އުތީމު ޚާއްސަވަނީ ކީއްވެ؟

ރަށްތަކުގެ ތެރެއިން ވަކިރަށެއް ޚާއްސަވަނީ ނުވަތަ ޙާއްސަކުރަނީ އެ ރަށަކާ ގުޅިފައިވާ ސިފައެއް ނުވަތަ ސިފަތަކެއްގެ ސަބަބުންނެވެ. މިދެންނެވި ގުދުރަތީ ގޮތުން އެރަށަށް ލިބިފައިވާ ސިފަތަކެއްގެ ވާހަކައެވެ. މިސާލަކަށް ބަނދަރު ފަސޭހަ ރަށަކަށް ވުމުން ދަތުވެރިން އެރަށަކީ ޚާއްސަ ގޮތެއްގައި ފާހަގަ ކުރާ ރަށަކަށް ވެދާނެއެވެ. ރީތި ފަޅެއް އޮންނަ ނަމަ ލަފާ ފުރުން ފަސޭހަކަމުގެ ގޮތުން އެރަށެއް ޚާއްސަ ވެދާނެއެވެ. ނުވަތަ މޫދަށް އެރިލާ މަޖާކޮށްލަން ހިތްގައިމު ރަށެއްގެ ގޮތުގައި އެރަށެއް ޚާއްސާ ވެދާނެއެވެ.

މީގެ އިތުރުން ދިރުންހުރި ކުޅިއެއް ނުވަތަ ޚާއްސަ ފެންގަނޑެއް އޮތުމުން އެރަށަކީވެސް ޚާއްސަ ރަށަކަށް ބެލިދާނެއެވެ. މިނޫނަސް ގުދުރަތީ ސިފަތަކުން ރަށްރަށް ޚާއްސަ ކުރެވިފައިވެއެވެ. އަދި ރަށް އޮންނަ ސަރަޙައްދުގެ ގޮތުން ޚާއްސަ ރަށެއް ގޮތުގައި ބަލާފައިނެއެވެ. ހަމަ މިފަދައިން ކަނޑު މޫނު ރަށެއް ނަމަވެސް އެއި ޚާއްސަ ވެދާނެ ސަބަބެކެވެ.

މި ދެންނެވީ ޢާންމު ގޮތެއްގައި ރަށްރަށް ޚާއްސަވާ ސިފަތަކެވެ. އުތީމަކީ މިއިން އެއްވެސް ސިފަތަކެއް ލިބިފައިވާ ރަށެއްނޫނެވެ.

ރަށްރަށް ޚާއްސަ ވާ ދެވަނަ ގޮތަކީ އިންސާނީ ވަސީލަތެވެ. އެރަށަކީ އެހެންރަށް ރަށަށްވުރެ ބަސްގިނަ ރަށަކަށް ވެއްޖެނަމަ އެރަށް ބެލެވޭނީ ޚާއްސަ ރަށަކަށެވެ. މޮޅު ބަސްވެރިން ތިއްބަވާ ރަށެއް ނަމަ އެރަށުގެ ނަންވެސް ކިޔުނީ ޚާއްސަ ގޮތެއްގައެވެ.ކުޅަދާނަ ފަންނުވެރިން ތިބޭ ނަމަ އެރަށެއްވެސް އެރޮނގުން ވާނީ ޚާއްސަ ކުރާނެވެ. އުތީމަކީ މިފަދަ ވަސީލަތެއްވެސް އެރަށަށް ނިސްބަތްވާ ރަށެއް ނޫނެވެ.

ސުވާލަކީ މި ގޮތަށް ކަނަތައް ހުރި އިރު އުތީމު ޙާއްސަވަނީ ކީއްވެތޯއެވެ. ޖަވާބަކީ އުތީމު ޙާއްސަވަނީ ރަށެއް ޙާއްސަ ވާނެ އެންމެ ޢިއްޒަތްތެރި، އެންމެ ފަޚްރުވެރި ހައިސިއްޔަތުންނެވެ. އެއީ އެރަށުން އުފެދުނު ޒަޢީމެއްގެ ދައުރުގެ މަތިވެރިކަމުންނެވެ. ޝައްކެއް ނެތެވެ. އުތީމު ޙާއްސަ ވަނީ އުތީމު ކަޅުއަލި ކަތީބު ތަކުރުފާނުގެ ހުސެން ކަތީބު ތަކުރުފާނުގެ ޢިއްޒަތްތެރި ދަރިކަލުން މުޙަންމަދު ތަކުރުފާނުގެ ސަބަބުންނެވެ. އެތަކުރުފާނުގެ ލީޑަރ ކަމުގެ ދަށުން އެތަކުރުފާނާ އެ ތަކުރުފާނުގެ ބައިވެރިން ގައުމަށްޓަކައި ކުޅަ ޖިހާދެއްގެ މަތިވެރި ކަމުންނެވެ. އެ ނަސްރާ ކާމިޔާބީގެ ނަތީޖާގެ ފޮނިކަމުންނެވެ. އެނަތީޖާއަށްޓަކައި ދިވެހިން އަދަ ކުރާ ޝުކުރު މަތިވެރިއެވެ. ކުރާ އިޙްތިރާމް އެހާމެ ލޮބުވެތިމެއެވެ.

15 އަހަރުވަންދެން ރާއްޖެގެ މައްޗަށް ވެރިވެގަނެގެން ތިބެ ރާއްޖޭގެ މިނިވަކަންކަމާއި މާތްވެގެންވާ އިސްލާމްދީންގެ އަލިކަން ގެއްލެމުންދަނިކޮށް އަނިވެޔާވެރި ޕޯޖުގީޒުންގެ ކިބައިން ރާއްޖެ ސަލާމަތްކުރައްވާ މިނިވަންކަމުގެ އުފަލާ އިސްލާމްދީނުގެ ނަސީބު އަނބުރާ ހޯއްދާދެއްވި އުތީމު މުޙަންމަދު ތަކުރުފާނެވެ. އެ ތަކުރުފާނަކީ  އުތީމު ދަރިއެކެވެ. އެހެން ކަމުން ޙާއްސަ ނުވެ ދިވެހިންނަށް ދެން ޙާއްސަ ވާނީ ކޮން ރަށެއް ތޯއެވެ. އާދޭހެވެ. އުތީމު ޙާއްސަ ވަނީ އުތީމު މުޙަންމަދު ތަކުރުފާނުގެ ސަބަބުންނެވެ.

ލިޔުނީ: އުތީމު އާދަމް ޢަބްދުއްރަޙުމާން (އުތީމު އާދަމްބެ)