް "މަސްދަޅު ހަދިޔާ" ހަރަކާތަށް ބޭނުންވާ މަސްދަޅު ލިބިފައިވީނަމަވެސް ފިނި މޫސުމުގެ މި ކެމްޕޭންގެ ދަށުން ފަލަސްތީން، ޔަމަން، ރޮހިންޔާ، ބަންގްލަދޭޝް އަދި ސީރިއާއަށް އެހީ ދިނުމުގެ ފުރުޞަތު 2020 ވަނަ އަހަރުގެ ޖަނަވަރީ މަހުގެ 15 ވަނަ ދުވަހާ ހަމައަށްވަނީ ހުޅުވާލެވިފައެވެ. މި ގައުމުތަކަށް އެހީތެރިކަން ފޯރުކޮށްދިނުމަށް ހަމަޖެހިފައިވަނީ ތިރީގައިވާ ބީއެމްއެލް އިސްލާމިކް އެކައުންޓް ތަކަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
