އަމިއްލަ ދަނޑުގައި އިންގްލޭންޑުން އެންޑޯރާ ބަލިކޮށްފި

ވޯލްޑްކަޕް ކޮލިފައިންގ ގުރޫޕް ކޭގައި ރޭ އަމިއްލަ ދަނޑުގައި އެންޑޯރާއި ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް އިންގްލޭންޑުން ގުރޫޕްގެ އެއްވަނައިގައި ބޮޑު ލީޑެއް ނަގައިފިއެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ގުރޫޕްގެ އެއްވަނައިގައި އިންގްލޭންޑް މިވަގުތު އޮތްއިރު، މިމެޗުން ބަލިވި އެންޑޯރާ އިން ގުރޫޕް ސްޓޭޖުގައި ކުޅުނު ފަސް މެޗުން ވެސް ބަލިވެ ޕޮއިންޓެއް ނުލިބި މިވަގުތު އޮތީ ގުރޫޕްގެ ފުލުގައެވެ.

އިންގްލޭންޑް އެންމެ ފަހުން ކުޅުނު މެޗުގައި 3-1 ގެ ނަތީޖާއަކުން ސެނަގާލް އަތުން ބަލިވެފައިވާއިރު، އެންޑޯރާ އެންމެ ފަހުން ކުޅުނު މެޗުގައި ސާބިއާ އަތުން އެޓީމު ބަލިވީ 3-0 ގެ ނަތީޖާއަކުންނެވެ. އަދި މިދެޓީމު އެންމެ ފަހުން ކުޅުނު މެޗު 1-0 ގެ ނަތީޖާއަކުން ކާމިޔާބުކުރީ އިންގްލޭންޑް އިންނެވެ.

މުޅި މެޗުގައި ވެސް މޮޅަށްކުޅެ އިންގްލޭންޑުން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 25 ވަނަ މިނެޓުގައެވެ. މިލަނޑަކީ އެންޑޯރާގެ ޑިފެންޑަރު ކްރިސްޓިއަން ގާސިއާ އަތުން ބައިކޮޅަށް ވަން ލަނޑެކެވެ. އަދި އެޓީމުން ލީޑު ފުޅާކުރި ލަނޑު ދެވަނަ ހާފުގެ 67 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު ޑެކްލަން ރައިސް އެވެ.

މީގެ އިތުރުން ވެސް މިމެޗުގައި އިންގްލޭންޑުން ލަނޑުޖަހާނެ ރަނގަޅު ގިނަ ފުރުސަތުތަކެއް ތަނަވަސްކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން އިންގްލޭންޑް ކުރީގައި،އޮވެގެންނެވެ.