ސްޓެލްކޯގެ 76 މުވައްޒަފަކަށް ޕޮލިޓެކްނިކް މެދުވެރިކޮށް ފަންނީ ކޯސްތަކެއް ފަށައިފި
ލިޔުންތެރިޔާ
ސްޓާފް ރައިޓަރ
މުވައްޒަފުންގެ ފަންނީ ހުނަރު ތަރައްޤީކުރުމުގެ ގޮތުން ސްޓެލްކޯއިން މޯލްޑިވްސް ޕޮލިޓެކްނިކާ ގުޅިގެން ސެޓްފިކެޓް ލެވެލް 3 ގެ ހަތަރު ކޯހެއް މިއަދު ފަށައިފިއެވެ.
މި ކޯސްތަކުގައި ބައިވެރިވެފައި ވަނީ ސްޓެލްކޯގެ އެކި ޑިޕާޓްމަންޓުތަކުންނާއި އަތޮޅުތެރޭގެ އިންޖީނުގެތަކުން ޖުމްލަ 76 މުވައްޒަފުންނެވެ. މި މުވައްޒަފުން ބައިވެރިވަނީ މޯލްޑިވްސް ޕޮލިޓެކްނިކްގެ އޮގަސްޓް 2026 އިންޓޭކުގައެވެ.
ސްޓެލްކޯއިން ބުނީ ފެށި ހަތަރު ކޯހަކީ އިލެކްޓްރީޝަން ކޯހާއި އެއަރކޮންޑިޝަނިންގ އެންޑް ރެފްރިޖަރޭޝަން ކޯހާއި ވެލްޑިންގ އެންޑް މެޓީރިއަލް ފެބްރިކޭޝަން ކޯހުގެ އިތުރުން އޮޓޯމޯޓިވް މެއިންޓެނެންސް ކޯހެވެ. މި ކޯސްތަކުގެ ބޭނުމަކީ މުވައްޒަފުންނަށް ބޭނުންވާ ފަންނީ ޤާބިލުކަން އަށަގަންނުވައި ޤައުމީ ފެންވަރުގައި ބަލައިގަނެވޭ ސަނަދެއް ހޯދައިދިނުމެވެ.
ކޯސް ފެށުމުގެ ރަސްމިއްޔާތުގައި ސްޓެލްކޯގެ މެނޭޖިންގ ޑިރެކްޓަރު ޑރ. ޢަލީ އަޒުވަރު ވިދާޅުވީ "އަޅުގަނޑުމެން މި އިންވެސްޓް ކުރަނީ ސެޓްފިކެޓަކަށް ނޫން. އަޅުގަނޑުމެން މި އިންވެސްޓްކުރަނީ މުވައްޒަފުންގެ ވަގުތަށް މުވައްޒަފުންގެ ހުނަރަށް ތިބޭފުޅުންގެ ކެޕޭސިޓީ ބިލްޑްކުރަން" ކަމަށެވެ. އެ މަނިކުފާނު އިތުރަށް ވިދާޅުވީ މުވައްޒަފުންގެ ކުރިއެރުމަކީ ކުންފުންޏަށާއި ޚިދުމަތް ހޯދާ ޢާންމުންނަށް އަދި މުޅި ރާއްޖެއަށް ލިބިގެންދާ ކުރިއެރުމެއް ކަމަށެވެ.
މޯލްޑިވްސް ޕޮލިޓެކްނިކްގެ ސީއީއޯ ޒޫޝާން ކަމާލުއްދީން ވިދާޅުވީ "އަޅުގަނޑު ޕޮލިޓެކްނިކާ ޙަވާލުވި ދުވަހުން ފެށިގެން މިއަދާ ހަމައަށް އަޅުގަނޑަށް ފާހަގަކޮށްލެވުނު ކަމަކީ އިންޑަސްޓްރީއާ އަޅުގަނޑުމެންނާ ދޭތެރޭގަ މި އޮންނަ ގެޕް" ކަމަށާއި އެ ފަރަގު ނައްތައިލެވޭނެ ގޮތެއް ހޯދަން ޖެހޭ ކަމަށެވެ. ޒޫޝާން ވިދާޅުވީ ސްޓެލްކޯއިން ނެންގެވި އިސްނެންގެވުމަކީ ޕޮލިޓެކްނިކްގެ މެނޭޖްމަންޓާއި ހުރިހާ މުވައްޒަފުން އުފާކުރާ ކަމެއް ކަމަށެވެ. މި ރަސްމިއްޔާތުގައި ސްޓެލްކޯއާއި މޯލްޑިވްސް ޕޮލިޓެކްނިކްގެ އިސްވެރިން ބައިވެރިވެވަޑައިގެންނެވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
