މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އާއި ޗައިނާގެ ދެ ކުންފުންޏެއް ގުޅިގެން ހުޅުމާލޭ ރުއްގަނޑު ސާފުކުރުމުގެ މަސައްކަތް ކުރިއަށްގެންގޮސްފިއެވެ.

މިއަދު ހެނދުނު ފެށި ސާފުކުރުމުގެ މި ހަރަކާތުގައި މޯޕާ އާއިއެކު ބައިވެރިވީ ރާއްޖޭގެ އުމްރާނީ ތަރައްޤީގެ މަސައްކަތުގައި ހަރަކާތްތެރިވަމުން އަންނަ ޗައިނާގެ ދެ ކުންފުންޏެކެވެ. މީގެ އިތުރުން ރާއްޖޭގައި ހުންނަވާ ޗައިނާގެ އެމްބަސީ އާއި ދަރިވަރުންނާއި އާއްމުންވެސް ބައިވެރިވިއެވެ. 

މިއަދު ކުރިއަށްގެންދިޔަ މި ހަރަކާތާ ބެހޭގޮތުން ރާއްޖޭގައި ހުންނަވާ ޗައިނާ އެމްބެސެޑަރު ކޮންގް ޒިއަންހުއާ އެކްސްގައި ކުރެއްވި ޕޯސްޓެއްގައި ވިދާޅުވީ، މި ހަރަކާތުގައި ބައިވެރިވުމުގެ ފުރުސަތު ލިބިގެންދިއުމަކީ ވަރަށްބޮޑު އުފަލެއްކަމަށެވެ. ސަފީރު ވިދާޅުވީ ތިމާވެށި ހިމާޔަތްކުރުމަކީ އަޅުގަނޑުމެން އެންމެންވެގެން ކުރެވޭނެ ކަމެއް ކަމަށެވެ.

މިއީ ޕްލާސްޓިކް ކުނި މެނޭޖުކުރުމުގައި ދެމެހެއްޓެނިވި ގޮތްތައް ކުރިއަށް ނެރުމަށާއި، ރާއްޖޭގެ ކަނޑުގެ މާހައުލު ރައްކާތެރިކުރުމުގެ މަގުސަދުގައި މޯޕާއިން ފަށާފައިވާ ޕްރޮގްރާމްގައި ހިމެނިގެން ކުރިއަށްގެްނދިޔަ ހަރަކާތެކެވެ.  މި ހަރަކާތް ފަށާފައިވަނީ މިއަދު ހެނދުނު 7:15 ހާއިރު ހުޅުމާލޭގެ ރުއްގަނޑު ސަރަހައްދު ފޭސް 1، މެޒާ ބިސްޓްރޯ ކެފޭ ކައިރީގައެވެ. މި ހަރަކާތުގައި ބައިވެރިވި ޗައިނާގެ ދެ ކުންފުންޏަކީ ސީ.އެޗް.އީ.ސީ އާއި ސީ.ސީ.ސީ.ސީ އެވެ. ސާފުކުރުމުގެ މި ހަރަކާތުގެ ތެރެއިން ހުޅުމާލޭގެ ގޮނޑުދޮށުން ގިނަ އަދަދެއްގެ ޕްލާސްޓިކް ކުނި ވަނީ އެއްކޮށްފައެވެ. 

މޯޕާއިން ވަނީ މީގެ ކުރިންވެސް ހުޅުމާލެ ސާފްކުރުމުގެ ޕްރޮގްރާމްތައް ކުރިއަށްގެންގޮސްފައެވެ.