ބޮޑުތަކުރުފާނު މަގު ހަދާފައިވަނީ ކަންބޮޑުވުންތައް އަހައި، ފަސޭހަވާނެ ގޮތަށް: ބްލައިންޑް އެސޯސިއޭޝަން

މާލޭގެ ބޮޑުތަކުރުފާނު މަގު އަލުން ތަރައްޤީކޮށްފައިވަނީ ނުކުޅެދުންތެރިކަން ހުންނަ ފަރާތްތަކުގެ ކަންބޮޑުވުންތަކަށް ރިޢާޔަތްކޮށް، އެފަދަ ފަރާތްތަކަށް ފަސޭހަވާނެ ގޮތަށް ވަރަށް ފުރިހަމައަށް ޕްލޭން ކުރެވިގެން ކަމަށް ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް (ބްލައިންޑް އެސޯސިއޭޝަން) އިން ބުނެފިއެވެ.

ބްލައިންޑް އެސޯސިއޭޝަނުން މީސްމީޑިއާގައި އާންމުކުރި ވީޑިއޯއެއްގައި، އެ އެސޯސިއޭޝަންގެ މެންބަރަކު ވަނީ އަލަށް ހެދި ބޮޑުތަކުރުފާނު މަގުގެ ޕޭވްމަންޓުގައި ކޭން ބޭނުންކޮށްގެން ހިނގާލުމަށްފަހު އޭނާގެ ތަޖުރިބާ ހިއްސާކޮށްފައެވެ.

އެ ވީޑިއޯގައި އޭނާ ބުނެފައިވަނީ، މިހާރު މަގު ހަދާފައިވާ ގޮތުން ކޭން ޖައްސައިގެން ހިނގަން ވަރަށް ބޮޑަށް ފަސޭހަވެފައިވާ ކަމަށެވެ. އަދި ޖެޓީތަކާ ޕޭވްމަންޓާ ދެމެދު އެކަށީގެންވާ ދުރުމިނެއް ހުރުމުން، ވެއްޓިދާނެ ކަމުގެ އެއްވެސް ބިރެއް ނެތް ކަމަށް ވެސް ފާހަގަކުރިއެވެ. މީގެއިތުރުން، ކުރިން އެންމެ ބޮޑު ކަންބޮޑުވުމަކަށް ވެފައި އޮތް ޕޭވްމަންޓު މެދުގައި ލައިޓް ދަނޑި ޖެހުމުގެ މައްސަލައަށް މިފަހަރު ވަރަށް ރަނގަޅު ހައްލެއް ގެނެސްފައިވާ ކަމަށް އޭނާ ބުންޏެވެ.

"ވަރަށް ރަނގަޅަށް މިކަން ކޮށްފަ މި އޮތީ. އަސްލު ލައިޓް ދަނޑިތައް ތަންކޮޅެއް ދުރުގަ، އެއްގަމަށް ބޮޑަށް އެއްފަޅިއަށް ލާފަ އެ އިންނަނީ، ރުއްޖަހާފައި ހުރި ސަރަޙައްދަށް. އެހެންވީމަ މީ ވަރަށް ރަނގަޅަށް ޕްލޭން ކުރެވިގެން ހެދިފަ އޮތް މަގެއްކަމަށް ފާހަގަކުރެވެނީ،" ވީޑިއޯގައި ބުނެފައިވެއެވެ.

އަދި ހަމައެއާއެކު، މަގު ހުރަސްކުރާ ކްރޮސްވޯކްތައް ވެސް ހަދާފައިވަނީ ލޮލަށް ނުފެންނަ މީހުންނަށް ދެނެގަނެވޭނެ ގޮތަށް އަދި ފުރޮޅުލީ ގޮނޑި ބޭނުންކުރާ ފަރާތްތަކަށް ވެސް ފަސޭހައިން ފައިބައިގެން މަގު ހުރަސްކުރެވޭ ގޮތަށް ކަމަށް އޭނާ ފާހަގަކުރިއެވެ.

ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކޮށް، ލޮލުގެ ފެނުމުން މަޙްރޫމްވެފައިވާ ކުދިންނަށް ޚާއްޞަކޮށްގެން 'ޓެކްޓައިލް ޕޭވިންގ' އަޅާފައިވާތީ، ސްމާޓް ކޭން ބޭނުންކޮށްގެން އެކަނިމާއެކަނި އެހެން މީހެއްގެ އެހީއަކާ ނުލައި ހިނގާބިނގާވެ އުޅުމުގެ ފުރުޞަތު މިހާރު ވަނީ ތަނަވަސްވެފައެވެ.

މިއީ ސަރުކާރުން އެޅި ވަރަށް ރަނގަޅު ފިޔަވަޅެއްކަން ފާހަގަކޮށް، ނުކުޅެދުންތެރިކަން ހުންނަ ފަރާތްތަކުގެ އަޑުއަހައި މިފަދަ ފުރިހަމަ މަސައްކަތެއް ކޮށްދެއްވި ކަމަށްޓަކައި އެ ޖަމްޢިއްޔާއިން ވަނީ ސަރުކާރަށާއި މި މަޝްރޫޢު ކުރިއަށްގެންދިޔަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އަށް ވަރަށް ބޮޑަށް ޝުކުރު އަދާކޮށްފައެވެ.

އެ އެސޯސިއޭޝަނުން ބުނީ ކުރިއަށް އޮތް ތަނުގައި ވެސް ހުރިހާ ދާއިރާއަކުން ނުކުޅެދުންތެރިކަން ހުންނަ ފަރާތްތަކަށް ކަންކަން ފަސޭހަވާނެ ފަދަ ގޮތަކަށް ސަރުކާރުގެ މަޝްރޫޢުތައް ބައްޓަންވެގެން ދާނެ ކަމަށް އުއްމީދު ކުރާ ކަމަށެވެ.