”ހިލޭ އަންހެނުންނާއި ފިރިހެނުން އެކަހެރިވާ ގޮތަށް ޑިޔުޓީ ހަމަޖެއްސުމުން ފާފަވެރިވާނެ؛ ޤިޔާމަތްދުވަހުން ޒިންމާނަގަން ޖެހޭނެ“

ހިލޭ އަންހެނުންނާއި ފިރިހެނުން އެކަހެރިވެ ގާތްގޯޅިވުމަކީ ފާފައަކަށް މަގުފަހިވެދާނެ ކަމެއް ކަމަށާ، ވުމާއެކު އެފަދަ ގޮތަށް ޑިޔުޓީ ހަމަޖެއްސުމަކީ ފާފަވެރިވާނެ ކަމެއް ކަމަށް ދީނީ ޢިލްމުވެރިޔާ އައްޝެއިޚް ޝުޢައިބު ނާޒިމް ވިދާޅުވެއްޖެއެވެ.

ދާރިސް ޓީވީން ގެނެސްދޭ ޢިލްމީ ޚަޒާނާގެ ރޭގެ އެޕިސޯޑުގައި، މި މައުޟޫއަށް އަލިއަޅުވާ ލައްވައި ވާހަކަ ދައްކަވަމުން ޝެއިޚް ޝުޢައިބު ވަނީ، ރަސޫލާ ޞޢވ ގެ ހަދީޘްފުޅުގެ އަލީގައި، ހިލޭ އަންހެނަކާއި ފިރިހެނަކު އެކަހެރިވުމުގެ ނުރައްކާތެރި ކަމުގެ މައްޗަށް އަލިއަޅުވާލައްވާފައެވެ.

ރަސޫލާ ޞޢވ ގެ ޙަދީޘް ބަސްފުޅުތަކުން އެބަ އެނގޭ، ހިލޭ އަންހެނަކާއި ފިރިހެނަކު އެކަހެރިވެއްޖެނަމަ ތިންވަނަ މީހަކަށް އެތަނުގައި ހުންނާނެއޭ ޝައިޠޯނާ. މާނައަކީ އެދެމީހުން ކޮންމެވެސް ނުބައި މަގަކުން ގެންދިޔުމަށް ވަސްވާސްދީ، އެދެމީހުން މަގުފުރެއްދުމަށްޓަކައި، ނުވަތަ އެދެމީހުން، އެދެމީހުންގެ ފިރިން ނުވަތަ އަނބިންނަށް ޚިޔާނާތްތެރި ކަމަކަށް މަގުފަހި ކުރުމަށް، ނުވަތަ ފާޙިޝްކަމަކަށް މަގުފަހިކުރުމަށް ޝައިޠޯނާ އެތަނަށް އަންނާނެ ކަމަށް

އައްޝެއިޚް ޝުޢައިބު ނާޒިމް

ޝެއިޚް ވިދާޅުވިގޮތުގައި، ސައިކަލެއް ނުވަތަ ކާރެއްގައި ނަމަވެސް ހިލޭ އަންހެނަކާއި ފިރިހެނަކު އެކަހެރިވެ ޑިޔުޓީ އަދާ ކުރެވޭ ގޮތަށް، ތިބުމާއި، ކައުންޓަރެއް ކައިރީގައި ނަމަވެސް ދެމީހުން އެކަހެރިވެ ޑިޔުޓީ ކުރެވޭގޮތަށް ތިބުންވެސް އެކަހެރިވުމުގެ މާނާގައި ހިމެނޭ ކަމަށެވެ.

ސައިކަލުގައި އެއްކޮށް ދަތުރުކުރާ ވާހަކަ ބުނީމާ، ރަސޫލާ ޞޢވ ގެ ހަދީޘް ބަސްފުޅެއްގެ މާނާގައިވޭ، ހިލޭ އަންހެނެއްގައިގައި އަތްލުމަށްވުރެ އޭނާއަށް ހެޔޮކަން ބޮޑޭ އޭނާގެ ބޮލަށް ތިނޯސްތައް ހެރުންވެސް. ސައިކަލުގައި ދަތުރު ކުރާއިރު އަތް ލުމުގެ އިތުރުން ގައިގައި ޖެހުންވެސް އެކަށީގެންވޭ. ދަންޔޫސަކު ނޫނީ ބޭނުމެއްނުވާނެ އޭނާގެ އަނބިމީހާ ނުވަތަ ފިރިމީހާ ހިލޭ މީހެއް ގައިގައި ޖެހޭކަށް.

އައްޝެއިޚް ޝުޢައިބު ނާޒިމް

”އެހެންކަމުން، އެއީ ( ހިލޭ އަންހެނުންނާ ފިރިހެނުން އެކަހެރިވާ ގޮތަށް ޑިޔުޓީ ހެދުން) ފާފަވެރިވާނެ ކަމެއް. ފާފައަކަށް މަގުފަހިކޮށްދިނުމަކީ އެކަމަކަށް މަގުފަހިކޮށްދޭ މީހަކުވެސް އެކަމުގެ ސަބަބުން ފާފަވެރިވާނެ ކަމެއް ކަމަށް ރަސޫލާ ޞޢވ ގެ ހަދީޘް ބަސްފުޅުތަކުން އެނގޭ. މުންކަރާތަކަށް މަގުފަހި ކުރި މީހާ، އެ މުންކަރާތް ކުރި މީހުންނެކޭ އެއްފަދަވެގެން އެބަދޭ“ ޝެއިޚް ވިދާވިއެވެ.

ކަންމިހެން ހުރުމުން ހިލޭ އަންހެނަކާއި ފިރިހެނަކު އެކަހެރިވެ ވަޒީފާ ނުކުރެވޭ ގޮތަށް ކަންކަން ހަމަޖެއްސެން އޮއްވައި އެނޫން ގޮތަކަށް، ”އިސްލާމް ދީނުގެ މިންގަނޑުތަކާ ޚިލާފަށް“ ކަންކަން ހަމަޖެއްސުމަކީ ކޮށްގެންވާނެ ކަމެއް ނޫން ކަމަށެ ޝެއިޚް ވިދާޅުވިއެވެ.

އަޅުގަނޑުމެންގެ ތެރެއިން، މުވައްސަސާ ތަކުގެ އިސް ބޭފުޅުންގެ ތެރޭގައި ތިބި ބޭފުޅުން އެބަޖެހޭ، އެބޭފުޅުންނާ ސުވާލު ކުރެވޭނެކަން، މިފަދަ ބަޔަކު ފާޙިޝް އަމަލު ކުރީމާ، އެމީހުންގެ ބޮލުގައިވެސް އެ ފާފަ އެޅޭނެ. ޤިޔާމަތް ދުވަހުން ސަލާމަތެއް ނުވާނެ، އެބޭފުޅުންގެ ސަބަބުން ޢާއިލާ ރޫޅުނީ، ނުވަތަ ބަޔަކު ފާހިޝް ޢަމަލަށް އަރައިގަތީ، އެހެންވީމާ މުވައްސަސާ ތަކުގެ ވެރިން، ޤިޔާމަތް ދުވަހުން އެކަމުގެ ޒިންމާ ނަގަންޖެހޭނެ.

އައްޝެއިޚް ޝުޢައިބު ނާޒިމް

އެހެންކަމުން، އިސްލާމީ އުސޫލުތަކާއެއްގޮތަށް ކަންކަންބަދަލު ކުރުމަށް ޝެއިޚް ވަނީ މުވައްސަސާތަކުގެ ވެރިންނަށް ނަޞޭޙަތްތެރިވެފައެވެ.