މެލޭޝިޔާއިން ކިޔާފައިވާ ހޫނު މަރުޙަބާއާއި ދިން ފުރިހަމަ މެހެމާންދާރީއަށް ރައީސް މުޢިއްޒުގެ ޝުކުރު
ލިޔުންތެރިޔާ
ޚަދީޖާ އަރުފާ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މެލޭޝިއާއަށް ކުރެއްވި ރަސްމީ ދަތުރުފުޅުގައި އެގައުމުގެ ފަރާތުން ކިޔާފައިވާ ހޫނު މަރުޙަބާ އަށާއި، ދިން ފުރިހަމަ މެހެމާންދާރީއަށް އެގައުމުގެ ބޮޑުވަޒީރު އަންވަރު އިބްރާހިމަށް ޝުކުރުއަދާކުރައްވައިފިއެވެ.
މި ދަތުރުފުޅުގައި ދެ ޤައުމުގެ ގުޅުން އިތުރަށް ބަދަހިކުރުމަށްޓަކައި ގިނަ މަޝްވަރާތަކެއް ކުރައްވައި، އެކި ދާއިރާތަކުން އެއްބާރުލުން އިތުރުކުރުމަށް އެއްބަސްވުންތަކެއްގައި ސޮއިކުރެއްވިއެވެ.
ދަތުރުފުޅާއި ގުޅިގެން ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މެލޭޝިއާގެ ބޮޑުވަޒީރު އަންވަރު އިބްރާހީމްއާއި މެލޭޝިއާ ސަރުކާރުން ދެއްވި ހޫނު މަރުޙަބާއާއި މެހެމާންދާރީއަށް ޝުކުރު އަދާކުރައްވާ ކަމަށެވެ.
އަދި ދެ ޤައުމުގެ ސަރުކާރުތަކުން ބޭއްވި ރަސްމީ މަޝްވަރާތައް ވަރަށް ފައިދާހުރި ގޮތެއްގައި ކުރިއަށްގެންދެވުނު ކަމަށާއި، ތަރައްޤީގެ މަޝްރޫއު ތަކުގައި އެއްބާރުލުން އިތުރުކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނު ކަމަށް ވިދާޅުވިއެވެ.
މި ދަތުރުފުޅުގައި ދިވެހިރާއްޖެއާއި މެލޭޝިއާ ދެމެދު ފަތުރުވެރިކަމާއި، ކުޅިވަރާއި، ޞިއްޙަތާ ގުޅޭ ދާއިރާތަކުން އެއްބަސްވުންތަކެއްގައި ސޮއިކުރެވުނެވެ. މީގެ އިތުރުން ދެ ޤައުމުގެ މެދުގައި ޑިޕްލޮމެޓިކް ތަމްރީނާއި، މަޝްވަރާތަކާ ގުޅޭ ނޯޓްތަކެއްވެސް ބަދަލުކުރެވުނެވެ.
މި ދަތުރުފުޅާއި ގުޅިގެން މެލޭޝިއާގެ ބޮޑުވަޒީރު އަންވަރު އިބްރާހީމް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ދެ ޤައުމުގެ މެދުގައި ބޭއްވުނު ބައްދަލުވުމުގައި ވިޔަފާރި، ތަޢުލީމު، ފަތުރުވެރިކަން، މޫސުމަށް އަންނަ ބަދަލުތައް، ގައުމީ ސަލާމަތް، ޒުވާނުންނާއި ކުޅިވަރު، އިސްލާމިކް ބޭންކިންގ، ޙަލާލު އިންޑަސްޓްރީ، ކޮރަޕްޝަން ހުއްޓުވުން، ޑިޖިޓަލް ޓެކްނޮލޮޖީ، އިއާދަކުރަނިވި ހަކަތަ އަދި އާޓިފިޝަލް އިންޓެލިޖެންސްއާ ގުޅޭގޮތުން މަޝްވަރާކުރެވުނު ކަމަށެވެ.
އަދި މިޔަންމާރު، ޣައްޒާ އަދި އެމެރިކާގެ ޓެރިފްތަކާ ގުޅޭ ސަރަޙައްދީ މައްސަލަތަކާ ގުޅޭގޮތުންވެސް މަޝްވަރާކުރެވުނު ކަމަށް ވިދާޅުވިއެވެ.
މެލޭޝިއާގެ ބޮޑުވަޒީރު އަންވަރު އިތުރަށް ވިދާޅުވެފައިވަނީ، މި މަޝްވަރާތަކުގައި ވާހަކަދެކެވުނު ކަންތައްތައް ފުރިހަމައަށް ތަންފީޒުކުރުމަށް މިނިސްޓްރީތަކާއި އެޖެންސީތަކުގެ ފެންވަރުގައި މަސައްކަތްކުރާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
