ހުސްވެފައިވާ ޕްރޮސެކިއުޓަރ ޖެނެރަލް (ޕީޖީ) ގެ މަގާމަށް އާ ބޭފުޅަކު އައްޔަނުކުރުމަށް ރައްޔިތުންގެ މަޖިލީހު ގައި ތާވަލު ކޮށްފައިވާ ޖަލްސާ މިރޭ ބޭއްވުމަށް ނިންމާފައިވާކަމަށް ޕީއެންސީން ބުނެފިއެވެ.
އިނގުރައިދޫ ދާއިރާގެ މެމްބަރު އަދި ޕީއެންސީ ޕީޖީ ލީޑަރު އިބްރާހިމް ފަލާހް ވަނީ މިކަން "ވޮއިސް" އަށް ކަށަވަރުކޮށްދެއްވާފައެވެ.
ފަލާހް ވިދާޅުވީ، ޖަލްސާގައި ފުރަތަމަ އޮންނާނީ ނަން ހުށަހެޅުން ކަމަށާއި، އޭގެ ފަހުން ކޮމިޓީ އަށް ނަން ފޮނުވުމަށްފަހު އިތުރު ޖަލްސާއެއް ބޭއްވުމަށްފަހު ނަން ފާސްކުރުން ކުރިއަށްދާނެ ކަމަށެވެ.
ގާނޫނު އަސާސީ ބަޔާން ކުރާ ގޮތުގައި ޕީޖީ ގެ މަގާމް ހުސްވާތާ 1 މަސް ދުވަހުގެ ތެރޭގައި އެ މަގާމަށް ބޭފުޅަކު އައްޔަނު ކުރަން ޖެހޭއިރު، ފަލާހް ވިދާޅުވީ، އެ މުއްދަތު މި މަހުގެ 21 ވަނަ ދުވަހަށް ހަމަވާކަމަށާއި، ދައުރުން ބޭރުން ޖަލްސާއެއް ބާއްވަނީ މި ސަބަބަށްޓަކައި ކަމަށެވެ.
ފަލާހް ވިދާޅުވީ، މިރޭގެ ޖަލްސާގައި ކުރިއަށްދާނީ ސަރުކާރުގެ ފަރާތުން ޕީޖީ ގެ މަގާމަށް ހުށަހަޅާ ނަންތައް ރައްޔިތުންގެ މަޖިލީހަށް ހުށަހެޅުމަށްފަހު ކޮމިޓީއަށް ފޮނުވުން ކަމަށާއި، ކޮމިޓީ މަރުހަލާގައި އިންޓަވިއުތައް ކޮށް ނިންމުމަށްފަހު ދެވަނަ ޖަލްސާއެއް ބާއްވައި، އެ ޖަލްސާގައި އައްޔަނުކުރުމުގެ މަސައްކަތް ކުރިއަށްދާނެ ކަމަށެވެ.
ޕީޖީ ގެ މަގާމް ހުސްވީ އެ މަގާމުގައި ހުންނެވި ހުސައިން ޝަމީމް ވަކިކުރަން މަސައްކަތް ކުރުމުން އެ މަގާމުން އިސްތިއުފާ ދެއްވުމާ ގުޅިގެންނެވެ. އެބޭފުޅާ މަގާމުން އިސްތިއުފާ ދެއްވި ނަމަވެސް، މިދިޔަ މަހުގެ 22 ވަނަ ދުވަހުގެ ރޭ ޖަލްސާއެއް ބާއްވައި ވޯޓު ނަގައި ޝަމީމް ވަކިކުރުމަށް ވަނީ ފާސްކޮށްފައެވެ.
Advertisement
This content is created and paid for by advertisers and does not involve Voice Journalists
