އުތީމު ވާހަކަ ވައުގެ ފޮޓޯތަކާއެކު ޗައިނާ ސަފީރު ވިދާޅުވީ އެރަށަށް ކުރެވުނީ ފައިދާހުރި ދަތުރެއް ކަމަށް

އުތީމަށް ކުރެވުނު ދަތުރަކީ ފައިދާހުރި ދަތުރެއްް ކަމުގައި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޒިއަންހުއާ ވިދާޅުވެއްޖެއެވެ.

އުތީމު ވާހަކަ ވައުގެ ފޮޓޯތަކެއް ހިއްސާކުރައްވައި ސަފީރު އެކްސްގައި ކުރެއްވި ޕޯސްޓެއްގައި ވިދާޅުވީ ތާރީޚާ މެދު ޤައުމެއް ހިއްސާކުރާ ވިސްނުމަކީ އެ ޤައުމެއް އެކީގައި ގުޅައިދޭ ބާރެއް ކަމަށެވެ. ތާރީޚީ ތަޢުލީމުގެ ޒަރީޢާއިން ޖީލުތަކުގެ މެދުގައި ޤައުމީ ވަންތަކަމާއި ޖަމާޢީ ހަނދާންތައް ދެމެހެއްޓޭ ކަމަށް ވިދާޅުވިއެވެ.

ސަފީރު ވަނީ މަޝްހޫރު މުފައްކިރު މާކަސް ގާވީގެ ބަސްކޮޅެއް ވެސް ހިއްސާކުރައްވައިފައެވެ. އޭގައި ބުނީ "އެ ބައެއްގެ މާޒީގެ ތާރީޚާއި އަސްލާއި ސަގާފަތް ނޭނގޭ ބަޔަކީ މޫތައް ނެތް ގަހެއް ފަދަ ބައެއް" ކަމުގައެވެ.

ސަފީރު ވިދާޅުވީ އުތީމަށް ކުރެއްވި މި ޒިޔާރަތަކީ ވަރަށް ފައިދާހުރި ދަތުރެއް ކަމަށާއި ދިވެހި ރަޙުމަތްތެރިންނަށް ޤައުމީ ދުވަހުގެ ތަހުނިޔާ ދަންނަވާ ކަމަށެވެ.

ދިވެހި ތާރީޚީ ބިނާއެއްކަމަށްވާ އުތީމު ކަނދުވަލު މިސްކިތާ އިންވެގެން އޮތް ޤުދުރަތީ ވަލުގެ ތެރޭގައި ތަރައްޤީކުރެވިފައިވާ "ވާހަކަ ވައު" އަކީ ބޮޑުތަކުރުފާނުގެ މިނިވަންކަމުގެ ޖިހާދުގެ ވާހަކަ ކިޔައިދީ، އޭގެ މަންޒަރުތައް ސިފަކޮށްދޭ ބޯޑުތަކެއްގެ އެހީގައި އެ ޖިހާދު އިހުސާސްކޮށްދިނުމަށްޓަކައި ތާރީޚުގެ ތެރެއަށް ހިނގާލެވޭ ހިނގާލުމެއްގެ ގޮތުގައި ފަރުމާކުރެވިފައިވާ ޕާކެކެވެ.

ޕާކަށް ޒިޔާރަތްކުރާ ފަރާތްތަކުން ވާހަކަ ވަލުގެ މަގުތަކުން ހިނގަމުންދާއިރު، ގަސްގަހާގެހީގެ ތެރެއިން ބޮޑުތަކުރުފާނުގެ ޤައުމީ ޖިހާދުގެ މުހިންމު ހާދިސާތައް ތަރުތީބުން ފެންނަން ހުންނަ ގޮތަށް ފަރުމާކުރެވިފައިވާ މި ހިނގާލުމުގައި، މިލާދީ ސަނަތުން 1558 ގައި، މާލެ އިސްތިޢުމާރު ކުރި ހިސާބުން ފެށިގެން، ހއ. ބާރަށުގައި ކަޅުއޮށްފުންމި ބެންނެވުމާއި، މީލާދީ ސަނަތުން 1573 ގައި ލިބުނު ފަޚްރުވެރި ނަޞްރާ ހަމައަށް ވާހަކަތައް ގެނެސްދެވިފައިވެއެވެ. މިއީ ފަންނުވެރިކަމާއި ޤުދުރަތީ ރީތިކަމާއި ތާރީޚު އެއްތަނަކުން ތަޖުރިބާކޮށްލުމުގެ ފުރުޞަތު ފަހިވެގެންދާގޮތަށް ފަރުމާކުރެވިފައިވާ ޕާކެކެވެ.

ރާއްޖޭގެ ޤައުމީ ދުވަހަކީ ބޮޑު ތަކުރުފާނު ޕޯޗުގީޒުންގެ އަތްދަށުން ރާއްޖެ މިނިވަންކުރެއްވި ދުވަސް ފާހަގަކުރާ ދުވަހެވެ. އުތީމަކީ ބޮޑު ތަކުރުފާނުގެ އުފަން ރަށެވެ.