ޓީ 20 ވަރލްޑްކަޕް؛ ބަންގްލަދޭޝްގެ ޓީމް އިންޑިއާގައި މެޗްތައްކުޅެން ދެކޮޅު

ޓީ 20 ވަރލްޑްކަޕް މެޗްތައް ކުޅެން ބަންގްލަދޭޝްގެ ކްރިކެޓް ޓީމް އިންޑިއާއަށް ދިއުމަށް އުޒުރުވެރިވާކަމަށް ރަސްމީކޮށް އެ ޓީމުން ބުނެފިއެވެ.

ބަންގްލަދޭޝްގެ ޓީމުން މިކަން ހާމަކޮށްފައިވަނީ، ބަންގްލަދޭޝްގެ ކްރިކެޓް ބޯޑުން އާއްމުކުރި ސްޓޭޓްމަންޓެއްގައެވެ. ބަންގްލަދޭޝްގެ ކްރިކެޓް ބޯޑުންވަނީ އިންޑިއާގައި ކުޅެންޖެހޭ އެއްވެސް މެޗެއް ކުޅެން އެ ޤައުމަށް ނުދާނޭކަން ރަސްމީކޮށް، އިންޓަރނޭޝަނަލް ކްރިކެޓް ކައުންސިލަށްވެސް އަންގާފައެވެ.

ބަންގްލަދޭޝްގެ ކްރިކެޓް ބޯޑުން މިގޮތަށް އަންގާފައިވަނީ ޓީމްގެ ސަލާމަތީ ސަބަބުތަކަކަށް ޓަކައެވެ.

އިންޑިއާ އާ ބަންގްލަދޭޝްގެ ދެމެދުގައި ސިޔާސީ ނުތަނަވަސްކަން ބޮޑުވެފައިވާއިރު، ބަންގްލަދޭޝްގެ ޓީމުން ވަނީ ކޮންމެ ކުޅުންތެރިއެއްގެ ސެކިއުރެޓީ ކަންކަން ނުބެލެހެއްޓޭނޭކަމަށް އެޤައުމުން ބުނެފައިވާކަމަށެވެ. އެހެންކަމުން މުޅި ޓީމްގެ ސެކިއުރެޓީ އިންޑިއާއަށް ނުބެލެހެއްޓޭނޭކަމަށް ބަންގްލަދެޝްގެ ކްރިކެޓް ކައުންސިލުން ވަނީ ބުނެފައެވެ. އިންޑިއާއިން އެގޮތަށް ބުނެފައިވާއިރު، ބަންގްލަދޭޝްއިން މުބާރާތް ކަވަރކުރުމަށް ދާ ނޫސްވެރިންނާއި ކުޅިބަލަންދާ މީހުންގެ ރައްކާތެރިކަމާމެދުވެސް ޔަގީންކަން ނެތްކަމަށް ބަންގްލަދޭޝްގެ ކުރިކެޓް ކައުންސިލުން ވަނީ ބުނެފައެވެ.

ބަންގްލަދޭޝްގެ ޓީމުން ވަނީ އިންޑިއާގައި ކުޅެންޖެހޭ މެޗްތައް ލަންކާގައި ކުޅުމުގެ އިންތިޒާމުތައް ހަމަޖައްސައިދިނުމަށް އެދިފައެވެ. ސްރީލަންކާއަކީ އެ މުބާރާތް ކުރިއަށްދާނެ ދެ ޤައުމުގެ ތެރެއިން އެއް ޤައުމެވެ.

ޓީ 20 ވަރލްޑްކަޕްގެ މެޗްތައް ކުޅުމަށް އިންޑިއާއަށް ނުދާނޭކަމަށް ބަންގްލަދޭޝްއިން ބުނެފައިވާއިރު، ޕާކިސްތާނު ޓީމުންވެސް އެޓީމުން އިންޑިއާގައި ކުޅެންޖެހޭ މެޗްތައް ކުޅޭނީ ލަންކާގައެވެ.