ހައްޖު ކޯޕަރޭޝަނުން އަންސާރު ސަސްޕެންޑް ކުރީ ވަޒީފާގެ މަސްއޫލިއްޔަތު އަދާކުރުމުގައި ފަރުވާ ކުޑަވެގެން
ލިޔުންތެރިޔާ
އަބްދުﷲ ހުސައިން
ހައްޖު ކޯޕަރޭޝަނުގައި ވަޒީފާ އަދާކުރަމުން އަންނަ އަދާލަތަށް ނިސްބަތްވާ ޙުސައިން އަންޞާރު ވަޒީފާއިން ސަސްޕެންޑް ކޮށްފައިވަނީ ވަޒީފާގެ މަސްއޫލިއްޔަތު އަދާކުރުމުގައި އިހުމާލުވާކަމަށް ފާހަގަކުރެވިގެންކަމަށް ހައްޖު ކޯޕަރޭޝަނުން ބުނެފިއެވެ.
އަދާލަތު ޕާޓީން ވަނީ ޕާޓިގެ ޢިލްމުވެރިންގެ މަޖިލީހާއި އަދި މަޝްވަރާމަޖިލީހުގެ މެންބަރު އައްޝައިޚް ޙުސައިން އަންޞާރު ވަޒީފާއިން ސަސްޕެންޑް ކުރުމުން އެކަމާ ނުރުހޭކަން ހާމަކޮށް ބަޔާނެއް ނެރެފައެވެ. މިކަމާ ގުޅިގެން ވޮއިސް އާ ވާހަކަދައްކަވަމުން ހައްޖު ކޯޕަރޭޝަނުގެ އިސް އޮފިޝަލަކު ވިދާޅުވީ، އަންސާރުގެ ކިބައިން މަސައްކަތުގެ އަހުލާގާ ގުޅުންހުރި މައްސަލަތަކެއް ހުށަހެޅިފައިވާކަމަށެވެ.
އޮފިޝަލް ވިދާޅުވީ، އަންސަރުގެ ފަރާތުން އޮފީހަށް ހާޒިރުވުމުގައިވެސް ފަރުވާކުޑަކަން ފާހަގަކުރެވިފައިވާކަމަށެވެ. މީގެ އިތުރުން މަސައްކަތަށް ފަރުވާކުޑަވުމާއި، ގިނަވަގުތު އޮފީހުން ބޭރުގައި އުޅޭކަން ފާހަގަކުރެވިފައިވާކަމަށްވެސް އޭނާ ވިދާޅުވިއެވެ.
އަންސާރުގެ މައްސަލާގައި އަދާލަތުން ނެރެފައިވާ ބަޔާނުގައި މައިގަނޑު ގޮތެއްގައި ފާހަގަކޮށްފައިވަނީ މައިގަނޑު ގޮތެއްގައި ސިޔާސީ ވާހަކަތަކެކެވެ. ހައްޖު ކޯޕަރޭޝަނުގައި ތަފާތު ސިޔާސީ ޕާޓީތަކަށް ނިސްބަތްވާ މުއައްޒަފުން ވަޒީފާ އަދާކުރަމުންދާއިރު، އަދާލަތުން ފާހަގަކުރާ ފަދަ މައްސަލައެއް މިހާތަނަށް ޖެހިފައިނުވާކަން ފާހަގަކޮށްލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
