ދިއްލީ އެއާޕޯޓުގެ ނަމާދުކުރާ ކޮޓަރީގައި ބީޖޭޕީގެ ހިންދޫ ލީޑަރަކު އަޑުގަދަކޮށް އަޅުކަންކުރުމުން ފާޑުކިޔުން އަމާޒުވެއްޖެ
ލިޔުންތެރިޔާ
ޚަދީޖާ އަރުފާ
އިންޑިއާގެ ވެރިރަށް ނިއުދިއްލީގެ އިންދިރާ ގާނދީ އިންޓަނޭޝަނަލް އެއާޕޯޓުގައި ހުންނަ އަންހެނުން ނަމާދުކުރާ ކޮޓަރީގެ ތެރޭގައި، ބީޖޭޕީގެ ހިންދޫތުވާ ލީޑަރު މާދަވީ ލަތާ އަޑުގަދަކޮށް ހިންދޫ ދީނުގެ މީހުންގެ ބުދުގެ ކުރިމަތީގައި ކިޔާ ދުޢާއެއް ކިޔާ ވީޑިއޯއެއް އާންމުވުމާ ގުޅިގެން ގިނަ ބަޔަކު ފާޑުކިޔަންފަށައިފިއެވެ.
މާދަވީ ލަތާ އަމިއްލައަށް ސޯޝަލް މީޑިއާގައި ހިއްސާކުރި މި ވީޑިއޯއިން ފެންނަނީ، އެތަނުގައި ތިބި މުސްލިމް އަންހެނުންގެ ކުރިމަތީގައި ހުރެ އޭނާ "ދުރުގާ ސުކްތަމް" ކިޔަވައި އަޑުގަދަކޮށް ދުއާކުރާ މަންޒަރެވެ. މި ވީޑިއޯގެ ފްރޭމްތަކުން ބުރުގާ އަޅައިގެން ތިބި ބައެއް އަންހެނުން އެތަނުގައި ތިއްބާ ފެނެއެވެ.
މި ހާދިސާއާ ގުޅިގެން ގިނަ ބަޔަކު ދަނީ މާދަވީ ލަތާއަށް ފާޑުކިޔަމުންނެވެ. ފާޑުކިޔާ ފަރާތްތަކުން ބުނާ ގޮތުގައި، ނަމާދުކުރާ ކޮޓަރީގައި ހިފަހައްޓަންޖެހޭ ހިމޭންކަމުގެ އުސޫލާ އޭނާ ވަނީ ޚިލާފުވެފައެވެ. އަދި އެތަނުގައި ތިބި އެހެން މީހުންނަށް އުނދަގޫވާ ގޮތަށް އަދި ބިރުގަންނާނެ ފަދަ ގޮތަކަށް އަމަލުކޮށްފައިވާ ކަމަށްވެސް ތުހުމަތުކޮށްފައިވެއެވެ.
މިކަމާ ގުޅިގެން ކޮންގްރެސް ޕާޓީގެ މުހައްމަދު ވަސީމް ވަނީ މާދަވީ ލަތާއާ މެދު ފިޔަވަޅު އެޅުމަށް އެއާޕޯޓްސް އޮތޯރިޓީ އޮފް އިންޑިއާއަށް ގޮވާލާފައެވެ. އޭނާ ވިދާޅުވީ މިއީ ގަސްތުގައި ގަވާއިދު މުގުރާލައި، އެހެން ދީންތަކުގެ މީހުންނަށް ނުތަނަވަސްކަން ކުރިމަތިކުރުވުމަށް ހިންގި އަމަލެއް ކަމަށެވެ.
މާދަވީ ލަތާއަކީ މީގެ ކުރިންވެސް މިފަދަ ގޮތަށް މުސްލިމުންނަށް ފުރައްސާރަކޮށްފައިވާ މީހެކެވެ. އެގޮތުން 2024 ވަނަ އަހަރު މިސްކިތަކާ ދިމާލަށް ދުނިދަނޑިއަކުން އިޝާރާތްކުރާ ފަދަ ހަރަކާތެއް ދެއްކުމާ ގުޅިގެންވެސް ބޮޑު ހަމަނުޖެހުމެއް އުފެދިފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
