ހުޅުމާލެއިން ގޯތި ދޫކުރުމުން އެޗްޑީސީ އަށް ލިބުނު ގެއްލުން ބަލަން އޮޑިޓެއް ހަދަނީ
ހުޅުމާލެއިން ގޯތި ދޫކުރުމުން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އަށް ލިބުނު ގެއްލުން ބަލަން އޮޑިޓެއް ހަދަން އޮޑިޓާ ޖެނެރަލްގެ އޮފީހަށް އަންގަން ރައްޔިތުންގެ މަޖިލީހުގެ މާލިއްޔަތު ކޮމެޓީން ނިންމައިފިއެވެ.
މިއަދު ކުރިއަށްދިޔަ މާލިއްޔަތު ކޮމެޓީގެ ބައްދަލުވުމުގައި އެޗްޑީސީގެ ގޯތި ދިނުމުގެ މަސައްކަތް ދިޔަގޮތުގެ އޮޑިޓް ހަދަން ހުށަހެޅުއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުالله އެވެ.
މިކަމާއި ގުޅޭގޮތުން، ހަމަދު ވިދާޅުވީ، ގޯތި ދޫކުރުމުގެ އޮޑިޓް ހުށަހަޅަނީ ގޯތިތައް އަނބުރާ ނެގުމަށް ނޫންކަމަށާއި، ބޭނުންވަނީ އެޗްޑީސީއަށް ލިބިފައިވާ ގެއްލުންތައް ބަލަން ކަމަށެވެ.
"ގޯތި ދޫކުރުމުގެ އޮޑިޓް މި ހުށަހަޅަނީ އެއްގޮތަކަށް ވެސް ގޯތިތައް އަނބުރާ ނެގުމަށް ނޫނީ އެކަހަލަ ކަމެއްގަ އެއް ނޫން. އެޗްޑީސީއަށް ލިބިފައިވާ ގެއްލުންތަކަށް ބަލާލަން ވެގެން. ސަރުކާރުތަކުން ސިޔާސީ ބޭނުމަށް މި ފަދަ ކަންކަން ކުރާ އިރު ކުންފުނިތަކަށް މާލީ ގެއްލުމާ އެއްޗެހި ލިބިފައިވަނީ ކިހާވަރަކަށް ކަން ބަލަން ޖެހޭ،"
ހަމަދު ވިދާޅުވިއެވެ.
އެކަން ކޮމިޓީގައި ބައިވެރިވި މެންބަރުންގެ އިއްތިފާގުން ވަނީ ފާސްކޮށްފަައިވާއިރު، ހުޅުމާލޭގެ މާސްޓަ ޕްލޭންއާ ހިލާފަށް ގޯތި ދިނުމުގެ ސަބަބުން އެޗްޑީސީއަށް ބޮޑު ގެއްލުން ވެފައިވާކަން ފާހަގަކޮށްލަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
