އެމްޖޭއެސް ރާބަދި ޗެލެންޖު: މާމަނަގައު ބަލިކޮށް އަލިއާ ކޮތައިފަރު ސެމީފައިނަލަށް

މިހާރު ކުރިއަށްދާ އެމްޖޭއެސް ރާބަދި ޗެލެންޖުގައި ރޭ ކޮތައިފަރާއި މާމަނަގައު ބައްދަލުކުރި މެޗް ފަސޭހަކަމާއެކު ކޮތައިފަރު ކާމިޔާބުކޮށް ސެމީފައިނަލުގެ ޖާގައެއް ހޯދައިފިއެވެ.

މީދޫގައި ކުޅުނު މިމެޗް މާމަނަގައުގެ މައްޗަށް ކޮތައިފަރު ކުރި ހޯދީ، 4-1 ގެ ނަތީޖާއަކުންނެވެ. މެޗްގައި ކޮތައިފަރަށް ގޯލް ހުޅުވާލަދިނީ ހަވަނަ މިނެޓް ތެރޭގައި ހުސައިން އިރުފާނެވެ. ކޮތައިފަރުގެ ދެވަނަ 18 ވަނަ މިނެޓް ތެރޭގައި ލަނޑު ޒިޔާން ސަމީރު ކާމިޔާބުކޮށްދިން އިރު، ފުރަތަމަ ހާފް ނިމުނީ 2-0 ގެ ނަތީޖާއިންނެވެ.

ދެވަނަ ހާފް ފަށައިގެން 27 ވަނަ މިނެޓް ތެރޭގައި ކޮތައިފަރުގެ އަހުމަދު ނާހީ ލަނޑެއް ޖަހާފައިވަނިކޮށް މާމަނަގައުގެ އިބްރާހިމް ހަމޫދު ވަނީ 31 ވަނަ މިނެޓް ތެރޭގައި ލަނޑެއް ޖަހައި މޮޅުވުމުގެ އުއްމީދު އާކޮށްދީފައެވެ. ނަމަވެސް އޭގެ ހަތް މިނެޓްފަހުން ކޮތައިފަރުގެ ހުސައިން ނިޒާމް ވަނީ ލަނޑެއް ޖަހައި މެޗްގެ ނަތީޖާ 4-1 އަށް ބަދަލުކޮށްފައެވެ.

މިމެޗްގައި ކޮތައިފަރަށް ގިނަ ގޯލްތަކެއް ޖެހުމުގެ ފުރުސަތު ލިބިގެންދިޔައިރު، މާމަނަގައުންވެސް ވަނީ ކޮތައިފަރުގެ ގޯލަށް ނުރައްކާކޮށްފައެވެ. މިމެޗްގެ މޮޅުކުޅުންތެރިޔާގެ މަގާމް ހޯދީ ކޮތައިފަރުގެ އަހުމަދު ނާހީއެވެ.

އެމްޖޭއެސް ރާބަދި ޗެލެންޖުގައި މިރޭ ކޯރާ ކޯރާ މޯލްޑިވްސް ނިކުންނާނީ، އެމަރަލްޑް ފާރުފުއްޓާ ދެކޮޅަށެވެ. މިމެޗް ފަށާނީ މިރޭ 09:00 ގައެވެ. ދެވަނަ މެޗްގައި ޖޯލި ނިކުންނާނީ ޖޯލި ބީން އާ ދެކޮޅަށެވެ. މިމެޗް ކުޅުމަށް ނިންމާފައިވަނީ 10:00 ގައެވެ.