އެންމެން ހައިރާންކޮށްލުމަށްފަހު، ކޭޕް ވާޑް، ވަރލްޑްކަޕްގެ ނޮކްއަުޓްބުރަށް

މިހާރު ކުރިއަށްދާ ވަރލްޑްކަޕް ނޮކްއައުޓްބުރުގެ ޖާގައެއް އެންމެން ހައިރާންކޮށްލުމަށްފަހު ކުޑަކުޑަ ކޭޕް ވާޑުން ހޯދައިފިއެވެ.

ކޭޕް ވާޑަކީ މިފަހަރުގެ މުބާރާތުގައި ވާދަކުރާ ޤައުމުތަކުގެ ނިސްބަތުން އެންމެ ކުޑަ އާބާދިއެއް އޮންނަ އެއް ޤައުމެވެ. ކޭޕް ވާޑަށް އަނެއްބުރުގެ ޖާގައެއް ކަށަވަރުވީ ސައުދީ އަރަބިއާ އާ ދެކޮޅަށް ކުޅުނުމެޗް އެއްވަރުވުމުންނެވެ. މިމެޗް އެއްވަރުވުމުން ކޮންއައުޓްބުރުން ޖާގަ ލިބުނީ ތާވަލްގެ ދެވަނަ ޓީމްގެ ގޮތުގައެވެ.

ކޭޕް ވާޑުން ވަނީ މިފަހަރުގެ ވަރލްޑްކަޕްގައި ހައިރާން ކުރުވަނިވި ނަތީޖާތަކެއް ނެރެފައެވެ. އެޓީމް ވަނީ ފުޓްބޯޅައިގެ ގަދަ ބާރެއްކަމަށްވާ ސްޕެއިންވެސް ހިފަހައްޓާފައެވެ. މީގެ އިތުރުން އުރުގުއޭ އާ ދެކޮޅަށްވެސް ވަނީ މޮޅު ކުޅުމެއް ދައްކައި އެމީހުން މޮޅުވިޔަނުދީ ހިފަހައްޓާފައެވެ. ގްރޫޕް ސްޓޭޖުގެ ފަހު މެޗުތަކަށް ނުކުތްއިރު، ނަތީޖާ ނުކުންނަ ގޮތަކުން ކޭޕް ވާޑަށް ގްރޫޕުގެ އެއްވަނަ ލިބުމުގެ ފުރުސަތުވެސް އޮތެވެ. ނަމަވެސް، ހިއުސްޓަންގައި ކުޅުނު މެޗު އެއްވަރުވުމާއި، އަނެއްކޮޅުން ސްޕެއިން އަތުން އުރުގުއޭ 1-0 އިން ބަލިވުމާ ގުޅިގެން، ކޭޕް ވާޑަށް ލިބުނީ ސްޕެއިންގެ ފަހަތުން ގްރޫޕުގެ ދެވަނައެވެ.

ކޭޕް ވާޑްގެ މި ކާމިޔާބީއާ ގުޅިގެން ފުޓްބޯޅަ ލެޖެންޑް އަދި ސްކައި ސްޕޯޓްސްގެ އެނަލިސްޓް ގެރީ ނެވިލް ބުނީ، ކޭޕް ވާޑުން ސާބިތުކޮށްދިނީ ފުޓްބޯޅައަކީ ލަފާކުރަން ދަތި ކުޅިވަރެއްކަމަށެވެ. އަދި ވޯލްޑް ކަޕްގައި ބައިވެރިވާ ޓީމުތަކުގެ އަދަދު އިތުރުކުރުމަކީ ރަނގަޅު ނިންމުމެއް ނޫން ކަމަށް ދެކޭ މީހުން، ކޭޕް ވާޑްގެ ކުޅުން ފެނުމުން އެ ވިސްނުން ބަދަލުކުރާނެ ކަމަށް ބެލެވޭކަމަށް އޭނާ ބުންޏެވެ.

" ފުޓްބޯޅައަކީ ކުރިއާލާ ލަފާކުރަން ދަތި ކުޅިވަރެއް. އަހަރެމެން މި ކުޅިވަރުދެކެ މިހާ ލޯބިވަނީވެސް އެ ސަބަބަށްޓަކައި. މިއީ މި މުބާރާތަށާއި އަލަށް ތައާރަފުކުރި ފޯމެޓަށް ލިބުނު ވަރަށް ބޮޑު ކުރިއެރުމެއް" ގެރީ ނެވިލް ބުންޏެވެ.

ކޭޕް ވާޑާއެކު މި ގްރޫޕްގެ އެއްވަނަ ޓީމްގެ ގޮތުގައި ކުރިއަށްއޮތް ބުރަށް ދަތުރުކުރީ ސްޕެއިންނެވެ.