އިންޑިއާގެ ޑިފެންސް އެކްސްޕޯޓް ކުރިއަށް ޖެހިލައިފި

އިންޑިއާގައި އުފައްދާ ދިފާޢީ ދާއިރާގެ އުފެއްދުން އިތުރުކުރުމަށް މަސައްކަތްކުރަމުންދާ މިދަނޑިވަޅުގައި، އެގައުމުން ނިމިދިޔަ މާލީ އަހަރު ދިފާޢީ ދާއިރާގެ އުފެއްދުންތައް އެންމެ ގިނައިން އެކްސްޕޯޓްކުރި ގައުމުތައް ހާމަކޮށްފިއެވެ.

އެގޮތުން ނިމުނު މާލީ އަހަރު އިންޑިއާއިން ދިފާޢީ އުފެއްދުންތައް އެންމެ ގިނައިން އެކްސްޕޯޓްކޮށްފައިވަނީ އެމެރިކާ، ފަރަންސޭސީވިލާތް އަދި އަރްމީނިއާ އަށެވެ. އެމެރިކާއަށް މައިގަނޑު ގޮތެއްގައި ބޭރުކޮށްފައިވަނީ މަތިންދާބޯޓާއި ހެލިކޮޕްޓަރުފަދަ އުޅަނދުތަކުގެ ބައިތަކެވެ.

މި ބައިތައް ގަނެފައިވަނީ އެމެރިކާގެ އެއަރޯސްޕޭސް ކުންފުނިތައް ކަމަށްވާ ބޮއިން އަދި ލޮކްހީޑް މާޓިން ފަދަ ކުންފުނިތަކުންނެވެ. ފަރަންސޭސީވިލާތަށް އެކްސްޕޯޓްކޮށްފައިވަނީ މައިގަނޑު ގޮތެއްގައި ދިފާޢީ ދާއިރާގެ ސޮފްޓްވެއަރ އަދި އިލެކްޓްރޯނިކްސް އެވެ.

އަދި އަރްމީނިއާއަށް އެކްސްޕޯޓްކޮށްފައިވަނީ މައިގަނޑު ގޮތެއްގައި ބަރު ހަތިޔާރާއި ރޮކެޓް ލޯންޗަރ ފަދަ ހަތިޔާރުތައް ކަމަށް ޓައިމްސް އޮފް އިންޑިއާއިން ބުނެއެވެ.

އިންޑިއާގައި ދިފާޢީ އުފެއްދުންތައް އުފައްދާ ސަރުކާރުގެ 16 އިދާރާއަކާއި، 430 ކުންފުނީގެ އިތުރުން ކުރިއަރަމުން އަންނަ އެތައް ހާސް ވިޔަފާރިއެއް އެބަ އޮތެވެ. ޕްރައިވެޓް ސެކްޓަރ އިން ދިފާޢީ އުފެއްދުންތެރިކަމުގެ 21 އިންސައްތަ ހިއްސާކުރެއެވެ.

އިންޑިއާގެ އުފެއްދުންތަކުގެ ތެރޭގައި ހަނގުރާމަމަތީ ޖެޓްތަކާއި، އެއަރކްރާފްޓް ކެރިއަރއިން ފެށިގެން ހަތިޔާރާއި ސޮފްޓްވެއަރ ހިމެނެއެވެ.