ޤައުމީ އެއާލައިން މޯލްޑިވިއަނުން މެލޭޝިއާ އާ ދެމެދު ހާއްޞަ ދަތުުރުތަކެއް
ލިޔުންތެރިޔާ
ސްޓާފް ރައިޓަރ
ދިވެހިރާއްޖޭގެ ޤައުމީ އެއަރލައިން މޯލްޑިވިއަނުން މެލޭޝިއާ އާއި ރާއްޖެއާ ދެމެދު ޚާއްޞަ ދަތުރުތަކެއް ކުރަން ނިންމާފައިވާ ކަމަށް އެކުންފުނިން ބުނެފިއެވެ.
މެލޭޝިއާ އާއި ރާއްޖެއާ ދެމެދު 3 ދަތުރު ކުރުމަށް ހަމަޖެހިފައިވާކަމަށް މޯލްޑިވިއަނުން މައުލޫމާތު ދެއެވެ. މި ދަތުރުތައް ކުރުމަށް ހަމަޖެހިފައިވަނީ މިމަހުގެ 27، 29 އަދި 30ވަނަ ދުވަހުއެވެ.
މެލޭޝިއާއަށް 3 ދުވަހު ދަތުރު ކުރުމަށް ހަމަޖެހިފައިވާއިރު، މި ދަތުރުތަކަށް ބޭނުންކުރަމުންދާނީ މޯލްޑިވިއަންގެ ނެރޯބޮޑީ އެއަރބަސް އޭ320 އާއި ވައިޑްބޮޑީ އެއަރބަސް އޭ330 ކަމަށް އެ އެއާލައިނުން ބުނެއެވެ.
މި ދަތުރުތަކާ ގުޅޭގޮތުން މޯލްޑިވިއަނުން ބުނީ، މީގެ ކުރިންވެސް ރާއްޖެއާއި މެލޭޝިއާއި ދެމެދު ޚާއްޞަ އަދި ސީޒަނަލް ދަތުރުތަކެއް ބާއްވާފައިވާކަމަށާއި. އަދި މި ދަތުރުތަކުގެ ސަބަބުން މެލޭޝިއާއަށް ދަތުރުކުރަން ބޭނުންވާ ފަރާތްތަކަށް ފަސޭހަ ފުރުސަތުތަކެއް ފަހިވެގެންދާނެކަމަށެވެ.
މިހާރު މި ދަތުރުތަކަށް ޓިކެޓް ވިއްކަން ފަށާފައިވާ ކަން ފާހަަގަކުރައްވާ މޯލްޑިވިއަނުން ބުނީ އިތުރު މައުލޫމާތު ހޯދުމަށާއި ޓިކެޓް ގަތުމަށް މޯލްޑިވިއަންގެ ވެބްސައިޓުން ނުވަތަ 24 ގަޑިއިރު ޚިދުމަތްދޭ ކޯލް ސެންޓަރުގެ ނަންބަރު 1671 އަށް ގުޅުމުން ލިބޭނެ ކަމަށެވެ.
މެލޭޝިއާއަކީ ދިވެހިންެ މެދުގައި މަޤްބޫލު ޤައުމެކެވެ. މެލޭޝިއާަގައި މިހާރުވެސް ގިނަ އަދަދެއްގެ ދިވެހިން ދިރިއުޅެއެވެ. މެލޭޝިއާގެ ފަތުރުވެރިންވެސް ރާއްޖެއަށް އަންނަ މިންވަރު ދަނީ އިތުރުވަމުންނެވެ. އެގޮތުން ފަތުރުވެރިކަމާއި ތިމާވެއްޓާބެހޭ ވުޒާރާގެ ތަފާސްހިސާބުތައް ދައްކާގޮތުން މިދިޔަ އަހަރު ރާއްޖެއަށް މެލޭޝިއާއިން 19000އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
މޯލްޑިވިއަންގެ ޚިދުމަތް ފުޅާކުރުމަށް ވައިޑް-ބޮޑީ މަތިންދާ ބޯޓު ގެނެސްފައިވަނީ މި އަހަރުގެ ޖަނަވަރީ މަހުގެ 6 ވަނަ ދުވަހުއެވެ. މިހާރު މޯލްޑިވިއަނުން ވަނީ ޗައިނާގެ 3 ސިޓީއަށް ދަތުރުތައް ފަށާފައެވެ. އެއީ ޗެންޑީ، ބެއިޖިންގ އަދި ޝަންހާއީއެވެ.
މި ދަތުރުތަކަށް ފަތުރުވެރިންގެ މެދުގައި ބޮޑު ތަރުހީބެއް އޮތްކަމަށް އެ ކުންފުނިން ބުނެއެެވެ. އަދި ވައިޑް-ބޮޑީ މަތިންދާ ބޯޓުގެ ދަތުރުތައް ފުޅާކޮށް، ތައިލެންޑާއި ޔޫރަޕަށްވެސް ދަތުރުތައް ފެށުމަށް މޯލްޑިވިއަނުން ދަނީ ތައްޔާރުވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
