އުކާލެވޭ ޒާތުގެ މުދަލުގައި اللهގެ އިސްމުފުޅު ޖެހުން ސައުދީއިން މަނާކޮށްފި

ވިޔަފާރި މުދާ ބަންދުކުރުމަށް ބޭނުންކުރާ ކޮތަޅާއި، ޕެކޭޖިން އަދި އެ ނޫންވެސް އުކާލެވޭ ތަކެތީގައި اللهގެ އިސްމުފުޅުތަކާއި ސިފަފުޅުތައް ބޭނުންކުރުން މަނާކޮށް, ސައުދީ އަރަބިއްޔާގެ މިނިސްޓްރީ އޮފް ކޮމާސްއިން އައު އަމުރެއް ނެރެފިއެވެ.

މި ނިންމުމުގެ މައިގަނޑު މަގުސަދަކީ، މާތްاللهގެ މުގައްދަސް ނަންފުޅުތައް ހިމެނޭ ތަކެތި އާންމު ދިރިއުޅުމުގައި އިހުތިރާމު ކުޑަވާ ފަދަ ގޮތްގޮތަށް ބޭނުންކުރުމާއި، އެ ތަކެތި އުކާލުމުގެ ތެރޭގައި ނަންފުޅުތަކުގެ ހުރުމަތް ކެނޑިގެން ދިޔުން ހުއްޓުވުމެވެ.

މި އެންގުމުގެ ދަށުން، މުދާ އުފައްދާ ފަރާތްތަކާއި، ހޯލްސޭލް އަދި ރީޓެއިލް ވިޔަފާރިކުރާ ހުރިހާ ތަންތަނަކުން ވެސް، ޕްލާސްޓިކް ކޮތަޅާއި، ކަރުދާސް ކޮތަޅު، މުދާ ޕެކް ކުރަން ބޭނުންކުރާ ކަރުދާސް އަދި އެ ނޫންވެސް ބޭނުންކުރުމަށްފަހު އުކާލެވޭ ތަކެތީގައި މާތްاللهގެ ނަންފުޅުތަކާއި ގުރުއާނުގެ އާޔަތްތައް ލިޔުމާއި ޗާޕުކުރުން ވަނީ މަނާކޮށްފައެވެ. އަދި މިހާރު ބޭނުންކުރަމުންދާ ތަކެތީގެ ތެރެއިން މި އުސޫލާ ހިލާފުވާ ތަކެތި ވަގުތުން ބޭނުންކުރުން ހުއްޓާލުމަށާއި، ކުރިއަށް އޮތް ތަނުގައި މި ގަވާއިދަށް ފުރިހަމައަށް އަމަލުކުރުމަށް ކުންފުނިތަކާއި ފިހާރަތަކަށް ވަނީ އިލްތިމާސްކޮށްފައެވެ.

މިނިސްޓްރީގެ ރަސްމީ 'އެކްސް' އެކައުންޓް މެދުވެރިކޮށް ތަރުޖަމާނު އަބްދުއްރަހުމާން އަލް ހުސައިން ވިދާޅުވީ، މިއީ މާތްاللهގެ މަތިވެރި ނަންފުޅުތަކަށް ދޭންޖެހޭ ގަދަރާއި އިހުތިރާމު ހިމާޔަތްކުރުމަށް ސަރުކާރުން ނިންމި މުހިންމު ނިންމުމެއް ކަމަށެވެ. އަދި މިފަދަ ފިޔަވަޅެއް އެޅީ، ނޭނގި ނަމަވެސް އެ މުގައްދަސް ނަންފުޅުތަކަށް އިހުތިރާމު ކުޑަވާފަދަ ހާލަތަކަށް އެ ތަކެތި ހުށަހެޅުނަ ނުދިނުމަށްޓަކައި ކަމަށް އޭނާ ފާހަގަކުރެއްވިއެވެ.

ސައުދީގެ ފެޑެރޭޝަން އޮފް ޗެމްބަރސްއިން ވަނީ މި އިރުޝާދުތައް މުޅި ގައުމުގެ ވިޔަފާރިވެރިންނަށް ފޮނުވާފައެވެ. އަދި ޕެކޭޖިން ފަރުމާކުރުމުގައާއި މާކެޓިންގެ ކަންކަމުގައި ދީނީ މިންގަނޑުތަކާއި އިޖުތިމާއީ އަދަބުތަކަށް ފެތޭނޭހެން ބަދަލުތައް ގެނައުމަށް ވަނީ އަންގާފައެވެ. މީގެ އިތުރުން، އުކާލެވޭ ތަކެތީގައި މާތްاللهގެ ނަންފުޅުތައް ބޭނުންނުކުރުމަށް ބާރުއަޅައި މީގެ ކުރިން ނެރެފައިވާ ދީނީ ފަތުވާތަކާއި އިރުޝާދުތަކަށް ވެސް މި ޗެމްބަރސްއިން ވަނީ އަލިއަޅުވާލާފައެވެ.

މި ފިޔަވަޅު އަޅާފައިވަނީ ވިޔަފާރީގެ ދާއިރާގައި ދީނީ އަދި ގައުމީ ނިޝާންތައް ބޭނުންކުރުން ކޮންޓްރޯލް ކުރުމަށް މި ރަސްކަމުގައި ފުޅާ ދާއިރާއެއްގައި ރެގިއުލޭޓަރީ މަސައްކަތްތަކެއް ކުރަމުންދާ ދަނޑިވަޅެއްގަ އެވެ. އެގޮތުން އެންފޯސްމަންޓާއި ކޮމްޕްލައިންސް މޮނިޓަރިންގ އަށް ބާރު އަޅާފައިވާއިރު، އެއަށް އަމަލު ނުކުރާ ފަރާތްތަކަށް ގާނޫނީ ފިޔަވަޅު އެޅުމަށްވެސް ވަނީ ނިންމާފައެވެ.