އިންޑިޔާ-ޕާކިސްތާން މައްސަލައިން ރާއްޖޭގެ ސަލާމަތަށް ކުރިމަތިވެދާނެ ނުރައްކަލަކަށް ތައްޔާރުވާންޖެހޭ: ނަޝީދު
ލިޔުންތެރިޔާ
ޚަދީޖާ އަރުފާ
އިންޑިޔާ އާއި ޕާކިސްތާނުގެ ދެމެދުގައި ހޫނުވެފައިވާ މަޝްރަޙުގެ ސަބަބުން ރާއްޖޭގެ ސަލާމަތަށް އައިސްދާނެ ނުރައްކަލަކަށް ތައްޔާރުވާންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. މިކަން އެމަނިކުފާނު ފާހަގަކުރެއްވީ އެކްސްގައި ކުރެއްވި ޕޯސްޓެއްގައެވެ.
ނަޝީދު ވިދާޅުވީ އިންޑިޔާ އާއި ޕާކިސްތާނުގެ ދެމެދުގައި ”ހަނގުރާމައެއް“ ފެށިފައިވާ ކަމަށާއި، މިކަމުގެ ސަބަބުން ދެކުނު އޭޝިޔާ އަދި އިންޑިއާ ކަނޑު ސަރަހައްދަށް ބޮޑެތި އަސަރުތަކެއް ކުރާނެ ކަމަށެވެ. އަދި މިކަމުގެ ސަބަބުން ރާއްޖޭގެ ސަލާމަތާއި ރައްކާތެރިކަމަށް އަދި އިގްތިސާދަށް ކޮށްފާނެ އަސަރުތަކަށް ތައްޔާރުވާން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
މި ހަނގުރާމަ ފެށުނީ ކަޝްމީރުގެ ޕަހަލްގާމް ސަރަހައްދުގައި ހިނގި ޓެރަރިސްޓް ހަމަލާއަކާ ގުޅިގެންނެވެ. މި ހަމަލާގައި 26 މީހުން މަރުވެފައިވާއިރު، އޭގެ ތެރޭގައި އިންޑިޔާގެ ފަތުރުވެރިން ހިމެނެއެވެ. މި ހާދިސާއާ ގުޅިގެން އިންޑިޔާއިން ވަނީ ޕާކިސްތާނާއެކު ކުރަމުން އައި ހުރިހާ ވިޔަފާރިއެއް ރަސްމީކޮށް ހުއްޓާލާފައެވެ. އަދި ޕާކިސްތާނުން ވެސް ވަނީ އިންޑިޔާއާއެކު އޮތް ވިޔަފާރީގެ ގުޅުން ވަގުތީގޮތުން ނިމުމަކަށް ގެނެސްފައެވެ.
އިންޑިޔާގެ ބޮޑުވަޒީރު ނަރެންދްރަ މޯދީ ވިދާޅުވެފައިވަނީ މި "ނުބައި ޢަމަލު" ހިންގި ފަރާތްތަކަށް އަދަބު ދެވޭނެ ކަމަށާއި، ޓެރަރިޒަމާ ދެކޮޅަށް ކުރާ މަސައްކަތް އިތުރަށް ހަރުދަނާ ކުރާނެ ކަމަށެވެ. އިންޑިޔާއިން ދެކޭގޮތުގައި މި ހަމަލާގައި ޕާކިސްތާނުގެ ނުސީދާ ދައުރެއް އެބައޮތެވެ. ނަމަވެސް ޕާކިސްތާނުން މިކަން ވަނީ ހަރުކަށި ގޮތެއްގައި ދޮގުކޮށްފައެވެ.
މި ހާދިސާއާ ގުޅިގެން ދެ ގައުމުގެ ދެމެދުގައިވާ ބޯޑަރު ވަނީ ބަންދުކޮށްފައެވެ. އަދި ދެ ގައުމުގެ ދެމެދުގައި އޮތް ސިޔާސީ ގުޅުން ވަނީ އިތުރަށް ގޯސްވެފައެވެ. މިއީ ފަހުގެ ތާރީޚެއްގައި ކަޝްމީރުގައި ހިނގި އެންމެ ނުރައްކާތެރި ހަމަލާތަކުގެ ތެރެއިން އެކެއް ކަމަށް ބެލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
