ޕީއެސްއެމްގެ އެމްޑީ، ޒީނާ އިސްތިއުފާދެއްވައިފި

ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުކަމުގެ މަޤާމުގައި ހުންނެވި ޒީނާ ޒާހިރު، މަގާމުން އިސްތިއުފާދެއްވައިފިއެވެ.

ޕީއެސްއެމްގެ އެމްޑީކަމުން ޒީނާ އިސްތިއުފާ ދެއްވިކަން އެތަނުގެ ސީނިއާ ބޭފުޅަކު ވަނީ ވޮއިސްއަށް ކަށަވަރުކޮށްދެއްވާފައެވެ. ޒީނާ އިސްތިއުފާ ދެއްވި ސަބަބެއް އަދި މިހާތަނަށް ހާމަކުރައްވާފައެއް ނުވެއެވެ. ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޒީނާ އައްޔަނުކުރެއްވީ މިދިޔަ އަހަރުގެ ނޮވެމްބަރުމަހުގެ ތެރޭގައެވެ.

ޕީއެސްއެމްގެ އެމްޑީކަމުގެ މަޤާމާ ޒީނާ ހަވާލުވުމަށްފަހު ކުރިމަތިވި އެންމެބޮޑު ގޮންޖެހުމަކީ އެތަނަށް ކުރިމަތިވެފައިވާ ދަރަނީގެ މައްސަލަތައްކަމަށް މައުލޫމާތު ލިބެއެވެ. ޕީއެސްއެމުން އެކި ފަރާތްތަކަށް ދަރާފައިވާ ދަރަނީގެ އަދަދު އުޅެނީ 260 މިލިއަން ރުފިޔާއަށްވުރެ މަތީގައެވެ.

ޕީއެސްއެމުން ދައްކަންޖެހޭ ގިނަ އަދަދެއްގެ ފައިސާ ހުރިއިރު، ބައެއް ފަރާތްތަކުން ވަނީ އެކުންފުންޏާ ދެކޮޅަށް މައްސަލަ ކޯޓަށް ހުށަހަޅާފައެވެ. މިގޮތުން ޕީއެސްއެމުން ލިބެންޖެހޭ ފައިސާ ނުލިބިގެން ބައެއް ފަރާތްތަކުން ޕީއެސްއެމަށްވަދެ، އެމްޑީއަށް އިންޒާރުދިން މައްސަލަތަކެއްވެސް ވަނީ ފެންމަތިވެފައެވެ. އަދި މި މައްސަލަ ފުލުހަށް ހުށަހަޅާފައިވާކަންވެސް ފާހަގަކޮށްލެވެއެވެ.

ޕީއެސްއެމަށް އައުމުގެ ކުރިން ޒީނާ ވަނީ ބްރޯޑްކާސްޓިން ކޮމިޝަނުގެ މެމްބަރުކަންވެސް ކޮށްފައެވެ. ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާޒް ހައްދަވާފައިވާއިރު، ޒީނާ ނޫސްވެރިކަމަށް ނިކުންނަވާފައިވަނީ 2006 ވަނަ އަހަރުގެ ތެރޭގައެވެ.