ސާރވިސް ޗާޖާއި ގުޅިގެން އަލީ ވަހީދު ވިދާޅުވި ބަސްފުޅަށް ބޮޑެތި ފާޑުކިޔުންތަކެއް!
ދިވެހިރާއްޖޭގެ ރިސޯޓްތަކުގައި މަސައްކަތްކުރާ މުވައްޒަފުންނަށް އެކަށީގެންވާ ސާރވިސް ޗާޖެއް ލިބޭކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވި ބަސްފުޅަށް ގިނަބަޔަކު ފާޑުކިޔަން ފަށައިފިއެވެ.
އަލީ ވަހީދު މިހެން ވިދާޅުވުމާއި އެކު މީސް މީޑިޔާގައި ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާއި އާންމުންގެ ތެރެއިން ގިނަބަޔަކު ދަނީ މިނިސްޓަރަށް ފާޑުކިޔަމުންނެވެ.
އެގޮތުން މޫސާ މަޖީދު ކިޔާ ފަރާތަކުން ވަނީ މިނިސްޓަރގެ ބޮޑު މުސާރަ ދޫކޮށްލެއްވުމަށްފަހު ރިސޯޓެއްގެ ވެއިޓަރ ނުވަތަ ރޫމްބޯއީގެ މަގާމު އެންމެ ދުވަހަކު ނަމަވެސް އަދާކުރުމަށް އެދޭކަމަށް ބުނެފައެވެ. އެއަށްފަހު ސާވިސް ޗާޖް ދެނީ ރަނގަޅަށްތޯ އިންސާފު ކުރުމަށް މޫސާ މަޖީދު ވަނީ އެދިފައެވެ.
މީގެ އިތުރުން އެހެން ފަރާތަކުން ވަނީ އަލީ ވަހީދު ޗުއްޓީ ހޭދަކޮށްލައްވަން ވަޑައިގަންނަވާ އަގުބޮޑު ރިސޯޓްތަކުން ރަނގަޅު ސާވިސް ޗާޖެއްދިނަސް، އެހެން ރިސޯޓްތަކުން އެކަށީގެންވާ އަދަދެއް ނުދޭކަމަށް ބުނެފައެވެ. އަދި އެހެން ފަރާތްތަކުން ވަނީ އެއީ އަލީ އެބޭފުޅާ އެ ޕާޓީއަކަށް ނިސްބަތްވެ ވަޑައިގަންނަވާ ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ ނުފޫޒުގައި ޖެހިވަޑައިގެން ދައްކަވާ ވާހަކަތަކެއްކަމަށް ވިދާޅުވެފައެވެ.
މި ފާޑުކިޔުންތަކަށް ރައްދުދެއްވަމުން މިނިސްޓަރ އަލީ ވަހީދު ކުރެއްވި ޓްވީޓެއްގައި ވިދާޅުވީ އެ ނޫސް ކޮންފަރެންސްގައި ދެއްކި ވާހަކައިގެ އަސްލު އޮޅުވާލާތީ ހިތާމަ ކުރައްވާ ކަމަށެވެ. އަދި ޓޫރިޒަމް އިންޑަސްޓްރީއާއި ގުޅުންހުރި ހުރިހާ ފަރާތްތަކުގެ ހައްގުތަކަށް މި ސަރުކާރުން ހަމަހަމައަށް އިހުތިރާމްކޮށް ހިމާޔަތްކުރާނެކަމަށްވެސް އެބޭފުޅާ ވިދާޅުވިއެވެ.
ފޮޓޯ: މިހާރު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
