އެލްއީޑީ އިސްތިހާރު ބޯޑުތަކާއެކު މިއަހަރުގެ ރާބަދި ޗެލެންޖު އިތުރު ހަރުފަތަކަށް

ރާއްޖޭގައި ބާއްވާ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު "އިންފިނިޓީ ޕްރޯ ރާބަދި ޗެލެންޖް 2025" ގެ މެޗަތައް ކުޅޭ މީދޫ ފުޓްސަލް ދަނޑުގައި އެލްއީޑީ އިސްތިހާރު ބޯޑު ބަހައްޓައި ރާބަދި ޗެލެންޖް ތާރީޚްގެ ތެރެއިން ޖާގަ ހޯދައިފިއެވެ.

ރާބަދި ޗެލެންޖްގެ މީޑިއާ ކޯޑިނޭޓަރު މާލިކު ވޮއިސް ސްޕޯޓްސް އާއި ވާހަކަ ދައްކަމުން ބުނީ "ގަލޮޅު ދަނޑުގައި މީގެ ކުރިން ރޯލިން ކެންވާސް އިސްތިހާރު ބޯޑު ބެހެއްޓި ނަމަވެސް، ރާއްޖޭގެ ކުޅިވަރު ދަނޑަކުން މުޅިން އަލަށް އެލްއީޑީ އިސްތިހާރު ބޯޑު ފެނިގެންމިދަނީ"..

އިތުރަށް ވާހަކަ ދައްކަމުން މާލިކު ބުނީ "އަޅުގަނޑުމެން ކުލަބުގެ ފަރާތުން މަސައްކަތް ކުރަމުން މިދަނީ އަހަރަކަށްފަހު އަހަރެއް މުބާރާތުގެ އިންތިޒާމުތައް ރަނގަޅުކުރުމަށް.. އެގޮތުން މިއަހަރުގެ މުބާރާތުގައި އެލްއީޑީ އިސްތިހާރު ބޯޑު ބެހެއްޓިގެން ދިއުމަކީ މުބާރާތައް ލިބިގެންދާނެ އިތުރު ފުރިހަމަކަމެއް"...

މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ މި މުބާރާތަކީ އިންތިޒާމުތަކަށް ބަލާއިރު ރާއްޖޭގައި ބާއްވަމުން އަންނަ އެންމެ ފެންވަރު ރަނގަޅު އެއް ފުޓްސަލް މުބާރާތެވެ.

އެގޮތުން 2019 ވަނަ އަހަރު ބާއްވަން ފެށި މިމުބާރާތް އެކި ސަބަބުތަކާ ހުރެ 2020 އަދި 2021 ވަނަ އަހަރު ނުބޭއްވި ދިއުމަށް ފަހު 2022 ވަނަ އަހަރު ވަނީ އަލުން ބާއްވަން ފައްޓާފައެވެ. އަދި ފާއިތުވެދިޔަ އަހަރުތަކުގައި ކޮންމެ އަހަރަކު ވެސް މުބާރާތުގެ ގުރުލުމާއި، މުބާރާތް ފެށުމުގެ ރަސްމިޔާތުގެ އިތުރުން ނިންމުމުގެ ރަސްމިޔާތް ވެސް އަންނަނީ އަހަރަކަށްވުރެ އަހަރެއް ކުލަގަދަކޮށް ބާއްވަމުންނެވެ.

އެގޮތުން މިއަަހަރުގެ މުބާރާތުގެ ގުރުލުމާއި މުބާރާތް ފެއްޓުމުގެ ރަސްމިއްޔާތު އެހެން އަހަރުތަކަށްވުރެ ކުލަގަދަކޮށް ބޭއްވިއިރު، ދިވެހި ފުޓްބޯޅައިގެ ނަން މަޝްހޫރު ގިނަ ތަރިންތަކެއް ވަނީ މިދެ ރަސްމިއްޔާތުން ފެނިގެން ގޮސްފައެވެ.

މީގެ އިތުރުނަ މި އަހަރުގެ ރާބަދި ޗެލެންޖުގައި ޖުމްލަ 15 ރިސޯޓަކުން ވާދަކުރަމުން އަންނައިރު، މުބާރާތް ކުރިއަށް ދަނީ ބައިވެރިވި 15 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ކުއާޓާ ފައިނަލަށް ހޮވޭގޮތަށެވެ.

މިއަހަރުގެ މުބާރާތުގެ ޓައިޓަލް ސްޕޮންސާއަކީ އިންފިނިޓީ ޕްރޯއެވެ. އަދި ޑިޖިޓަލް ޕާޓްނަރަކަށް ދިރާގު ހަމަޖައްސާފައިވާއިރު، މީޑިއާ ޕާޓްނަރަކީ ވޮއިސް ސްޕޯޓްސް އެވެ.