ދަރީންނަށްޓަކައި ވާރުތަކޮށްދޭން އޮތް އެންމެ އަގުހުރި ތަރިކައަކީ އިސްލާމްދީން: ރައީސް
ލިޔުންތެރިޔާ
އަބްދުﷲ ހުސައިން
މާދަމާގެ ދަރީންނަށްޓަކައި މި ޤައުމުން ވާރުތަކޮށްދޭން އޮތް އެންމެ އަގުހުރި ތަރިކައަކީ އިސްލާމްދީންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ދިވެހިރާއްޖެ އިސްލާމްވި ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓްގައި ރައީސް ވިދާޅުވީ މާދަމާ އަޅުގަނޑުމެންގެ ދަރީންނަށްޓަކައި ވާރުތަކޮށްދޭން އޮތް އެންމެ އަގުހުރި ތަރިކައަކީ، މާތްވެގެންވާ އިސްލާމް ދީނާއި، ދިވެހީންގެ އަމިއްލަވަންތަ ރީތި ސިފަތައް ކަމަށެވެ. ރައީސް ވިދާޅުވީ މީގެ 899 އަހަރު ކުރީން އިސްލާމްދީން ޤަބޫލުކުރުމުގައި ދިވެހީން ދައްކުވައިދިނީ، ކިޔަމަންތެރިކަމާއި ޞުލްޙަވެރިކަމާއި ބަދަހިކަމާއެކު އެންމެން އެކީ ހެޔޮގޮތް ޚިޔާރުކުރުމުގެ ރީތި ނަމޫނާކަމަށެވެ.
އެދުވަހުއްސުރެ މިއަދާ ހަމަޔަށްވެސް، ދިވެހީންގެ އަމިއްލަވަންތަކަމާއި މިނިވަންކަން މި ޤައުމުގައި ދެމިއޮތީ، އަޅުގަނޑުމެން ދިވެހިންނަކީ ޙައްޤުގެ މަގުގައި ތިބި އެއްބައިވަންތަ ބަޔަކަށް ވާތީކަމަށް ރައީސް ވިދާޅުވިއެވެ.
މި އަގުހުރި ތަރިކަ ރައްކައުތެރިކޮށް ދެމެހެއްޓުމުގެ މަތިވެރި ނަޞީބު ހުރިހާ ޒަމާނެއްގައިމެ ދިވެހީންނަށް ދެއްވުން އެދި ހެޔޮ ދުޢާ ކުރަމުން، ރައީސް ޑރ.މުއިއްޒު ވަނީ ރާއްޖެ އިސްލާމްވީ ދުވަހުގެ ތަހުނިޔާ ހުރިހާ ދިވެހިންނަށް އަރިސްކުރައްވާފައެވެ.
ކޮންމެ އަހަރެއްގެވެސް ހިޖުރީގޮތުން ރަބީޢުލް އާޚިރު މަހުގެ 2 ވަނަ ދުވަސް ފާހަގަކުރަނީ ރާއްޖެ އިސްލާމްވީ ދުވަހުގެ ގޮތުގައެވެ. ރާއްޖެ އިސްލާމްވީކަމަށް ތާރީހުން އެނގެން އޮތީ 548 ވަނަ އަހަރެވެ. ދިވެހިންނަށް އިސްލާމްދީނުގެ މަތިވެރި ހިދާޔަތް ލިބުނީ މަޢުރިބްކަރައިން ވަޑައިގެންނެވި އަބުލްބަރަކާތު ޔޫސުފުލް ބަރުބަރީގެ ކޮށްދެއްވި މަސައްކަތްޕުޅުންނެވެ.
ދިވެހިރާއްޖެ އިސްލާމްވިތާ މިއަދަށް 899 އަހަރު ފުރިފައިވާއިރު، ރާއްޖެ އިސްލާމްވިދުވަސް އެންމެފުރަތަމަ ފާހަގަކޮށްފައިވަނީ، އައްސުލްޠާން މުޙައްމަދު ފަރީދުލް އައްވަލްގެ ރަސްކަމުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
