ބޮޑު އިންޓަރެސްޓް ރޭޓްގައި ލޯނު ނުނަގައި، ބޭރުގެ ދަރަނީގެ 2.7 ބިލިއަން ރުފިޔާ ދެއްކިއްޖެ: ރައީސް މުޢިއްޒު
ލިޔުންތެރިޔާ
ޚަދީޖާ އަރުފާ
ބޮޑެތި އިންޓަރެސްޓް ރޭޓްގައި ލޯނު ނުނަގައި، ބޭރުގެ އެކިއެކި ފަރާތްތަކަށް ދައްކަންޖެހޭ ދަރަނީގެ 2.7 ބިލިއަން ރުފިޔާ، މިވީ 7 މަސް ދުވަހުގެ ތެރޭގައި ދައްކާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޑރ.މުޢިއްޒު ވަނީ އެމަނިކުފާނުގެ ވެރިކަމުގެ ހަތް މަސްދުވަހުގެ ތެރޭގައި އިޤްތިޞާދީ ގޮތުން ލިބިވަޑައިގެންނެވި ބޮޑެތި ކުރިއެރުންތަކުގެ މައްޗަށް އަލިއަޅުއްވާލައްވާފައެވެ.
އެގޮތުން، އެމަނިކުފާނު ވިދާޅުވީ، ވެރިކަމާއި ހަވާލުވެވަޑައިގެންނެވި އިރު ދިވެހި އެކި ކުންފުނިތަކަށް ދައްކަންޖެހޭ 9 ބިލިއަން ރުފިޔާ ނުދައްކައި އޮތް ކަމަށާ، އެހެން ނަމަވެސް، ވެރިކަމުގެ މިވީ ދުވަސއކޮޅުގެ ތެރޭގައި އެއިން 4 ބިލިއަން ރުފިޔާގެ ދަރަނި ޚަލާސް ކޮށްފައިވާ ކަމަށެވެ.
9 ބިލިއަން ރުފިޔާގެ ތެރެއިން، ފައިސާ ޗާޕްކުރުން ހުއްޓާލައި، ބޮޑު އިންޓަރެސްޓް ރޭޓްގައި ލޯނު ނުނަގައި، 4 ބިލިއަން ރުފިޔާ އެކިއެކި ކުންފުނިތަކަށް ދައްކައިފިން. އަދި ހަމަ އެއާއެކު ސަރުކާރުގެ އެކިއެކި ކުންފުނި ތަކަށް 7ބިލިއަން، ޖުމްލަ 11 ބިލިއަން ރުފިޔާ ދައްކައިފިން. ފައިސާ ޗާޕު ނުކޮށް، އާމްދަނީގެ ގޮތުގައި ލިބުނު، ބޭރުގެ ދަރަނީގެވެސް 2.7 ބިލިއަން ރުފިޔާ، އެންމެ ލޯނެއްވެސް ޑީފޯލްޓް ނުވެ، ދައްކަމުން މިއައީ. އެހެންވީމާ ގާތްގަނޑަކަށް 13 ބިލިއަން ރުފިޔާ މި 7 ތެރޭގައި މިއޮތީ ދައްކާފައި،"
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު
ރައީސް މުއިއްޒު އިތުރަށް ފާހަގަކުރެއްވި ގޮތުގައި މިދިޔަ އަހަރު ވެރިކަމާ ހަވާލުވެވަޑައިގަތްއިރު ސޮވަރިން ޑިވެލޮޕްމަންޓް ފަންޑުގައި ހުރީ އެންމެ ދެ މިލިއަން ޑޮލަރު ކަމަށާ އެހެން ނަމަވެސް، ފާއިތުވި ހަތް މަސް ދުވަހުގެ ތެރޭގައި 54 މިލިއަން ޑޮލަރު އެ ފަންޑަށް ވަނީ ޖަމާކޮށްފައެވެ. އަދި ސަރުމާރުގެ އަމާޒަކީ މި އަހަރު ނިމޭއިރު އެ ފަންޑަށް 100 މިލިއަން ޑޮލަރު ޖަމާކުރުން ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން ރައީސް ޑރ މުއިއްޒު ވަނީ، އާމްދަނީ އިތުރު ކުރުމަށް ސަރުކާރުން ކުރަމުންދާ މަސައްކަތްތަކަށްވެސް އަލިއަޅުވާލައްވާފައެވެ. އެގޮތުން އައު ރިސޯޓްތައް ހުޅުވުމާއި، އެއާޕޯޓް ބޮޑު ކުރުމުގެ މަސައްކަތް އަވަސް ކޮށްފައުވާކަން ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
