ފަހުރުވެރި ކާމިޔާބީއާއެކު ރަށުން އައިހަމްއަށް ހޫނު މަރުހަބާއެއް

ބޮޑުތިލަދުންމަތީ އުތީމަށް މިއަދަކީ ހާއްސަ ދުވަހެކެވެ. އާންމުކޮށް ހުކުރު ދުވަހުގެ ހެނދުނުގެ ވަގުތަކީ ބަނދަރުމައްޗާއި ރަށުތެރޭ ހަމަހިމޭން ވަގުތެވެ. ނަމަވެސް މިއަދު ހެނދުނު ރަށުގެ މުޅި ބަނދަރުމަތީ ރައްޔިތުންނައިގެން ފުރިފަ އެވެ. އެންމެންހެން ތިބީ ޤައުމީ ކުލަތަކުގެ ހެދުންތަކުން ޖަރީވެގެން އުފާވެރި މޫނެއްގަ އެވެ. އެހެންނުވާންވީވެސް ސަބަބެއް ނެތެވެ.

އުތީމަށް އުފަން، އެރަށު މީނާޒް، އަޙްމަދު އައިހަމް (ފަތޯ) އަކީ މިދިޔަ ސީޒަންގައި ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާ އެވެ. ވަރުގަދަ ފުޓްސެލް ޓީމެއް އޮތް އުތީމަށް މިވަރުގެ ފަޚުރެއް ލިބުނު މިއީ ފުރަތަމަ ފަހަރެވެ. ރަށުގެ ދަރިއަކަށް މިވަރުގެ ކާމިޔާބެއް، ފަޚުރެއް ލިބުމަކީ އެއްބައިވަންތަކަމުގައި ނަމޫނާއެއް ކަމުގައިވި އުތީމަށް ލިބުނު ޝަރަފަކާއި ފަޚުރެއް ކަމުގައި އެރަށުގެ ކުދިބޮޑު އެންމެން ދެކެ އެވެ.

ކާމިޔާބީއަށް ފަހު ފަޚުރުވެރި އެވޯޑާއެކު އައިހަމް މިއަދު ރަށަށް އައީ އެވެ. ކައުންސިލްގެ ރައީސާއި މެންބަރުން އަދި ރަށުގެ މުއައްސަސާތަކުގެ ވެރީންނާއި ކުދިބޮޑު އެންމެން ޚާއްސަކޮށް އާއިލާގެ ހުރިހާ މެންބަރުން ބަނދަރަށް ޖަމާވެ އައިހަމަށް މަރުހަބާ ކިޔެވެ.

އައިހަމައަށް މަރުޙަބާ ކިޔުމަށް އުތީމު އޮތީ ވަަރަށް ފުރިހަމައަށް ތައްޔާރުވެފަ އެވެ. ޤައުމީ މުނާސަބަތުތަކުގައި ވެރީންނާއި ޒިޔާރަތްކުރާ މެހެމާނުންނަށް ވަރަށް ފުރިހަމަ މަރުޙަބާއެއް ކިޔުމުގެ ފަޚުރުވެރި ތާރީޚެއް އޮތް އުތީމުގެ ރައްޔިތުންގެ ކިބައިން މިއަދުވެސް ފެނިގެންދިޔައީ އެކަމެވެ.

އައިހަމުގެ ކާމިޔާބީ ފާހަގަކޮށް އޭނާއަށް ޚާއްސަ ހަނދާނީ ފިލައެއް ދިނެވެ. އަދި އެ ފަޚުރުވެރި ކާމިޔާބީއަށްޓަކައި އައިހަމަށް ޚާއްސަ ތަޚުތެއް ހަދާފައި ވެ އެވެ. ތަޚުތާއި ހަމައަށް ގެންދިޔައީ އެކަމަށް ޚާއްސަ ސަޤާފީ ހަރަކާތްތަކާއެކު އެވެ. އަދި އޭނާގެ ޝަރަފުގައި މަރުޙަބާގެ ހުށައެޅުންތަކެއް ހުށައެޅި އެވެ.

އޭގެ ފަހުން ޖަމާވެފައިވާ ކުދިބޮޑު ރައްޔިތުންނާއި ސަލާމް ކުރުން އޮތެވެ. 

މި މަހުގެ އަށްވަނަ ދުވަހުގެ ރޭ އޮތް އެފްއޭއެމް އެވޯޑްސް ނައިޓްގައި އެންމެ މޮޅު ފިިރިހެން ކުޅުންތެރިޔާގެ އެވޯޑް ފަތޯ އުފުލާލީ ނިއުރޭޑިއަންޓުގެ އަލީ ފާސިރު (ސެންޓާ) އާއި މާޒިޔާގެ ޙަމްޒާ އަދި އިބްރާހިމް މަޙްދީ އާއި ބުރުގެ މުޙައްމަދު ނައިމްއާ ވާދަކޮށެވެ.

މިއަދުގެ މަރުޙަބާއިން ފެނިގެން ދިޔައީ އައިހަމަށް ލިބުނު މި ކާމިޔާބީގައި އުތީމު ފަޚުރުވެރިވީ މިންވަރެވެ. އަދި ރަށަށް ރީތި ނަމާއި ޝަރަފު ހޯދައިދޭ ރައްޔިތުންނަށް އުތީމުގައި އޮތް ޚާއްސަ ލޯތްބެވެ.