މަސްވެރިއެއްގެ ސިޓީއަށް ޝިޔާމްގެ އުއްމީދީ ޖަވާބެއް: ލަސްތަކެއްނުވެ ގޮންޖެހުންތަކަށް ދާއިމީ ހައްލެއް ހޯދާނަން!

ލަސްތަކެއް ނުވެ މަސްވެރިންގެ ގޮންޖެހުންތަކަށް ދާއިމީ ހައްލެއް ހޯއްދަވައި ދެއްވާނެ ކަމަށް މަސްވެރިކަމާއި, ކަނޑުގެ ވަސީލަތްތަކާއި ބެހޭ ވުޒާރާގެ ވަޒީރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިފަދައިން ވިދާޅުވެފައި ވަނީ މަސްވެރިންގެ ހުރި އުދާސްތައް ބޭރުކޮށް، މަސްވެރިއަކު ލިޔެފައިވާ ސިޓީއެއްގެ ރައްދުގައި ކުރެއްވި ޓްވީޓެއްގައެވެ.

ޖިނާހް (ޖިނާއްޕެ) ނަމަކަށް ކިޔާ މީހަކު ޝިޔާމް އަށް އެޑްރެސްކޮށް ލިޔެފައިވާ އެ ސިޓީގައި އޭނާ ވަނީ، ނިމިދިޔަ ރިޔާސީ އިންތިހާބުގެ ކެންޕެއިންގެ ތެރެއިން އަދުގެ ސަރުކާރުގެ ބޭފުޅުން މަސްވެރިންނާ ގުޅޭގޮތުން ދައްކާފައިވާ ވާހަކަތަކާއި، ވެވަޑައިގެންފައިވާ ވަޢުދުތައް ހަނދާންކޮށްދީފައިވެއެވެ."އަޅުގަނޑުމެން މަސްވެރިން މި ތިބެނީ އަނގަޔާ އަތާ ދިމާނުވެއެވެ. ކުދިންގެ ޓިއުޝަންފީ އަދި އިންޓަރަވަލް، ޤުރުއާން ކުލާސްތަކުގެ ފީ، ބިލްތައް ނުދެއްކިފައެވެ. ނަމަވެސް މަނިކުފާނަށް ދައުލަތުގެ ހަޒާނާއިން ދަނީ ހުރިހާ އިނާޔަތެއްވެސް ލިބެމުންނެވެ"

ޖިނާހުގެ ސިޓީއާއި ގުޅިގެން ޝިޔާމް ކުރެއްވި ޓްވީޓެއްގައި ވަނީ، އޭނާ މީސްމީޑިޔާ މެދުވެރިކޮށް ފާޅުކޮށްފައިވާ އެ ކަންބޮޑުވުންތަކަކީ ރައީސުލްޖުމުހޫރިއްޔާ ޑރ. މުހައްމަދު މުޢިއްޒުވެސް މިވަގުތު އެންމެ ބޮޑު އަހައްމިއްޔަތުކަމެއް ދެއްވައިގެން ވަރަށް އަވަސް ހައްލެއް ހޯއްދަވަން މަސައްކަތްޕުޅުކުރައްވަމުން ގެންދަވާ ކަންބޮޑުވުމެއްކަން ފާހަގަ ކުރައްވާފައެވެ.

އަދި މީސްމީޑިޔާ މެދުވެރިކޮށް އެތައް މަސްވެރިއެއްގެ ފަރާތުން އެ މަސްވެރިންގެ ޙައްޤުގައި ޖިނާހު އަޑު އުފުލީތީ އުފާ ކުރައްވާ ކަމަށްވެސް ޝިޔާމް ވިދާޅުވި އެވެ. އަދި އަދުގެ ސަރުކާރަކީ  ދައްކާ ވާހަކަ ހަނދާންނައްތާލާނެ ބައެއް ނޫންކަމުގެ ޔަޤީންކަންވެސް ޝިޔާމް ވަނީ އަރުއްވާފައެވެ.

މިއާއެކު ޝިޔާމް ވަނީ މަސްވެރިކަމުގެ ސިނާޢަތުގައި ހުރި ގޮންޖެހުންތަކަށް ލަސްތަކެއްނުވެ ހައްލެއް ހޯއްދަވައިދެއްވާނެ ކަމަށް ވިދާޅުވެފައެވެ.

"މަސްވެރި ސިނާޢަތުގައި ހުރި ގޮންޖެހުންތަކަށް ދާއިމީ ހައްލެއް ރައީސް ޑރ.މުއިއްޒުގެ ސަރުކާރުގައި އަޅުގަނޑުމެން ލަސްތަކެއްނުވެ ހޯދާނަން إن شاءالله."

މަސްވެރިކަމާއި ބެހޭ ވުޒާރާގެ ވަޒީރު އަހުމަދު ޝިޔާމް

ޝިޔާމް އިތުރަށް ވިދާޅުވީ، މަސްވެރިންނަށް ކުރިމަތިވެފައިވާ ގިނަ ގޮންޖެހުން ތަކަކީ ވާހަކަ ދައްކައިގެން ހައްލު ކުރެވޭނެ ކަންކަން ކަމަށާ، މިސަރުކާރުގެ އަމާޒަކީ މަސްވެރިންގެ އަޑު ގާތުން އަހައިގެން ޖުމްލަ ހައްލަށް މަސައްކަތްކުރުން ކަމަށެވެ.

"ޖިނައްޕެއަށް ގުޅާލުމުން ހިއްސާކުރެއްވި ވާހަކަފުޅަކީ މުހިއްމު ވާހަކަފުޅެއް އަދި އެކަމަށް ނިމުމެއް ގެނެވޭނެ. ގިނަކަންކަމަކީ ވާހަކަ ދައްކައިގެން ހައްލުހޯދޭނެ ކަންކަން. އަޅުގަނޑުމެންގެ އަމާޒަކީ މަސްވެރިންގެ އަޑު ގާތުން އަހައިގެން ޖުމްލަ ހައްލަށް މަސައްކަތްކުރުން."

މަސްވެރިކަމާއި ބެހޭ ވުޒާރާގެ ވަޒީރު އަހުމަދު ޝިޔާމް

ރައީސް ޑރ. މުއިއްޒު ވެރިކަމަށް ވަޑައިގެންނެވީ މަސްވެރިންނަށް ގިނަ ވަޢުދުތަކެއް ވެވަޑައިގެން އެފަރާތްތަކުގެ މައްސަލަތައް ހައްލު ކޮށްދެއްވާނެ ކަމުގެ ޔަގީން ކަމާއިއެކުގައެވެ. އެގޮތުން ރައީސް ޑރ. މުޢިއްޒު ވަނީ ބޮޑު ކަންނެލި ކިލޯއެއް 85 ރުފިޔާއަށް މަތި ކުރައްވާނެ ކަމަށާއި، މަސް ކިލޯއެއް 20 ރުފިޔާއަށް ވުރެ ދަށްނުކޮށް ހިފަހައްޓާނެކަމަށް ވިދާޅުވެފައެވެ.

މީގެ އިތުރުން މަސްވެރިކަމަކީ ވަޒީފާއެއްކަމުގައި އެކަށައަޅާ، ބޭންކިންގގެ ކްރެޑިޓް ރޭޓިންގގެ ތެރެއަށް ފެތި، މާލީ އިދާރާތަކުގެ ތެރެއިން ލޯނު ލިބުންފަދަ އިތުރު ޚިދުމަތްތައް ހޯދަން މަސްވެރިންނަށް ފުރުޞަތު ހުޅުވާލުމަކީވެސް ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅެކެވެ.

އެމަނިކުފާނުގެ ހަފްތާ 14 ގެ ޕްލޭންގައިވެސް މަސްވެރިކަން ކުރިއެރުވުމަށް ގިނަ ކަންކަން ވަނީ ރޭވިފައެވެ.

އެގޮތުން، މަސްވެރިންގެ ދަފްތަރެއް އެކުލަވާލުމުގެ ގޮތުން ދަފްތަރުގައި ރެޖިސްޓާރ ވާން ހުޅުވާލުމާއި، މަސްވެރިކަމުގެ ދާއިރާގެ އުފެއްދުންތައް މާކެޓް ކުރުމަށް ޚާއްސަ އެޖެންސީއެއް އުފެއްދުމުގެ އިތުރުން، މިފްކޯ ހިންގުމުގައި މަސްވެރިންގެ ދައުރު ފުޅާކުރުން ހިމެނެއެވެ.