ފްރާންސް ލެޖެންޑް ޒިދާންގެ ދަރިފުޅު އަލްޖީރިއާގެ ގޯލް ބަލަހައްޓަން އެރިއިރު މާސްކު އެޅީ ކީއްވެ؟

މިފަހަރުގެ ވޯލްޑްކަޕްގައި މިއަދު އަލްޖީރިއާއާއި އާޖެންޓީނާ ބައްދަލުކުރި މެޗުގައި، ދުނިޔޭގެ ފުޓްބޯޅައިގެ ލެޖެންޑް ޒައިނުއްދީން ޒިދާންގެ ދަރިފުޅު، ލޫކާ ޒިދާން، ފެނުނީ އަލްޖީރިއާގެ ގައުމީ ޓީމުގެ އެއްވަނަ ކީޕަރުގެ ގޮތުގައެވެ.

މެޗު ކުޅެވެމުންދިޔައިރު ގިނަ ބެލުންތެރިންގެ ލޮލުގައި އަޅައިގަތް އެއް ކަމަކީ، ލޫކާ އަަޅައިގެންހުރި މާސްކެވެ. އެއާއެކު އެ މާސްކު އަޅަން ޖެހުނު ސަބަބުތަކާ ގުޅޭގޮތުން ވަނީ ސުވާލުތައް އުފެދިފައެވެ.

މިއީ ރީއްޗަކަށް ނުވަތަ މީހަކަށް ފޮރުވެންވެގެން އަޅާފައިވާ މާސްކެއް ނޫނެވެ. އެހެނެއް ކަމަކު އެ މާސްކު އެޅީ އަޅަން މަޖުބޫރުވެގެންނެވެ. އެއީ ރައްކާތެރިކަމަށް އަޅާފައިވާ އެއްޗެކެވެ.

މި މާސްކަކީ މޫނަށް ލިބިފައިވާ ބޮޑު އަނިޔާއަކުން ރައްކާތެރިވުމަށާއި، ފަރުވާގެ މަރުހަލާގައިވާ އަނިޔާވި ސަރަހައްދަށް ދަނޑުމަތީގައި އިތުރު އަނިޔާއެއް ލިބުނަ ނުދިނުމަށްޓަކައި ބޭނުންކުރާ އެއްޗެކެވެ.

ސްޕެއިންގެ ގްރަނާޑާ ކްލަބަށް ކުޅެމުންދިޔަ އުމުރުން 28 އަހަރުގެ މި ގޯލްކީޕަރަށް މި އަނިޔާ ލިބުނީ މިދިޔަ އޭޕްރީލް މަހުގެ ފަހުކޮޅު އަލްމޭރިއާއާ ދެކޮޅަށް ކުޅުނު މެޗެއްގައި ހިނގި ނުރައްކާތެރި ކުރިމަތިލުމެއްގައެވެ. މި ހާދިސާގައި އޭނާގެ ދަތްދޮޅިއާއި މަތީ ދަތްޕިލަ ހިމެނޭ ކަށިގަނޑު ބިންދައިގެން ގޮސް، ސިކުނޑިއަށްވެސް އަނިޔާވިއެވެ.

މި އަނިޔާގެ ސަބަބުން ސީޒަނުގެ ބާކީ އޮތް ބައިގައި އޭނާއަށް ކުޅުމާ ދުރުގައި ހުންނަން ޖެހުނުއިރު، ވޯލްޑް ކަޕުގައި ކުޅުމުގެ ފުރުޞަތުވެސް ގެއްލިދާނެކަމުގެ ބިރު އޮތެވެ. ނަމަވެސް، ވޯލްޑް ކަޕުގައި ބައިވެރިވުމުގެ އުންމީދުގައި ލޫކާއާއި އޭނާގެ މެޑިކަލް ޓީމުން ނިންމީ ވަގުތުން ސާޖަރީއެއް ހެދުމަށެވެ. އެލްޖީރިއާގެ ޤައުމީ ޓީމުން ފުރުޞަތު ހޯދުމަށްޓަކައި އޭނާ ނިންމީ މި މާސްކު އަޅައިގެން ކުޅުމަށެވެ.

މުބާރާތުގެ ކުރިން ނޫސްވެރިންނާ ވާހަކަދައްކަމުން ލޫކާ ބުނީ، ކުރި މަސައްކަތުން ކާމިޔާބު ލިބުމުން ވަރަށް ބޮޑު ހިތްހަމަޖެހުމެއް ލިބިފައިވާ ކަމަށެވެ.

"އަހަރެންގެ ހާލު މިހާރު ރަނގަޅު، އެއްވެސް ތަދެއް ނުވޭ. ސާޖަރީވެސް ވަރަށް ކާމިޔާބު، މިހާރު ފަސް ހަފުތާ ވެއްޖެ. ދެ ހަފުތާ ކުރިން އަހަރެން ދަނޑަށް ނުކުމެ ފަރިތަކުރުންތައް ފަށައިފިން، އަދި މިކަމާ ވަރަށް އުފާވޭ،" ޒިދާން ބުންޏެވެ.

ޒިދާންގެ ދަރިފުޅު އަލްޖީރިއާގައި؛ ކީއްވެ؟

ދެން އުފެދޭ އަނެއް ސުވާލަކީ ފްރާންސް ލެޖެންޑްގެ ދަރިފުޅު ފްރާންސްއަށް ނުކުޅެ އަލްޖީރިއާއަށް ކުޅެން ނިންމި ސަބަބެވެ. މިއީ ގިނަ ބަޔަކު އޮޅުންފިލުވަން ބޭނުންވާ ކަމެކެވެ.

ލޫކާ އުފަންވީ 1998 ވަނަ އަހަރު ފްރާންސްގެ މާސޭގައެވެ. ނަމަވެސް އޭނާ ބޮޑުވީ ސްޕޭންގެ މެޑްރިޑްގައެވެ. މި ސަބަބާހުރެ އޭނާއަށް ތިން ގައުމެއްގެ ގައުމީ ޓީމަށް ކުޅުމުގެ ފުރުސަތު އޮތެވެ. އެއީ އޭނާގެ ބައްޕަގެ މަޝްހޫރުކަން އޮތް ފްރާންސާއި، އޭނާ ފުޓްބޯޅައިގެ ތަމްރީނު ހޯދި ސްޕޭން އަދި އޭނާގެ ކާފަ މެންގެ އުފަން ގައުމު ކަމަށްވާ އަލްޖީރިއާއެވެ.

އަލްޖީރިއާގެ ރައްޔިތަކަށް ވުމުގެ ރަސްމީ ހުއްދަ ލޫކާއަށް ލިބުނީ މިދިޔަ އަހަރުގެ ސެޕްޓެމްބަރު މަހުގައެވެ. އޭގެ އެންމެ މަހެއް ފަހުން، އޮކްޓޫބަރު 14، 2025 ގައި ޔުގެންޑާއާ ދެކޮޅަށް ކުޅުނު ވޯލްޑް ކަޕް ކޮލިފައިން މެޗުގައި އޭނާ ވަނީ އަލްޖީރިއާގެ ގައުމީ ޓީމަށް ފުރަތަމަ މެޗު ކުޅެދީފައެވެ. ގްރަނާޑާގައި ދެއްކި މޮޅު ކުޅުމަށްފަހު ގައުމީ ޓީމަށް ނެގި ލޫކާ ވަނީ އެ މެޗުގައި މޮޅު ކުޅުމެއް ދައްކައި، 2-1 އިން އަލްޖީރިއާ މޮޅުވުމުގައި މުހިންމު ދައުރެއް އަދާކޮށްފައެވެ. ކޯޗު ލަޑިމިއަރ ޕެޓްކޮވިޗްގެ އިރުޝާދުގެ ދަށުން އޭނާ މިހާތަނަށް ހަތް މެޗު ކުޅެފިއެވެ.

ޒިދާންގެ ހަތަރު ފިރިހެން ދަރިންނަށްވެސް ތިން ގައުމެއް ތަމްސީލުކުރުމުގެ އިޚްތިޔާރު ލިބުނެވެ. އެންޒޯ ޒިދާން ސްޕޭންގެ 15 އަހަރުން ދަށުގެ ޓީމަށް ކުޅުމަށްފަހު ފަހުން ބަދަލުވީ ފްރާންސަށެވެ. ތިއޯ އަދި އެލިޔާޒް ޒިދާން އިޚްތިޔާރު ކުރީ ފްރާންސެވެ. ލޫކާވެސް ޒުވާން އުމުރުގައި ކުޅުނީ ފްރާންސަށެވެ. އެގޮތުން ފްރާންސްގެ 17 އަހަރުން ދަށުގެ ޓީމާއެކު ޔޫރަޕްގެ ޗެމްޕިއަންކަން ހޯދައި، ސެމީ ފައިނަލުގައި ތިން ޕެނަލްޓީ ދިފާއުކޮށްގެން ބޮޑު މަގުބޫލުކަމެއް ހޯދިއެވެ.

ނަމަވެސް، އަމިއްލަ ވަކި އައިޑެންޓިޓީއެއް އުފެއްދުމަށާއި، ބައްޕަގެ ހިޔަނިން ބޭރުވެ އަމިއްލަ ކާމިޔާބީތަކެއް ހޯދުމަށް ލޫކާ ނިންމީ އަލްޖީރިއާއަށް ކުޅުމަށެވެ. މިއީ އޭނާގެ ކާފަ މެންގެ ގައުމަށްޓަކައި ކޮށްދެވޭނެ އަގުހުރި ޚިދުމަތެއް ކަމަށް އޭނާ ގަބޫލުކުރެއެވެ. މިހާރު އޭނާ ހުރީ އަލްޖީރިއާގެ ޖާޒީގައި ވޯލްޑް ކަޕްގެ ބޮޑު މައިދާނުގައި އޭނާގެ ހުނަރު ދައްކާލުމަށެވެ.