ދެކުނު ކޮރެއާގައި ބާއްވާ "ފަސްޓް ގްލޯބަލް ޗެލެންޖު" ގައި ބައިވެރިވާ ރާއްޖޭގެ ޓީމް އިންޗިއޮންއަށް ހިނގައްޖެ

ދެކުނު ކޮރެއާގައި ބޭއްވުމަށް ހަމަޖެހިފައިވާ ބައިނަލްއަޤްވާމީ ރޮބޮޓިކްސް މުބާރާތެއް ކަމަށްވާ "ފަސްޓް ގްލޯބަލް ޗެލެންޖް" ގައި ރާއްޖެ ތަމްސީލުކުރާ ދިވެހި ޓީމު އެ ޤައުމުގެ އިންޗިއޮންއަށް ހިނގައްޖެއެވެ.

މި މުބާރާތާ ގުޅޭގޮތުން ފަސްޓް ގްލޯބަލްގެ ރާއްޖޭގެ ޕާޓްނަރު ކަމަށްވާ ވިމެން އިން ޓެކް މޯލްޑިވްސް އިން މަޢުލޫމާތު ދިން ގޮތުގައި، މި މުބާރާތުގައި ރާއްޖެ ތަމްސީލުކުރާ ދިވެހި ދަރިވަރުންގެ ޓީމު މިހާރު ވަނީ ދެކުނު ކޮރެއާގެ އިންޗިއޮންއަށް ގޮސް މުބާރާތަށް ތައްޔާރުވާން ފަށާފައެވެ.

މިއީ އޮލިމްޕިކްސްގެ އުސޫލުން ބާއްވާ ރޮބޮޓިކްސް މުބާރާތަކަށް ވާއިރު، މުބާރާތުގައި ކޮންމެ ޤައުމެއް ވެސް ތަމްސީލުކުރަނީ ސްކޫލް ކިޔަވާ ކުދިންގެ ޓީމަކުންނެވެ. މި މުބާރާތުގައި ވާދަކުރަނީ ޓީމް މޯލްޑިވްސްގެ ނަމުގައެވެ. ވިމެން އިން ޓެކް މޯލްޑިވްސް އިން ބުނީ މި މުބާރާތުގައި ބައިވެރިވާ ހުރިހާ ޓީމުތަކުން ވެސް ރޮބޮޓެއް ޑިޒައިންކޮށް ޕްރޮގްރާމް ކުރަނީ އެއް މިންގަނޑެއްގެ ސާމާނު (ސްޓޭންޑަޑް ކިޓެއް) ބޭނުންކޮށްގެން ކަމަށެވެ. އެގޮތުން މެޗުތަކުގައި އެކި ޤައުމުތަކުގެ ޓީމުތައް އެލަޔަންސްތަކެއްގެ ގޮތުގައި ގުޅިގެން މަސައްކަތްކޮށް، ރޮބޮޓްތައް ބޭނުންކޮށްގެން ތަފާތު ޓާސްކުތައް ފުރިހަމަކޮށްގެން ޕޮއިންޓް ހޯދާނެއެވެ. މި މުބާރާތުގެ ކާމިޔާބީ ބިނާވެފައިވަނީ އިންޖިނިއަރިންގ އާއި، ސްޓްރެޓެޖީ އަދި ގުޅިގެން މަސައްކަތްކުރުމުގެ (ޓީމްވޯކް) ހުނަރުގެ މައްޗަށެވެ.

ދުނިޔޭގެ 190 އަށް ވުރެ ގިނަ ޤައުމުން ބައިވެރިވާ މި ބޮޑު މުބާރާތް ކުރިއަށްދާނީ މިމަހުގެ 7 ވަނަ ދުވަހުން ފެށިގެން 10 ވަނަ ދުވަހުގެ ނިޔަލަށެވެ.

ވިމެން އިން ޓެކް މޯލްޑިވްސްއިން ބުނީ 2023 ވަނަ އަހަރުން ފެށިގެން މި މުބާރާތުގައި ރާއްޖެ ތަމްސީލުކުރަމުން އަންނަ ކަމަށެވެ. އެންމެފަހުން ޕެނަމާގައި ބޭއްވުނު ފަރސްޓް ގްލޯބަލް ޗެލެންޖުގައިވެސް ރާއްޖޭގެ ޓީމުން ވަނީ ބައިވެރިވެ، 190 އަށް ވުރެ ގިނަ ޤައުމުގެ ތެރެއިން ދުނިޔޭގެ ގަދަ 50 ގެ ތެރޭގައި ހިމެނިފައެވެ. ފަސްޓް ގްލޯބަލް އިން ދޭ ޓްރެވަލް ސަޕޯޓާއި ފަހިކޮށްދޭ އެކި ފުރުސަތުތަކުގެ ސަބަބުން، ދިވެހި ޒުވާނުންނަށް ދުނިޔޭގެ އެކި ކަންކޮޅުތަކުގެ ދަރިވަރުންނާ އެކު ވާދަކުރުމާއި، ގުޅިގެން މަސައްކަތްކުރުމުގެ އިތުރުން ޒަމާނީ ޓެކްނޮލޮޖީގެ އައު ކަންކަން ދަސްކުރުމުގެ އަގުހުރި ފުރުޞަތުތައް މިއަދު ތަނަވަސްވެފައިވާކަމަށްވެސް އެ ޖަމިއްޔާއިން ވަނީ ފާހަގަކޮށްފައެވެ.

މިފަހަރުގެ ތަމްރީނު ދެނީ ރޮބޮޓިކްސް އަދި ޓެކްނޮލޮޖީ ތަޢުލީމުގެ ޒަރީޢާއިން ޒުވާން ދަރިވަރުން ބާރުވެރިކުރުވުމަށް މަސައްކަތްކުރާ، ސްޓެމް ސެޓިފައިޑް މަރުކަޒެއް ކަމަށްވާ ފޯލޫޕް ކޯޑިންގ އެކެޑަމީންނެވެ. ޓީމުގެ ދިހަ މެންބަރުންނަކީ ރާއްޖޭގެ އެކި އަމިއްލަ އަދި ސަރުކާރު ސްކޫލްތަކުގެ ދަރިވަރުން ކަމުގައި ވިޔަސް، ހުރިހާ މެންބަރުންނަށް ވެސް ފޯލޫޕް ކޯޑިންގ އެކެޑަމީން ހާއްސަ ޓެކްނިކަލް ތަމްރީނުތަކެއް އަންނަނީ ދެމުންނެވެ.

މިފަހަރުގެ މުބާރާތުގައި ރާއްޖެއިން ވާދަކުރާ ޓީމް މޯލްޑިވްސްއަށް ލީޑް ޕާޓްނަރުގެ ގޮތުގައި އެހީތެރިކަންދީފައިވަނީ އެމް.ޑަބްލިއު.އެސް.ސީ އެވެ. މީގެ އިތުރުން އިނޭބްލިންގ ޕާޓްނަރުންގެ ގޮތުގައި ވިޒިޓް މޯލްޑިވްސް އަދި އެލައިޑް އިންޝުއަރަންސް ހިމެނޭކަން ފާހަގަކޮށްލެވެއެވެ.