ބިންހެލުންއައި ސީރިޔާގެ ހުޅަނގުއުތުރުގައި ކޮލެރާ ފެތުރެނީ

ފެބްރުއަރީ 6 ވަނަ ދުވަހު ތުރުކިޔޭ އާއި ސީރިޔާ އަށް ބިންހެލުމުގެ އަސަރުކުރި ސީރިޔަގެ ހުޅަނގުއުތުރުގައި ކޮލެރާ ފެތުރެން ފަށައިފައިވާ ކަމަށް އަލްޖަޒީރާ އިން ބުނެފިއެވެ.

ކޮލެރާ ޖެހިގެން އެސަރަހައްދުން މިހާރު ދެމީހުން މަރުވެފައިވާ ކަމަށް ވެސް އަލްޖަޒީރާގައި ބުނެފައިވެއެވެ. އެސަރަހައްދުގައި ކޮލެރާ އުޅޭކަން ރިކޯޑު ކުރެވިފައިވަނީ ފާއިތުވި އަހަރުއެވެ. އެހާހިސާބުން ފެށިގެން މިހާތަނަށް 22 މީހަކު މިވަނީ ކޮލެރާގައި މަރުވެފައެވެ.

"ބިންހެލުމުގެ ސަބަބުން ހަލާކުވި އިމާރާތްތަކާއި، ސާފު ފެން ނުލިބުމާއި، ރަނގަޅު ނަރުދަމާ ނިޒާމެއް ނެތުމަކީ މި ބަލި ފެތުރެން މިހާރު ދިމާވެގެން އުޅޭ ސަބަބު ކަމަށް ބެލެވޭ" ވައިޓް ހެލްމެޓް ޓީމުން ބުނެފައިވެއެވެ.

ބިންހެލުމުގެ ސަބަބުން، ސާފުފެނުގެ ދަތިކަން ކުރިމަތިވެފައި އޮތް ރެފިޔުޖީ ކޭމްޕްތަކުގެ ހާލަތު ކުރިއަށްވުރެ ބޮޑަށް ވަނީ ގޯސްވެފައެވެ.

"ބިންހެލުމުގެ ކުރިންވެސް މި ސަރަހައްދަކީ ނިކަމެތި ހާލަތެއްގައި އޮތްތަނެއް، ރެފިޔުޖީ ކޭމްޕުގެ 63 ޕަސެންޓުގައި ރަނގަޅު ނަރުދަމާ ނިޒާމެއް ނެތް، 43 ޕަސެންޓުގައި ސާފު ބޯފެން ލިބޭކަށްނެތް" ނޫރް ޤުރްމޫޝް ނަމަކަށްކިޔާ އެކްޓިވިސްޓަކު އަލްޖަޒީރާއަށް ބުނެފައިވެއެވެ.  ހޮސްޕިޓަލް ތަކާއި ހެލްތް ސެންޓަރު ތަކުގެ މެޑިކަލް އޮފިސަރުން ދަނީ ބިންހެލުމުގައި އަނިޔާވި މީހުންނަށް ފަރުވާ ދިނުމަށްވެސް އެތައްދަތިތަކަކާއި ކުރިމަތިލަމުން ކަން ނޫރް ފާހަގަކުރިއެވެ.

"އެމީހުން އެދަނީ ތިބި ހާލުން މަސައްކަތް ކުރަމުން، ފަންޑު ހުރި ވަރު މަދުވެ ޔޫއެންގެ އެހީ އެހިސާބަށް ފޯރުން ލސްވަމުންދާ ވަރަކަށް އެމީހުންގެ މަސައްކަތަށް އެދަނީ ބުރޫއަރަމުން، މެޑިކަލް އެހީ ބޭނުން ޖެހޭ މީހުން ދަނީ އިތުރުވަމުން، ވަސީލަތް ތައް ދަނީ މަދުވަމުން" ނޫރް ޤުރްމޫޝް ގެ ވާހަކައިގައި ބުނެފައިވެއެވެ.

ބިންހެލުމަށް ފަހު އެތައް ހާސް ބަޔަކު ވަނީ ބޯހިޔަވަހިކަން ގެއްލިފައެވެ. 20،000 އިމާރާތް ވަނީ ހަލާކުވުމާއި، ގެއްލުންތަކުގެ ސަބަބުން ހުސްކުރެވިފައެވެ.

"އެތައްހާސް ބަޔަކު މިހާރު ދިރިއުޅެމުން އެދަނީ އެންޖީއޯ ތަކުން ދީފައިވާ ވަގުތީ ހިޔާތަކުގައި، އެތަންތަން އޮތީ ތޮއްޖެހިފައި، އެމީހުން މިހާރު ދިރިއުޅެމުންދާ ވެއްޓަކީ ބަލިތައް އަވަހަށް ފެތުރިދާނެ ފަދަ ވެއްޓެއް، އަދި ޚާއްސަކޮށް މިހާރު ކޮލެރާ އެދަނީ ފެތުރެމުން" ނޫރު ބުނެފައިވެއެވެ.

ޔޫއެންގެ ސެކިޔުރިޓީ ކައުންސިލުން މިދިޔަ ހަފްތާގައި ނެރެފައިވާ ރިޕޯޓެއްގައި ބުނެފައިވަނީ ސާފުފެން ލިބުން ދަތިވުމުގެ ސަބަބުން ސީރިޔާގައި ކޮލެރާގެ ހާލަތު ގޯސްވެފައި ވާކަމަށެވެ.