ދިވެހި ސިނަމާގައި މިއަދު އެންމެ ނުފޫޒު ގަދަ އެއް ޑައިރެކްޓަރަކީ އިލްޔާސް ވަހީދު (އިއްލެ) އެވެ. ޒުވާން ޑައިރެކްޓަރުގެ ނުފޫޒު ގަދަވީ އޭނާ ގެނެސްދިން މޮޅެތި އުފެއްދުންތަކުގެ ސަބަބުންނެވެ. އިއްލެގެ އަލަތު ޑައިރެކްޝަން "ބަވަތި" އަދި އޭގެ ފަހުން ގެނެސްދިން "ނީނާ" ފަދަ ފިލްމުތަކާ އެކު އިއްލެ ވަނީ ބެލުންތެރީންގެ ބޮޑު އިތުބާރެއް ހޯދާފަ އެވެ.
މި ފަހަރުވެސް މި އޮތީ ތަފާތު ފިލްމެކެވެ. މި ފަހަރު އޮތީ "ލޯބިން" އެވެ.
މިއީ އިއްލެ ލިޔެ، ޑައިރެކްޓް ކޮށްފައިވާ ރޮމޭންޓިކް ތުރިލާއެކެވެ.
އިލްޔާސް ވަހީދު (އިއްލެ)
އަންނަ މަހުގެ ހަވަނަ ދުވަހު އޮލިމްޕަހުގައި ޕްރިމިއާ ކުރަން ހަމަޖެހިފައިވާ ފިލްމުގެ ޕްރޮމޯޝަން މަސައްކަތް ބާރު ސްޕީޑްގައި ދަނީ ކުރިއަށެވެ. ފިލްމުގެ ޓީޒާއާ އޮފިޝަލް ޕޯސްޓަރު ވަނީ ލޯންޗު ކޮށްފަ އެވެ.
އަދި ފިލްމު ޕްރޮމޯޓް ކުރުމަށް ހާއްސަކޮށް ހަދާފައިވާ ލަވަ ވެސް މިހާރު ވަނީ އާންމުންނާއި ހަމައަށް ދޫކޮށްލާފަ އެވެ.
މި ފަހަރު މި އޮތީ ފިލްމުގެ ޓްރެއިލާ އެވެ. ޓްރެއިލާ އިން ފިލްމާމެދު ކުރެވޭ އުންމީދު ވަނީ ވަރަށް ބޮޑުވެފަ އެވެ. މިއީ ދިވެހި ސިނަމާއަށް ވަރަށް ކަމުދާނެ މޮޅު ފިލްމަކަށް ވާނެ ކަމަށް ބެލެވެ އެވެ.
ލޯބިންގެ ޕޯސްޓަރެއް
މިއީ ޝައުގުވެރި ކުރުވާނެ އަދި ތަފާތު އިހުސާސްތައް ކުރުވާނެ އެކި ހާދިސާތައް ދައްކުވައިދޭނެ ފިލްމެއްކަން ޓްރެއިލާ އިން ބުނެ އެވެ. ޓްރެއިލާ އާންމު ކުރަމުން ވެސް ކޮށްފައި ވަނީ ސުވާލެކެވެ. އެއީ "މި ވެސް ހަމަ ލޯބިން" ތޯ ކޮށްފައިވާ ސުވާލެވެ.
އެ ސުވާލު ކުރަން ޖެހޭ ސަބަބުތައް ގިނަ އެވެ. ފިލްމުގައި މައިގަނޑު ތިން ކެރެކްޓާ އަކީ އަހުމަދު ޝާރިފާއި ތާތި އާދަމްގެ އިތުރުން އޭނަގެ ފިރިމީހާ އިފްނާޒް ފިރާގެވެ. މި ތިން މީހުންގެ މެދުގައި ހިނގާ ލޯބީގެ އެކި ކަންކަން ދައްކައިދެ އެވެ.
ދެން ފެންނަނީ މުޅީން ތަފާތު ކަމެކެވެ. އެއީ މުޖްތަމައުގައި އޮތް ބަލިމަޑުކަމެއް ކަމުގައިވާ ހަށިވިއްކުމާއި ގުޅޭ ކަންތައްތަކެކެވެ. އެއީ މަޖުބޫރު ކުރުވާ ކަމެއްކަން ޓްރެއިލާ އިން ކޮންމެވެސް ވަރަކަށް އެނގެ އެވެ. 1 މިނެޓް 51 ސިކުންތުގެ ޓްރެއިލާ އިން މުޅީން ވެސް ފެނުނީ ޝައުގުވެރި ކަމެވެ. ފިލްމަށް އިންތިޒާރު ކުރަން ޖެހޭ ސަބަބުތަކެވެ.
މި ފިލްމުގައި ދެން ފެނިގެންދާނީ ނުޒުހަތު ޝުއައިބު (ނުޒޫ) އާއި އަހުމަދު ޝާކިރު (ޝާއްކޮ އައްމަޑޭ) އާއި އައިމިނަތު ރަޝީދާ (އައިންތު) އަދި އައިޝަތު ގުލްފާމް އެވެ.
މި ކެރެކްޓާ ތަކުން ވެސް ފިލްމަށް ބޮޑު ފުރިހަމަ ކަމެއް ގެނެސްދޭނެ ކަމަށް ބެލެވެ އެވެ.
މިއީ މި އަހަރު އިސްކިރީނަށް އަންނާނެ އެންމެ ތަފާތު ފިލްމަށް މިހާރު ޔަގީން ކުރެވެ އެވެ. އިންތިޒާރު ކޮށްލަމާ ހިނގާށެވެ.
Advertisement
This content is created and paid for by advertisers and does not involve Voice Journalists
