ލިސްޓު މުރާޖާ ކުރުމަށްފަހު ފްލެޓް ދޭނީ ޙައްގުވެރިންނަށް: ވަޒީރު ހައިދަރު
ކުރީގެ ސަރުކާރުން ގެދޮރުވެރިޔާ ސްކީމްގެ ދަށުން ދޫކުރަން ނިންމި ފުރަތަމަ 4000 ފްލެޓުގެ ލިސްޓު މުރާޖާ ކުރުމަށްފަހު، ފްލެޓް ލިބޭނީ ޙައްގުވެރިންނަށް ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވަޒީރު ޑރ. އަލީ ހައިދަރު ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވަމުން ވަޒީރު ވިދާޅުވީ ރާއްޖެއަށް ދިމާވެފައިވާ މާލީ ހާލަތްތަކާއެކުވެސް ފަހިދިރިއުޅުން ކޯޕަރޭޝަން، އެފްޑީސީން 4000 ފްލެޓުގެ މަސައްކަތް ކުރިއަށްގެންދިއުމުގައި ސަރުކާރަށް ފުރިހަމަ އެއްބާރުލުން ދެއްވާކަމަށާއި އެގޮތުން، ގިނަ އިމާރާތާތްކުގެ ކޮންކްރީޓުގެ މަސައްކަތްތައް ނިމިފައިވާއިރު ބައެއް އިމާރާތްތަކުގެ އިތުރު މަސައްކަތްތައްވެސް ނިމިފައިވާ ކަންވެސް ވަޒީރު ހާމަ ކުރެއްވިއެވެ.
ކުރީ ސަރުކާރާ އަޅާބަލާއިރު މި ސަރުކާރުން ފްލެޓުތަކުގެ މަސައްކަތް ކުރިއަށްގެންދާ ސްޕީޑު ހަލުވިކަން ފާހަގަކުރައްވާ ވަޒީރު ވިދާޅުވީ އަންނަ އަހަރުގެ މެދު ތެރޭގައި ހުރިހާ ފްލެޓެއްގެ މަސައްކަތް ނިންމާލެވޭނެ ކަމަށެވެ.
ވަޒީރު އިތުރަށް ވިދާޅުވީ، ކުރީގެ ސަރުކާރުން ނެރުނު ފްލެޓް ލިސްޓް މުރާޖާ ކޮށް، ފްލެޓް ލިބޭނީ އޭގެ ޙައްގުވެރިންނަށް ކަމަށެވެ.
"މުރާޖާކޮށް ނިމުނީމަ އިރާދަކުރެއްވިއްޔާ ފްލެޓް ހަވާލުކޮށް ނިންމާނަން. އެނގިވަޑައިގަންނަވާނެ އޭސީސީން އަޅުގަނޑުމެންނަށް ވަރަށް ގިނަ ކަންތައްތަކެއް ކުރަން އަންގަވާފައި އޮތީ. އެގޮތަށް އަޅުގަނޑުމެން ކުރިއަށްގެންގޮސް އިރާދަކުރެއްވިއްޔާ ފްލެޓްގެ ޙައްގުވެރިންނަށް، އަޅުގަނޑު ޔަގީންކަންދެން ތިބޭފުޅުންނަށް ޙައްގުވެރިންނަށް ނޫން ބަޔަކަށް ފްލެޓުތައް ލިބޭނެ ގޮތަކަށް އަޅުގަނޑުމެން ނުނިންމާނަން"
ވަޒީރު ވިދާޅުވިއެވެ.
މކުރީ ސަރުކާރުން ނެރުނު ފްލެޓް ލިސްޓު މުރާޖާ ކުރަން ފަށާފައިވަނީ، ލިސްޓާ ގުޅިގެން އެންޓި ކޮރަޕްޝަން ކޮމިޝަނުން ހިންގި ތަހުގީގަށްފަހު އެ ލިސްޓުގައި މައްސަލަތައް ހުރުމުން ލިސްޓް އަލުން މުރާޖާ ކުރުމަށް އެ އިދާރާއިން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއަށް ލަފާދެއްވުމުންނެވެ. މި މަސައްކަތް ކުރުމަށް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއިން ވަނީ ޚާއްސަ ކޮމިޓީއެއްވެސް އެކުލަވާލައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
